الماتىلىق قولونەر شەبەرلەرى مەگاپوليستىڭ تۋعان كۇنىنە ارناپ تاماشا تارتۋ جاسادى. ەجەلدەن تىگىن ونەرى مەن زەرگەرلىكتىڭ ورداسى سانالعان الىپ شاھاردا ۇزىندىعى 10 900 مەتر بولاتىن قۇراق كورپە تىگىلدى. قالا كۇنىن مەرەكەلەۋ اياسىندا تۇڭعىش پرەزيدەنت ساياباعىنا جاعالاي توسەلگەن ادەمى ناقىشتاعى اسەم كورپەنى 200 شەبەر بەس اي بويى تىككەن. حالقىمىزدىڭ باي ءداستۇرى مەن ۇلتتىق ونەرىن تانىتاتىن قولونەر تۋىندىسىنا تاڭدانباۋ مۇمكىن ەمەس. قۇراق كورپە ءتۇرلى قانىق تۇستەرمەن كومكەرىلىپ, قازاقى ويۋ-ورنەكتەرمەن بەدەرلەنگەن.
توككەن تەر مەن تىنىمسىز ەڭبەك اقتالىپ, قولونەر تۋىندىسى جەر شارىنداعى ەڭ ۇزىن قۇراق كورپە رەتىندە گيننەستىڭ الەمدىك رەكوردتار كىتابىنا ەنىپ وتىر. الەمدەگى ەڭ ۇزىن كورپەنى بۇل تىزىمگە كىرگىزۋ ءۇشىن ونىڭ ساپاسىن تەكسەرۋگە ارنايى كەلگەن «گيننەس رەكوردتار كىتابى» باس كەڭسەسىنىڭ وكىلى دجونا برەنت حاس شەبەرلەردىڭ ۇجىمدىق ەڭبەگىن جوعارى باعالادى. «قازاقستاندىق قۇراق كورپەنى كورىپ, باعاسىن بەرۋ ءۇشىن قالا كۇنى مەرەكەسىنە ارنايى كەلدىك. بۇل شىنىمەن دە تاڭقالارلىق دۇنيە ەكەن. مۇنى دالەلدەيتىن رەسمي قۇجاتتى دا تابىستاپ وتىرمىز. ەندى قۇراق كورپە تىگۋدەن الەمدىك رەكورد جاڭاردى. تاباندىلىقتارى مەن ەرەكشە ونەرلەرى ءۇشىن قازاق شەبەرلەرىنە ايتار العىسىمىز زور», دەيدى ول.
مەرەكە اياسىندا ءدامى تاتقان جاننىڭ تاڭدايىندا قالاتىن الماتى الماسىنىڭ ءتۇر-ءتۇرى قويىلعان المالار جارمەڭكەسى دە شەتەلدىك قوناقتاردى ءتانتى ەتتى. جەرگىلىكتى ديقاندار قالا كۇنىنە ارناپ 100 توننا ءتاتتى جەمىس اكەلگەن. ەسكە سالساق, المانىڭ وتانى الماتىنىڭ 1002 جىلدىعى قالا كولەمىندە كەڭىنەن اتالىپ وتكەن بولاتىن.
ارمان وكتيابر,
«ەگەمەن قازاقستان»
الماتى