كەشە قايرات ءماميدىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى. كوميتەتتەر مەن سەنات اپپاراتىنا رەسپۋبليكا ۇكىمەتىنەن كەلىپ تۇسكەن زاڭ جوبالارى بەرىلدى, دەپ حابارلادى پارلامەنت سەناتىنىڭ ءباسپاسوز قىزمەتى.
اتاپ ايتقاندا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زاڭدى تۇلعالاردى مەملەكەتتىك تىركەۋ جانە فيليالدار مەن وكىلدىكتەردى ەسەپتىك تىركەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە بەرىلدى.
بيۋرودا سونداي-اق بيىلعى 28 جەلتوقساندا بولاتىن سەناتتىڭ كەزەكتى جالپى وتىرىسىنىڭ كۇن ءتارتىبى بويىنشا ۇسىنىستار قارالدى.
دەپۋتاتتار «تەلەراديو حابارلارىن تاراتۋ تۋرالى» زاڭ جوباسىن جانە قولدانىستاعى كەيبىر زاڭنامالىق اكتىلەرگە تەلەراديو حابارلارىن تاراتۋ ماسەلەلەرى بويىنشا وزگەرىستەر ەنگىزۋ تۋرالى زاڭ جوباسىن ءبىرىنشى وقىلىمدا تالقىلايتىن بولادى.
جالپى وتىرىستا «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭ جوباسى جانە قولدانىستاعى ءبىرقاتار زاڭنامالىق اكتىلەرگە ارناۋلى مەملەكەتتىك ورگاندارى ماسەلەلەرى بويىنشا وزگەرىستەر ەنگىزۋ تۋرالى زاڭ جوباسىن ءبىرىنشى وقىلىمدا قاراۋ كوزدەلىپ وتىر.
ودان باسقا وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق-اتقارۋ جۇيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا قاراۋ كوزدەلۋدە.
جالپى وتىرىستا قولدانىستاعى كەيبىر زاڭنامالىق اكتىلەرگە ەلىمىزدە قور نارىعىن دامىتۋ جانە ورمان شارۋاشىلىعى, جانۋارلار دۇنيەسى جانە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى ەكىنشى وقىلىمدا قارالادى.