قازاقستان جاستارىنىڭ كونگرەسى «رۋحاني جاڭعىرۋ» جوباسى اياسىندا ەلىمىزدەگى ەڭ بەلسەندى جاستار اراسىنان الدىڭعى قاتارلى 7 ازاماتتى انىقتاماق. ۇيىمداستىرۋشىلار بۇل جونىندە «قازمەديا» ورتالىعىندا وتكەن بريفينگتە مالىمدەپ, جاستاردى شاراعا بەلسەندى قاتىسۋعا شاقىردى.
كونگرەسس جاستارى اقپارات جانە كوممۋنيكاتسيالار, سونداي-اق قوعامدىق دامۋ مينيسترلىكتەرىمەن بىرلەسە وتىرىپ جاريالاعان جاڭا جوبا «7 jalyn» اتاۋىمەن جۇزەگە اسادى. ونىڭ ماقساتى – قازاقستان بويىنشا تابىستى, باسەكەگە قابىلەتتى, ءبىلىم كۋلتىن ناسيحاتتاپ جۇرگەن 18 بەن 29 جاس ارالىعىنداعى 7 جاستى ىرىكتەپ, ولاردىڭ قوعام دامۋىنا قوسقان ۇلەسىن ۇلگى ەتۋ. ىرىكتەۋ 17 قىركۇيەك پەن 15 قازان ارالىعىندا وتكىزىلەدى.
بريفينگكە ءماجىلىس دەپۋتاتى گەننادي شيپوۆسكيح, قوعامدىق دامۋ مينيسترلىگى جاستار جانە وتباسى كوميتەتى توراعاسىنىڭ مىندەتىن اتقارۋشى اسحات ورالوۆ, «قازاقستان جاستارى كونگرەسى» اتقارۋشى ديرەكتورى توقتار بولىسوۆ, قوعام قايراتكەرى باقىت سىزدىقوۆا, «قازاقستاننىڭ 100 جاڭا ەسىمى» جوباسىنىڭ بىلتىرعى جەڭىمپازى ەرنۇر رىسماعانبەتوۆ, «Qazaqstan» تەلەارناسىنىڭ جۇرگىزۋشىسى يرينا تەن جانە رەسپۋبليكالىق جاستار ۇيىمدارىنىڭ باسشىلارى قاتىستى.
«7 jalyn» بەس كەزەڭنەن تۇرادى. جوبا 17 قىركۇيەك كۇنى باستالىپ, وعان 30 قىركۇيەككە دەيىن ءوتىنىم قابىلدانادى. ءوتىنىشتى جاستار ۇيىمدارى, جاستار رەسۋرستىق ورتالىقتارى, ۇكىمەتتىك ەمەس ۇيىمدار جانە ءوز اتىنان بەلسەندى جاستار جىبەرە الادى. ولار 1-5 قازان ارالىعىندا قاراستىرىلىپ, 15 قازاندا جەڭىمپازدار رەسمي تۇردە جاريالانادى. ىرىكتەلگەن 7 جالىندى جەڭىمپاز «قازاقستان جاستارىنىڭ كونگرەسى» اتىنان «قازاقستاننىڭ 100 جاڭا ەسىمى» جوباسىنا ۇسىنىلماق.
ۆەنەرا تۇگەلباي,
«ەگەمەن قازاقستان»