يكۋرۋ كۋۆادجيما: ماۋباستار گالەرەياسى

فوتوونەردەگى اۆتوپورترەت جانرىنىڭ ورنى ەرەكشە. ەسكە تۇسىرەيىكشى, مىسالى بۇقارالىق مادەنيەت پەن الەمدىك ونەر تاريحىن شەبەر ۇشتاستىرا بىلگەن ياسۋماسا موريمۋرانىڭ جۇمىستارى قانداي ەدى؟ نەمەسە الەۋمەتتىك نارازىلىعىن كوركەمدىك كامفۋلياج ادىسىمەن ءبىلدىرۋدى ءجون كورگەن «كورىنبەيتىن ادام» اتانىپ كەتكەن قىتاي سۋرەتشىسى ليۋ ءبوليننىڭ جۇمىستارى شە؟ ال جاپونيالىق يكۋرۋ كۋۆادجيما ءوزى ءتور دەپ تانىعان تۇسقا جانتايا كەتىپ, اتالعان ەكى ءتاسىلدى اۆتوپورترەت جانرىمەن ۇيلەستىرە وتىرىپ «وبلوموۆتاردىڭ» وتكەنى مەن بۇگىنىن جاڭا پريزمادان كورسەتۋگە تىرىسادى.

«قونىستانعان جۇرت تۇتاس قالاعا اينالۋعا شاق قالعان گوروحوۆ كوشەسىندەگى ەڭسەلى ۇيلەردىڭ بىرىندە تاڭەرتەڭ ءوز ءۇيى, ولەڭ توسەگىندە يليا يليچ وبلوموۆ جاتتى». وسىلاي باستالاتىن گونچاروۆتىڭ ايگىلى رومانىنىڭ العاشقى سويلەمى جاپون فوتوگرافى يكۋرۋ كۋۆادجيمانىڭ ۋاقىت پەن كەڭىستىكتى تۇتاستىرعان دەرەكتى ساياحاتىنا ۇلاستى. روماندا جاتىپ ىشەر ماسىل بولا تۇرا جاقسى ءومىر ءسۇرۋ سالتى مەن جايلى دا تىنىش ءومىر ءسۇرۋدى ارماندايتىن وبلوموۆتىڭ ديۆاننان تۇرۋعا مۇرشاسى كەلمەيتىن ەدى عوي. ءتىپتى قوجايىننىڭ قۋى دا, پاتەردى بوسات دەپ قورقىتۋى دا وعان شىبىن شاققان قۇرلى اسەر ەتپەيتىن. جوبانىڭ «مەن وبلوموۆپىن» اتالۋىنىڭ دا بار قۇپياسى وسىندا جاتسا كەرەك. گونچاروۆ بەينەلەگەن باس كەيىپكەر وبلوموۆپەن اۆتور ءوزىن بىلاي ۇقساستىرادى:

«مەن رە­سەيدە جانە وزگە دە پوستكەڭەستىك ەلدەردە 10 جىلدان استام ۋاقىت تۇرىپ كەلدىم. سوندا بايقاعانىم, مۇنداعى ۋاقىت اقش پەن جا­پونياعا قاراعاندا وتە باياۋ وتەدى. بوس ۋاقىتىمدى ۇيدە جاتىپ وتكىزەتىن كەزدەرىم كوپ بولدى. ال «مەن – وبلوموۆپىن» اتاۋى مەنىڭ جەكە باسىما سونشالىقتى قاتىستى دەپ ايتا المايمىن, ءتۇرلى ماعىنادا تۇسىندىرۋگە بولادى. بۇل ءوزى ابستراكتىلى ءارى ەكى جاقتى تۇسىنىك».

«مەن – وبلوموۆپىن» جوبا­سىنىڭ اۆتورى يكۋرۋ كۋۆادجيما دەرەكتى فوتوسۋرەتتەرى ارقىلى ءوزى قونىستانعان مەكەننىڭ تاۋ-تاسىنان باستاپ, سالت-ءداستۇرى, تۇرمىس-تىرشىلىگى تۋرالى كەڭىنەن تولعايدى. ۇقىپتى اۆتوپورترەتتەر سەرياسى ءتۇرلى گەوگرافيالىق ورىندارمەن عانا شەكتەلمەيدى, ءار الۋان كەڭىستىكتىڭ تورىندە ۇيىقتاپ جاتقان يكۋرۋ وبلو­موۆتىڭ بەينەسى ارقىلى جاڭا ءبىر مادەنيەتكە وزگە قىرىنان قاراۋعا شاقىرادى.

يكۋرۋ كۋۆادجيما Astana Art Show كورمەسىنە ارنايى شاقى­رىلىپ وتىرعان سىيلى قوناقتاردىڭ ءبىرى. دەگەنمەن يكۋ­رۋدىڭ بۇل استاناعا العاش كەلۋى ەمەس. بۇدان بۇرىن ال­ماتىدا, بالقاش ماڭايىندا, اق­تاۋدا, قاراعاندىدا, شىرايلى شىمكەنتتە دە بولعان. اۆتور­دىڭ اتالعان قالالارداعى ەڭ­سەلى ۇيلەردىڭ بىرىندە تاڭ­ەرتەڭ توسەكتەن تۇرماستان سۋ­رەتكە تۇس­كەن پورترەتتىك سۋ­رەت­تەرى الۋان جايتتان سىر شەر­تەدى.

– ماعان قازاقستان ەرەكشە ۇنادى, ءتىپتى الىستا جۇرسەم ساعىناتىن كۇيگە جەتتىم. جال­پى, كەز كەلگەن جەرگە بار­عاندا كورنەكى ورىنداردان, اسىرەسە تۋريستەرگە ارنالعان جىل­­تى­راق ورىنداردان قاشىق جۇ­رەمىن. ودان دا جەرگىلىكتى تۇر­عىنداردىڭ شىنايى پىكىرىن بىلگەن قىزىعىراق, – دەيدى فو­توسۋرەتشى.

يكۋرۋ كۋۆادجيما اقش-تاعى ميسسۋري ۋنيۆەرسيتەتىندە جۋرناليستيكا ماماندىعىندا ءبىلىم العان. سودان دا بولار, ونىڭ كەز كەلگەن ۆيزۋالدى تۋىندىلارىندا جۋرناليستيكا ەلەمەنتتەرى ايقىن كورىنىپ تۇرادى.

ايا ءومىرتاي,

«ەگەمەن قازاقستان»