بۇگىن شۆەيتساريا مەن بەلارۋس, چەحيا مەن لاتۆيا, سلوۆاكيا مەن نورۆەگيا جانە كانادا مەن گەرمانيا كەزدەسەدى. جەڭىمپازداردىڭ جولدارى شيرەك فينالدا توعىسادى. 26 مەن 27 اقپاندا جارتىلاي فينالدىق ماتچتار وتسە, جۇلدەگەرلەر مەن جەڭىمپاز كوماندا 28 اقپاندا انىقتالادى.
ۆانكۋۆەردە جالاۋى جەلبىرەگەن ءححى قىسقى وليمپيا ويىندارىنىڭ باعدارلاماسى بويىنشا كەشە ءتورت مەدالدار جيىنتىعى ساراپقا سالىندى. سونىڭ ەكەۋىندە قازاقستاننىڭ سپورتشىلارى كۇش سىناستى. شاڭعىدان كوماندالىق سپرينتتە ەل نامىسىن نيكولاي چەبوتكو مەن الەكسەي پولتورانين قورعادى. جارتىلاي فينالدان ىركىلمەي وتكەن وتانداستارىمىز اقتىق ايقاستا جانكەشتىلىك تانىتتى. باسەكە بەل ورتاعا جەتكەندە ولار العاشقى ۇشتىككە ەندى. سول ساتتە بارشامىزدىڭ كەۋدە تۇكپىرىمىزدە ء“بالكىم قورجىنىمىزعا تاعى ءبىر مەدال تۇسەر” دەگەن ءۇمىت وتى جىلت ەتتى. الايدا شەشۋشى ساتتە قارسىلاستار قارقىنىن كۇشەيتىپ, ءۇش كوماندا بىزدەن وزىپ كەتتى. بۇل باسەكەدە نورۆەگيا باس جۇلدە السا, گەرمانيا مەن رەسەي كۇمىس پەن قولاعا قول جەتكىزدى. كانادا مەن قازاقستاننىڭ شاڭعىشىلارى كومبەگە بىردەي جەتتى. قايسى وزىپ, قايسى قالىپ قويعانىن فوتوفينيش انىقتادى. بۇل رەتتە جارىس قوجايىندارىنىڭ جولى بولدى. وسىلايشا نيكولاي چەبوتكو مەن الەكسەي پولتورانين بەسىنشى ورىندى يەلەندى. ايەلدەر اراسىنداعى سپرينتتىك سايىستا وكسانا ياتسكايا مەن ەلەنا كولومينا ونەر كورسەتتى. الايدا ولار بابىندا بولماي شىقتى. ناتيجەسىندە جەلەستەرىمىز جارتىلاي فينالدان اسا المادى. بۇل تارتىستا گەرمانيا, شۆەتسيا جانە رەسەي قۇرامالارى جەڭىس تويىن تويلادى.
سپورتتىق ءبيدىڭ جۇپتىق باسەكەسىندە ءاۋ باستا كوش باستاعان رەسەيلىك دومنينا مەن شابالين قورىتىندى ەسەپتە ءۇشىنشى ساتىعا سىرعىپ ءتۇستى. كانادالىق ۆيرتيۋ مەن موير جانە امەريكالىق دەۆيس پەن ۋايت ولاردىڭ الدىن وراپ كەتتى. شاڭعىمەن تۇعىردان سەكىرۋدىڭ كوماندالىق سايىسىندا اۆستريا الدىنا جان سالعان جوق. گەرمانيا مەن نورۆەگيا ەكىنشى جانە ءۇشىنشى تۇعىردا.
شايبالى حوككەيدەن توپتىق باسەكەلەر ءوز مارەسىنە جەتتى. “ا” توبىندا اقش الدىنا جان سالمادى. امەريكالىقتار كانادا, شۆەيتساريا جانە نورۆەگيادان وزدى. “ۆ” توبىندا العاشقى ماتچتا رەسەيدىڭ باعى جاندى. ولار سلوۆاكيادان ۇتىلعانىمەن, لاتۆيا جانە چەحيا قۇرامالارىنان باسىم ءتۇستى. “س” توبىندا شۆەتسيا قۇراماسىنىڭ ايدارىنان جەل ەستى. ولار فينليانديا, بەلارۋس جانە گەرمانيانى تىزە بۇكتىردى.
ەرەجە بويىنشا ءار توپتا دارا شىققاندار جانە ەكىنشى ورىن العاندار اراسىندا ەڭ كوپ ۇپايعا يەلىك ەتكەن كوماندا شيرەك فينالعا بىردەن جولداما الدى. ولار – اقش, شۆەتسيا, رەسەي جانە فينليانديا. ال قالعاندارى ءوزارا باسەكەگە ءتۇسىپ, ءتورت جولداما ءۇشىن تالاسادى. بۇگىن شۆەيتساريا مەن بەلارۋس, چەحيا مەن لاتۆيا, سلوۆاكيا مەن نورۆەگيا جانە كانادا مەن گەرمانيا كەزدەسەدى. جەڭىمپازداردىڭ جولدارى شيرەك فينالدا توعىسادى. 26 مەن 27 اقپاندا جارتىلاي فينالدىق ماتچتار وتسە, جۇلدەگەرلەر مەن جەڭىمپاز كوماندا 28 اقپاندا انىقتالادى.
كوماندالىق سايىستا گەرمانيا اقش-تى قۋىپ جەتتى. قوس كوماندا جەتى التىننان ولجالاعانىمەن, العاشقىلاردىڭ كۇمىسى كوبىرەك. سونىڭ ناتيجەسىندە نەمىستەر العا شىقتى. كوش باسىنداعى قۇرامالاردان ءبىر التىن كەم العان نورۆەگيا ءۇشىنشى ساتىعا تابان تىرەدى. كانادا مەن شۆەيتساريانىڭ ءانۇرانى ۆانكۋۆەر كوگىندە بەس رەتتەن شىرقالدى. ءبىر كۇمىس مەدالدى يەلەنگەن قازاقستان قۇراماسى 24-ورىندا كەلەدى.
عالىم سۇلەيمەن,
ارنايى “ەگەمەن قازاقستان” ءۇشىن – ۆانكۋۆەردەن.