پارلامەنت سەناتىندا «بىرىڭعاي جيناقتاۋشى زەينەتاقى قورى» اكتسيونەرلىك قوعامىنىڭ باسشىلىعىمەن كەزدەسۋ بولدى, دەپ حابارلايدى قر پارلامەنتى سەناتىنىڭ ءباسپاسوز قىزمەتى.
الەۋمەتتىك-مادەني دامۋ جانە عىلىم كوميتەتىنىڭ توراعاسى بىرعانىم ءايتىموۆا ءوز سوزىندە كوپتەگەن مەملەكەتتەر قوعامداعى دەموگرافيالىق قۇرىلىمنىڭ وزگەرىستەرىنە بايلانىستى زەينەتاقى سالاسىنداعى وزەكتى ماسەلەلەرگە تاپ بولىپ وتىرعانىن اتاپ ءوتتى. ءبىزدىڭ ەلىمىز دە بۇل كۇردەلى ماسەلەدەن اينالىپ وتە المايتىنى اقيقات. سەناتور كەيىنگى كەزدە جۇرتشىلىق پەن بۇقارالىق اقپارات قۇرالدارى زەينەتاقى جارنالارى تولەۋ ماسەلەلەرىنە ءجيى نازار اۋدارىپ وتىرعانى تۋرالى ايتتى.
ب.ءايتىموۆانىڭ ايتۋىنشا, كەزدەسۋدىڭ ماقساتى – قازاقستان ازاماتتارىن الاڭداتىپ وتىرعان زەينەتاقىمەن قامسىزداندىرۋ ماسەلەلەرىن بىرلەسىپ تالقىلاۋ جانە زەينەتاقى جۇيەسىن بولاشاقتا دامىتۋدىڭ كەلەشەگىن قاراستىرۋ بولىپ تابىلادى.
«بجزق» اكتسيونەرلىك قوعامىنىڭ باسقارما توراعاسى ءنۇربۇبى ناۋرىزباەۆا ءوز بايانداماسىندا قوردىڭ قىزمەتى مەن جيناقتاۋشى زەينەتاقى جۇيەسىندەگى وزگەرىستەر تۋرالى دەپۋتاتتاردى حاباردار ەتتى. اتاپ ايتقاندا, قازىر مەملەكەتتىك بيۋدجەت تولەمدەرى باسىم بولسا, بولاشاقتاعى زەينەتاقىمەن قامسىزداندىرۋ جۇيەسى بويىنشا جەكە زەينەتاقى جيناقتارى ۇلەسى ۇلاياتىنى ايتىلدى. ماسەلەن, قازىر 2017 جىلدىڭ قورىتىندىسى بويىنشا بارلىق تولەمدەر 12 پايىزدى قۇراسا, 2050 جىلعا قاراي تولەمدەر ۇلەسى 46 پايىزعا دەيىن وسەتىن بولادى.
بجزق دەرەكتەرى بويىنشا, زەينەتاقى جيناقتارىنىڭ جىلدىق ورتاشا ءوسىمى شامامەن 20 پايىزدى قۇرايدى. ەلىمىزدىڭ جالپى ىشكى ءونىمى مەن زەينەتاقى جيناق سوماسىنىڭ قاتىناسى جىلدان جىلعا ءوسىپ كەلەدى. بجزق قۇرىلعان ساتتەن باستاپ بۇل كورسەتكىش وتكەن جىلى ءبىر جارىم ەسەگە (10-نان 15 پايىزعا دەيىن) ارتتى. وسى جىلدىڭ 1 شىلدەدەگى جاعداي بويىنشا, زەينەتاقى جيناعىنىڭ كولەمى 8,4 ترلن تەڭگەگە جەتتى, ونىڭ 63 پايىزى سالىنعان جارنالاردىڭ ەسەبىنەن, ال 37 پايىزى ينۆەستيتسيالىق تابىس ەسەبىنەن قۇرالدى.
ن.ناۋرىزباەۆا اتاپ وتكەندەي, 2017 جىل مەن 2018 جىلدىڭ ءبىرىنشى جارتى جىلدىعىنىڭ قورىتىندىلارى بويىنشا, زەينەتاقى اكتيۆتەرىنىڭ كىرىسى ينفلياتسيا دەڭگەيىنەن اسىپ وتىر. جالپى العاندا, جيناقتاۋشى زەينەتاقى جۇيەسىنىڭ بارلىق كەزەڭىندە جيناقتالعان كىرىس دەڭگەيى 481,1 پايىزدى قۇراپ, جيناقتالعان ينفلياتسيا دەڭگەيىنەن (474.2 پايىز) استى.
2017-2021 جىلدارداعى بجزق دامۋىنىڭ باستى ماقساتتارى بىلايشا بەلگىلەندى:
- زەينەتاقى جونىندەگى قىزمەتتەردى ساپالى كورسەتۋ;
- حالىق اراسىندا زەينەتاقى جوسپارلاۋ مادەنيەتىن دامىتۋ;
- جيناقتاۋشى زەينەتاقى جۇيەسىن ودان ءارى دامىتۋ باعىتتارى بويىنشا زاڭنامالىق باستامالاردى جۇزەگە اسىرۋ.
ن.ناۋرىزباەۆا وسى سالالاردىڭ ارقايسىسى بويىنشا جۇرگىزىلىپ جاتقان جۇمىستار تۋرالى پارلامەنتشىلەرگە اڭگىمەلەپ بەردى.
سەنات دەپۋتاتتارى مۇرات باقتيار ۇلى, ناريمان تورەعاليەۆ, سەرىك بەكتۇرعانوۆ, ولگا پەرەپەچينا, سەرگەي ەرشوۆ, دينار نوكەتاەۆا, نۇرلان قىلىشباەۆ ساۋالدار قويىپ, زەينەتاقى جارنالارىن قورعاۋ, جيناقتاۋشى زەينەتاقى جۇيەسىنىڭ ءتيىمدى جۇمىس ىستەۋى, سونداي-اق زەينەتاقىمەن قامتاماسىز ەتۋ ماسەلەلەرى جونىندەگى زاڭنامانى ودان ءارى جەتىلدىرۋ قاجەتتىگى تۋرالى بىرقاتار ۇسىنىستار ايتتى:
تالقىلاۋعا ۇلتتىق بانكى, ەڭبەك جانە حالىقتى الەۋمەتتىك قورعاۋ, قارجى مينيسترلىكتەرىنىڭ وكىلدەرى, سونداي-اق تاۋەلسىز ساراپشىلار قاتىستى.