قوس كورەيا كەلىسسوز جۇرگىزەدى

بۇل ساپار بارىسىندا كورەي تۇبەگىنىڭ تاعدىرىنا قاتىستى كۇردەلى ماسەلەنىڭ ءبىرى تۇبەكتى يادرولىق قارۋدان ارىلتۋ, ەكى ەلدىڭ بىرىگۋى, ساۋدا جانە ەكونوميكالىق ىنتىماقتاستىق, ديپلوماتيالىق قارىم-قاتىناس, اسكەري تەكەتىرەستى جۇمسارتۋ, تۇبەكتىڭ قاۋىپسىزدىك ماسەلەسى, ۇستىمىزدەگى جىلدىڭ 27 ءساۋىر كۇنى جاريالانعان «پانمۋنچجوم دەكلاراتسياسىن» جۇزەگە اسىرۋ جاعدايى جانە امەريكا جانە سولتۇستىك كورەيا ليدەرلەرىنىڭ جوسپارلى ساپارى, «ۆاشينگتون, پحەنيان, سەۋل» ۇشجاقتى كەلىسسوز مۇمكىندىگى, 1950-53 جىلى كورەي سوعىسى سالدارىنان ءۇزىلىپ قالعان تەمىر جول, ءىرى تاس جولداردى جانداندىرىپ قوسۋ, ورمان مەن سۋ رەسۋرس­تارىن پايدالانۋ, مادەنيەت پەن سپورت سالاسىنداعى الماسۋ مەن بايلانىستاردى دامىتۋ جۇمىستارى تالقىلانادى. وسى ەكى ءتۇن, 3 كۇندىك ساپار كەزىندە ەكى­­ جاق ۇكىمەتتىك تولىق جانە شاعىن قۇرا­م­دا باس قوسىپ, بىرقاتار سالالاردى قام­تي­تىن كەلىسسوزدەردى جۇرگىزبەك. بۇل ساپار­عا ەكى ەلدىڭ ۇكىمەتى جان-جاقتى جانە تىڭعى­لىقتى دايىندالدى.

وتكەن جەكسەنبى كۇنى, سەۋل قالاسىنىڭ جەرگىلىكتى ۋاقىتىمەن ساعات كۇندىزگى 3-تە وڭتۇستىك كورەي ۇكىمەتى الداعى سەيسەنبى كۇنى سولتۇستىك كورەياعا پرەزيدەنت­پەن بىرگە باراتىن دەلەگاتسيا قۇرامىمەن رەسمي تۇردە تانىستىردى. تولىق ءتىزىمدى بۇقارالىق اقپارات قۇرالدارى ارقىلى جاريالادى. دەلەگاتسيا قۇرامىنا 66 ادام كىردى. ءبارى دەرلىك ءتۇرلى سالانىڭ تىسقاققان بىلىكتى ماماندارى. ناقتىلاي ايتقاندا, دەلەگاتسيا قۇرامىندا پرەزيدەنت اكىمشىلىگىنىڭ ادامدارى, سىرتقى ىستەر ءمينيسترى, بىرىگۋ ىستەرى جونىن­دەگى ءمينيسترى, قورعانىس ءمينيسترى جانە لاۋازىمدى ەلشىلەر مەن ديپلوماتتار, قاۋىپسىزدىك جانە اسكەري سالانىڭ ماماندارى بار. ودان باسقا, پارلامەنتتىڭ توراعاسى, ىقپالدى دەپۋتاتتار, بيلىك پارتياسى – «توبۋرو ميندجچۋدان» جانە باسقا دا پارتيا وكىلدەرى دە بارادى. سونىمەن قاتار بيزنەس ورتادان ارنايى سامسۋنگ كوورپوراتسياسى كوشباس­شى­سى­نىڭ ءبىرى لي چجە يون مەن كورەي ەلى­نىڭ ءىرى بيزنەسمەندەرى تىزىمگە ارنايى كىر­گىزىلدى. ولاردىڭ بۇل ساپارعا ارنايى ىلە­سىپ بارۋى – ەكى ەل­دىڭ اراسىنداعى كەلە­شەك­­تەگى جۇزەگە اسىر­ماق كەڭ اۋقىمدى ەكونو­مي­كالىق, ينۆەس­تي­تسيالىق جانە ساۋ­دا جوبالارىنا قاتىس­تىرىلۋىنا تىكە­لەي بايلانىس­تى. بۇلاردان وزگە, مادە­نيەت, عىلىم, جاستار ءىسى كوميتەتى, ءدىن جانە ونەر سالاسىنىڭ وكىلدەرى, تانىمال عالىم, اقىن-جازۋشىلار, جۋرناليس­تەر مەن اۋدارماشىلار دا باراتىندىعى بەلگىلى بولدى. كورەي ەلىندەگى بىرقاتار ءىرى دىندەردىڭ وكىلدەرى دە تىزىمگە قوسىلدى. تەك يسلام ءدىنىنىڭ وكىلدەرى قالىس قالدى. حالىقارالىق كەلىسسوزدەر جونىندەگى مامانداردىڭ ايتۋىنشا, «وسى كەزدەسۋ­دىڭ ناتيجەسىنەن كەيىن سولتۇستىك كورەيا مەن امەريكانىڭ اراسىنداعى ارنايى ساپارلار جۇزەگە اسىرىلادى جانە ەكى ەلدىڭ اراسىنداعى بايلانىستار بىر­قاتار جاقسارىپ, تۇبەكتەگى بەيبىتشىلىكتىڭ تۇرا­ق­تىلىعى مەن تۇبەكتى يادرولىق قارۋ­سىز­داندىرۋ ءىسىنىڭ بولاشاق باعىتى مەن ناقتى ءىس-شارالارى انىقتالادى», دەگەن بولجامدار ايتىلۋدا. وڭتۇستىك كورەيا حالقى وسى ساپار مەن سامميتكە ۇلكەن سەنىم مەن ءۇمىت ارتىپ وتىر.

     ​​​​​داستان اقاش,

ارنايى «ەگەمەن قازاقستان» ءۇشىن

وڭتۇستىك كورەيا,

سەۋل قالاسى