«قىزىلجار وڭىرىندە قاتتى وتىن تاپشىلىعى ورىن الىپ وتىر, كومىر باعاسى ءوسىپ كەتىپتى» دەگەن الىپقاشپا ءسوزدىڭ شىندىققا جاناسپايتىنىن وبلىستىق ەنەرگەتيكا, تۇرعىن ءۇي جانە كوممۋنالدىق شارۋاشىلىق باسقارماسىنىڭ باسشىسى ادىلبەك اۋباكىروۆ جوققا شىعاردى.
ول باق وكىلدەرىنە بەرگەن تۇسىنىكتەمەسىندە مۇنداي ولقىلىقتار بىلتىر ورىن السا, بيىل كۇنى بۇرىن قام جاساۋدىڭ ارقاسىندا الەۋمەتتىك نىساندار قاجەتتى 146 مىڭ توننا كومىرمەن قامتاماسىز ەتىلگەنىن جەتكىزدى. قازىر 34 تەمىر جول تۇيىعىندا 60 مىڭ توننادان استام كومىر جيناقتالعان. № 2 پەتروپاۆل جىلۋ ەلەكتر ستانساسىندا 175 مىڭ توننا قارا وتىن, 664 توننا مازۋت قورى بار. وبلىس تۇرعىندارى قىسقى ماۋسىم كەزىندە ورتاشا ەسەپپەن 384 مىڭ توننا كومىر تۇتىنسا, بۇگىندە بۇل كولەمنىڭ جارتىسىنا جۋىعى جەتكىزىلدى.
كەن ورىندارىنان كومىر جەتكىزۋمەن جەرگىلىكتى 4 فيرما اينالىساتىندىقتان, باعادا ايتارلىقتاي ايىرماشىلىق جوق. تەمىر جول تاسىمالىنىڭ باعاسى ەكى رەت كوتەرىلۋىنە بايلانىستى از-كەم قىمباتتاعانىمەن قولجەتىمدى. «تۋردىوگلى» جەكە كاسىپكەرلىگىنىڭ مەنەدجەرى مۇراتحان تۇرماعامبەتوۆتىڭ ايتۋىنشا, ەكىباستۇز كومىرىنىڭ ءبىر تونناسى – 8600, مايكوبەنىكى – 12200, شۇباركولدىكى 13950 تەڭگە تۇرادى. «سوڭعى سۇرىپقا سۇرانىستىڭ جوعارى ەكەنىن ەسكەرىپ, ونىڭ اي سايىنعى مولشەرىن 8 مىڭ تونناعا دەيىن وسىرەتىن بولامىز. قازىر 4 مىڭ تونناسى اكەلىنىپ, كۇنىنە 200-350 توننادايى ساۋدالانادى. بۇعان كومىر تيەلگەن 14 ۆاگوندى, ال قىركۇيەكتە كەستە بويىنشا 70, قاراشادا 120 ۆاگون كومىر جەتكىزىلەتىنىن قوسساق, قىستان قىسىلماي شىعاتىنىمىز انىق», دەيدى م.تۇرماعامبەتوۆ.
بۇدان تىسقارى «ۋگول نورد», «وتىن LTD» سەرىكتەستىكتەرىنىڭ قويمالارىندا 10 مىڭ توننا كومىر ەش كەدەرگىسىز ساتىلۋدا. بۇدان ءبىر توننا كومىردىڭ باعاسى 17 مىڭ تەڭگەگە دەيىن كوتەرىلدى دەگەن ءسوزدىڭ اقيقات اۋىلىنان الىس ەكەنىن باعامداۋعا بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى