ەلىمىزدىڭ باستى بايلىعى – ادام
«نۇر وتان» پارتياسىنىڭ XIV سەزىندە الداعى ءماجىلىس سايلاۋىندا تۇعىرناما رەتىندە «قازاقستان. 2017 ماقساتتارى. ۇلتتىق ءىس-قيمىل جوسپارى» جاريا ەتىلگەن بولاتىن. پارتيا پرەزيدەنتتىڭ «قازاقستان-2020» ستراتەگيالىق جوسپارىن جۇزەگە اسىرۋدىڭ ساياسي كەپىلى بولىپ تابىلادى. قۇجاتتا «ءبىز ەلىمىزدىڭ باستى بايلىعى – ادام, ونىڭ ءبىلىمى, مۇمكىندىكتەرى, دەنساۋلىعى مەن يگىلىگى ەكەندىگىنە تولىق سەنىمدىمىز», – دەپ اتاپ كورسەتىلگەن.
كەشە قوستانايدا وتكەن كەزدەسۋدە ەكونوميكا, الەۋمەتتىك قامتاماسىز ەتۋ, ەڭبەكپەن قامتۋ جانە ءبىلىم بەرۋ ماسەلەلەرى ءسوز بولدى. قازاقستانداعى ءىرى كونديتەرلىك فابريكا – «بايان سۇلۋدا» پرەزيدەنتىمىزدىڭ يندۋستريالاندىرۋ باعدارلاماسى بويىنشا جاڭا جوبا ىسكە قوسىلدى. ءوندىرىستى جاڭارتۋ جانە دامىتۋ – بولاشاقتاعى تابىستى جۇمىستىڭ كەپىلى. سوندىقتان ءبىزدىڭ ۇجىم ەلباسىن جانە ول باسقارىپ وتىرعان پارتيانىڭ ساياساتىن ءبىراۋىزدان قولدايدى, دەدى كونديتەرلىكتەر.
ءوزىنىڭ سايلاۋالدى باعدارلاماسىن نۇروتاندىقتار سونداي-اق رۋدنىي قالاسىنداعى قارتتار ءۇيى مەن مۇگەدەكتەر ۇيىندە تۇرىپ جاتقاندارعا تانىستىردى. مۇمكىندىگى شەكتەۋلى جاندار – قوعامنىڭ تولىققاندى مۇشەلەرى. ولار دا ەڭبەك ەتىپ, لايىقتى ءومىر ءسۇرىپ, ءتيىستى ەمدىك شارالاردى الۋعا ءتيىس, دەپ سانايدى كەزدەسۋگە قاتىسۋشىلار. ال الەۋمەتتىك ماسەلەلەر – «نۇر وتان» پارتياسىنىڭ باسىم باعىتتارىنىڭ ءبىرى.
– «نۇر وتان» – بىزگە, مۇگەدەكتەرگە كومەكتەسىپ وتىرعان جالعىز پارتيا. سوندىقتان ءبىز «نۇر وتاننىڭ» جەڭىسى ءۇشىن داۋىس بەرەمىز! – دەدى «دوس» تاۋەلسىز ءومىر» ورتالىعى» مۇگەدەكتەر قوعامىنىڭ ءتورايىمى دينا ەردىلدىنوۆا.
سوكولوۆ-سارىباي تاۋ-كەن بايىتۋ كومبيناتىنىڭ ۇجىمى 15 قاڭتاردا وتەتىن سايلاۋدا «نۇر وتاندى», ەل پرەزيدەنتى, پارتيا توراعاسى نۇرسۇلتان نازارباەۆ جۇرگىزىپ وتىرعان ساياساتتى قولدايتىنىن جاريا ەتتى. سوكولوۆ-سارىباي تاۋ-كەن بايىتۋ ۇيىمىنىڭ ءوندىرىسىن ساقتاپ قالۋ, جاڭعىرتۋ جانە ودان ءارى دامىتۋ تەك قانا مەملەكەتتىڭ كورسەتىپ وتىرعان قولداۋى مەن ەكونوميكاداعى ۇلكەن رەفورمالاردىڭ ارقاسىندا مۇمكىن بولعانىن كومبينات ۇجىمى جاقسى تۇسىنەدى.
ءنازيرا جارىمبەتوۆا,
قوستاناي وبلىسى.
پاتريوتتار جاستارعا سەنىم ارتادى
بۇل جولى پاتريوتتىقتار فۋتبولدان جارىس وتكىزدى. اتالعان شارانى پارتيا بەلسەندىلەرى جاستار اراسىندا سالاماتتى ءومىر سالتىن قالىپتاستىرۋ ماقساتىندا ۇيىمداستىرعاندىقتارىن ايتادى. پارتيانىڭ سايلاۋالدى تۇعىرناماسىندا جاستارعا ەرەكشە ماڭىز بەرىلگەن. جاستار – ەلىمىزدىڭ بولاشاعى, سوندىقتان دا جاستاردىڭ دا كەلەشەگىن ويلاۋ بارشامىز ءۇشىن پارىز, دەيدى ولار. ال اتالعان جارىس دوداسىنا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كومانداسى, س.سەيفۋللين اتىنداعى اگرارلىق ۋنيۆەرسيتەت شاكىرتتەرى, استانا قالالىق فۋتبول كلۋبىنىڭ تەڭبىل دوپ شەبەرلەرى جانە وزگەلەر دە قاتىسىپتى. ءبىرىنشى ورىندى استانا قالالىق فۋتبول كومانداسى يەلەنسە, ەكىنشى ورىن «شىعىس» اۋلا فۋتبول كلۋبى تەڭبىل دوپ شەبەرلەرىنە بۇيىرعان. ءۇشىنشى ورىندى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جاس كومانداسى قانجىعالارىنا بايلاعان. ويىن قورىتىندىسى بويىنشا استانا فۋتبول كلۋبىنىڭ ويىنشىسى ەرجان مۇحامەدين ەڭ ۇزدىك فۋتبولشى دەپ تانىلىپتى.
قازاقستان پاتريوتتارى پارتياسى سايلاۋالدى شتابى باسشىسىنىڭ ورىنباسارى جانمۇرات سىراجيدەننىڭ سوزىنە قاراعاندا, ەگەر پارتيا سايلاۋدا جەڭىسكە جەتەتىن بولسا, وندا ەڭ الدىمەن جاستار ساياساتىن قايتا قاراۋ باستاماسىن كوتەرەدى. ياعني, جاستار ەلىمىزدىڭ قوعامدىق, سپورتتىق جانە الەۋمەتتىك ومىرىنە بەلسەنە ارالاسا باستايتىن بولادى. سوندىقتان دا پارتيا جاستاردىڭ اراسىنداعى تالانتتى دەگەندەرىن قولداپ, بارىنشا قولداۋ كورسەتۋگە ءازىر. ءويتكەنى, اسەرلى وتكەن ويىن بارىسى كورسەتكەندەي, جاستارىمىز جەڭىسكە دەگەن ۇمتىلىستارىمەن دە ەرتەڭگە دەگەن سەنىمدى ۇيالاتىپ وتىر. ونىڭ ۇستىنە جاستار تەك وزدەرىنىڭ شەبەرلىكتەرىن عانا كورسەتىپ قويماي, ۇيىمشىل ەكەندىكتەرىن, ءبىر-بىرىنە قولداۋ بولاتىن ۇجىمشىل ەكەندىكتەرىن دە تانىتا بىلگەن.
– مەن جاقسى اسەر الدىم, – دەي كەلىپ, ج.سىراجيدەن جاستاردىڭ بەلسەندىلىگىن ارتتىرۋ ءۇشىن اۋلاىشىلىك كلۋبتاردىڭ جۇمىسىن جانداندىرعان ءجون دەگەندى دە ەرەكشە ايتىپ كەتتى. ەگەر اۋلالىق كلۋبتارعا جان-جاقتى قولداۋ كورسەتىلسە, وندا جاستاردىڭ جامان ىستەردەن اۋلاق بولۋىنا يگى ىقپالى تيەر ەدى.
اسقار تۇراپباي ۇلى.
جۇرگەنوۆتەگى جۇزدەسۋ
الماتى قالاسىندا, ت.جۇرگەنوۆ اتىنداعى ونەر اكادەمياسىنىڭ ءماسليحات زالىندا «رۋحانيات» پارتياسى وقۋ ورنىنىڭ ستۋدەنتتەرىمەن جانە وقىتۋشىلار قۇرامىمەن كەزدەcتى. كەزدەسۋگە «رۋحانيات» پارتياسىنىڭ اتىنان پارلامەنت ءماجىلىسىنىڭ دەپۋتاتتىعىنان ءۇمىتكەر ەركىن راقىشەۆ پەن مەرەكە قۇلكەنوۆ كەلدى. جيىن بارىسىندا «رۋحانيات» پارتياسىنىڭ العا قويعان ماقساتتارى ايتىلىپ, ەگەر ۇمىتكەرلەر دەپۋتاتتىققا وتەتىن بولسا, وندا قاراپايىم حالىقتىڭ مۇددەسى ءۇشىن, ياعني تۇرمىسى ناشار وتباسىلارعا كومەك بەرۋ, ستۋدەنتتەر مەن جاستارعا قولداۋ كورسەتۋ, ءمۇگەدەك ادامدارعا جاردەم بەرۋ جانە باسقا دا يگى ىستەر باعىتىندا جۇمىس ءىستەيتىندىكتەرىن جەتكىزدى. پارتيا وكىلدەرى ەڭ الدىمەن جازىلعان زاڭداردىڭ تەك قاعاز جۇزىندە ەمەس, ءىس جۇزىندە ىسكە اسۋىن قاداعالايتىندارىن ايتتى.
بۇدان وزگە, الداعى سايلاۋدا باق سىنايتىن ۇمىتكەرلەر ەلدەگى بارلىق ەتنوستىق توپ وكىلدەرىنىڭ تەڭ قۇقىعىن ساقتاي وتىرىپ, ەلىمىزدىڭ تاۋەلسىزدىگى مەن ەگەمەندىگىنە قاۋىپ توندىرەتىن كەز كەلگەن ۇدەرىستەرگە توسقاۋىل بولۋ جانە مەملەكەتتىك ءتىل مەن رۋحاني بىرلىكتى ساقتاي وتىرىپ, مىعىم مەملەكەت قالىپتاستىرۋ مىندەتىنە ءاربىر قازاقستاندىقتىڭ ۇلەس قوسۋى, سول جولدا ەڭبەكتەنۋى قاجەتتىگىن اتاپ كورسەتتى.
رۋحانياتتىقتار ءبىلىم بەرۋ, سونىڭ ىشىندە جوعارى ءبىلىم بەرۋ جۇيەسىندە ءالى دە رەفورمالار جاساۋدى, ۇلتتىق عىلىم اكادەمياسىن قالپىنا كەلتىرىپ, ۇدەمەلى يندۋستريالىق-يننوۆاتسيالىق باعدارلامانى قايتا قاراۋ ارقىلى ورتا جانە جوعارى ءبىلىمنىڭ, عىلىمنىڭ مەملەكەت پەن قوعام ومىرىندە قارىشتى دامۋىنا جول اشۋ, عىلىم جەتىستىكتەرىن وندىرىسكە ەنگىزۋ ىسىندە شىن مانىندە الەمدەگى وزىق تاجىريبەنى تولىق ەسكەرگەن جاڭا باعدارلاما قابىلداۋ سەكىلدى پارتيا باعدارلاماسىندا كورسەتىلگەن بىرقاتار ماسەلەلەر تۋراسىندا جاستارمەن وي ءبولىستى. ەل ەرتەڭىن ساۋاتتى مامانمەن قامتاماسىز ەتۋ ءۇشىن بۇگىنگى ستۋدەنت جاستاردى جاتاقحانا-پاتەرمەن قامتاماسىز ەتۋ ارقىلى ولاردىڭ تولىققاندى ءبىلىم الۋىن, وتباسىن قۇرىپ, جۇمىسقا ورنالاسۋىن جانە ءوسىپ-ءونۋىن قامتاماسىز ەتەتىن ارنايى مەملەكەتتىك «جاستار» باعدارلاماسىن قابىلداۋ قاجەتتىگىن دە تىلگە تيەك ەتتى.
سونداي-اق, ستۋدەنتتەر تاراپىنان سۇراقتار قويىلىپ, ءار سۇراق ءوز جاۋابىن تاپتى دەۋگە بولادى.
قانات ەسكەندىر,
الماتى.
اقجولدىقتار التايدا بولدى
دۇيسەنبى كۇنى پارتيا توراعاسى ازات پەرۋاشەۆ باستاعان «اق جول» قدپ-نىڭ ۇگىت-ناسيحات توبى وسكەمەن قالاسىنا كەلدى. ءور التايدىڭ تورىنە اياق باسقان پارتيا بەلسەندىلەرى مەملەكەتتىك ساياساتتىڭ باستى ماقساتى تۇرعىنداردىڭ ءال-اۋقاتىن ۇزدىكسىز ارتتىرىپ وتىرۋ ەكەنىن اتاپ كورسەتتى.
كەشە ۇگىت-ناسيحات توبى ەلىمىزدىڭ تۇڭعىش اۆتوكولىك ءوندىرىسى – «ازيااۆتو» كولىك قۇراستىرۋ زاۋىتىنا كەلىپ, ۇجىم جۇمىسشىلارىمەن كەزدەسىپ, ەمەن-جارقىن اڭگىمەلەستى. زاۋىتتىڭ كونۆەيەرىندەگى شىعارىلىپ جاتقان اۆتوكولىكتەردىڭ ساپاسىنا جەتە نازار اۋداردى.
«ازيااۆتونىڭ» پرەزيدەنتى ەرجان مانديەۆ «اق جول» پارتياسى اتىنان پارلامەنت ءماجىلىسىنىڭ دەپۋتاتتىعىنا ۇمىتكەر بولىپ تىركەلگەن. ازات پەرۋاشەۆ زاۋىت جۇمىسشىلارىمەن كەزدەسۋدە پارتيانىڭ باعدارلاماسىمەن تانىستىردى.
– سوڭعى كەزدە «اق جول» پارتياسىنا كىرگەندەردىڭ كوپشىلىگى جاستار. جاستار – بولاشاعىمىز, تىرەگىمىز. شىرايلى شىعىستا دا پارتيا قاتارىنا جاستار كوپتەپ ءوتىپ جاتىر. وعان قۋانامىز. «اق جولدىڭ» كاسىپكەرلىكتى دامىتۋ تۋرالى ۇسىنىستارى, تۇتاستاي العاندا, ەل ەكونوميكاسى دامۋىنىڭ جاھاندىق جەتىستىكتەرىنە جاستاردىڭ ءوز ۇلەستەرىن قوسۋ بويىنشا ىنتالاندىرۋ بولىپ تابىلادى. ەندەشە, زاۋىت جۇمىسشىلارى سايلاۋ كۇنى ءبىزدى قولدايدى دەگەن نيەتتەمىن, – دەدى پارتيا توراعاسى.
سول كۇنى تۇستەن كەيىن پارتيا بەلسەندىلەرى «شاينە ريۆەر» قوناق ءۇيىنىڭ كونفەرەنتس زالىندا جەرگىلىكتى كاسىپكەرلەرمەن دوڭگەلەك ۇستەل جيىنىن ءوتكىزدى. جيىندى اشقان پارتيا ءتوراعاسى الداعى تۇرعان مىندەتتەرگە توقتالىپ, ەلباسىنىڭ قازاقستان ءتاۋەلسىزدىگىنىڭ 20 جىلدىعى مەرەكەسىندە سويلەگەن ءسوزدەرىنەن ءۇزىندى كەلتىرە كەلىپ, كاسىپكەرلىكتى دامىتۋ ءماسەلەلەرىن ورتاعا سالدى. «شىرايلى شىعىستا كاسىپكەرلىك دامىپ كەلەدى, بىراق اۋىلدىق جەرلەردەگى كاسىپكەرلىك باياۋ العا جىلجۋدا», دەدى ا.پەرۋاشەۆ.
كەشكىسىن مەتاللۋرگتەردىڭ مادەنيەت ۇيىندە كوڭىلدى تاپقىشتار كلۋبىنىڭ باسەكەسى ءوتتى. وعان پارتيا بەلسەندىلەرى قاتىسىپ, ءماجىلىس دەپۋتاتتىعىنا كانديدات كۇمىس كومەي ءانشى كەنجەعالي مىرجىقباي اننەن شاشۋ شاشتى.
وڭداسىن ەلۋباي,
وسكەمەن.
ۇزدىك ۇشتىكتىڭ قاتارىندا تۇر
استانا قالالىق «مەديا استانا» قوعامدىق بىرلەستىگىنىڭ تاپسىرىسىمەن «InfoSystem» زەرتتەۋ ورتالىعى پارلامەنت سايلاۋى قارساڭىنداعى ەلەكتوراتتىڭ بەلسەندىلىگىن انىقتاۋ ماقساتىمەن ساۋالداما جۇرگىزدى. 4 جەلتوقسان مەن 23 جەلتوقسان ارالىعىندا ۇيىمداستىرىلعان ساۋالداماعا استانا مەن الماتى قالالارى جانە 14 وبلىس ورتالىقتارى مەن ەلدى مەكەندەرىندەگى 1597 ادام قاتىسقان. قازاقستاندىقتار وزدەرىنىڭ سايلاۋعا بەلسەندى تۇردە قاتىساتىنىن بۇل جولى دا كورسەتكەن. سۇرالعانداردىڭ 75 پايىزى وزدەرىنىڭ سايلاۋعا باراتىنىن جانە داۋىس بەرۋگە بەلسەنە قاتىسقىسى كەلەتىنىن ايتقان. ولار وزدەرىنىڭ داۋىس بەرۋ ءناتيجەسىنەن ەل بولاشاعىنىڭ قانداي بولماقتىعى شەشىلەتىنىنە سەنىمدى. مۇنىڭ ءوزى حالىقتىڭ باسىم كوپشىلىگى قازاقستاندا بولىپ جاتقان دەموكراتيالىق رەفورمالاردىڭ وڭ ناتيجە بەرەتىنىنە سەنىم ارتاتىنىن دا كورسەتەدى.
«InfoSystem» زەرتتەۋ ورتالىعىنىڭ ديرەكتورى سالتانات احمەتوۆا ۇگىت-ناسيحات ناۋقانىنىڭ ءالى ءوز كۇشىنە ەنە قويماعانىنا قاراماستان, ەلەكتوراتتىڭ وسىنشالىقتى بەلسەندى كوڭىل-كۇيدە ەكەندىگىن جاقسىلىققا بالايدى. مۇنداي مەرزىمدە وسىنشالىقتى كورسەتكىش بولا بەرمەيدى, دەيدى ول. سايلاۋعا ساۋالداما بەرىلگەن حالىقتىڭ 9,5 پايىزى عانا وعان قاتىسۋدان باس تارتىپتى.
ال ەندى سايلاۋشىلاردىڭ قاي پارتياعا بۇيرەگى بۇراتىندىعىنا كەلسەك, جالپىۇلتتىق سوتسيال-دەموكراتيالىق پارتياعا داۋىس بەرگىسى كەلەتىندەر سۇراۋ سالىنعانداردىڭ 2,1 پايىزىنا جەتىپ وتىر ەكەن.
وسىنىڭ ءوزى جسدپ بەلسەندىلەرىنىڭ حالىقپەن تىعىز بايلانىستا ەكەنىن ايعاقتاسا كەرەك. وسى ورايدا جاڭاوزەندەگى وقيعانى اتتاپ كەتە المايسىڭ. كەزىندە ەرەۋىلدەگەن مۇنايشىلاردىڭ اراسىنا جسدپ-نىڭ بەلسەندىلەرى بارىپ, قولدان كەلەر كومەكتەرىن ۇسىنعانى بەلگىلى. حالىق وسى ءبىر ءىلتيپاتتى, اسىرەسە, بۇگىنگى تاڭدا لايىقتى باعالايتىن سەكىلدى.
بۇگىن پارتيانىڭ الماتىداعى بەلسەندىلەرى «شاڭىراق-2» شاعىن اۋدانىنداعى مەكتەپتە جۇرتشىلىقپەن كەزدەسسە, تالدىقورعان قالاسى مەن استاناداعى بولىمشەلەرى دە تۇرعىلىقتى جەرلەرىندە بىرنەشە كەزدەسۋدەن وتكىزەتىن بولادى.
جاقسىباي سامرات.
تاڭداۋىنان تايماعان قارت كوممۋنيست
“قازاقستان كوممۋنيستىك حالىقتىق پارتياسىنىڭ” وڭتۇستىك قازاقستان وبلىسى فيليالىنىڭ قۇرمەتتى توراعاسى, جاسى جەتپىستىڭ ۇستىندەگى ءالي سابىروۆ حالىقشىل كوممۋنيستەردىڭ اتىنان پارلامەنت ماجىلىسىنە دەپۋتات بولىپ بارماق. بارماق دەگەنىمىز ارتىقتاۋ بولار, ءدال قازىر نيەت ۇستىندە. بارار-بارماسىن سايلاۋشىلار شەشەدى.
كوپ جىل پارتيالىق قىزمەتتە باسشىلىق جاساعان ءالي ارىقباي ۇلى وڭتۇستىكتە سىيلى. كوپ شال-شاۋقاندارداي شاپان كيگىزگەن, ات جەتەكتەتكەندەردىڭ سويىلىن سوعىپ كەتپەيدى. وزىندىك ويى بار, ايتارىن بەت-جۇزگە قاراماي تىكە ايتادى. دەربەس زەينەتكەر. بالاسى تابىسى جاقسى قىزمەتتە. باتىس قازاقستان وبلىسىندا تالاي ەلدى مەكەندەردى سۋ شايعاندا وسى ءالي ارىقباي ۇلى جيناعان جەكە قارجىسىنان 1 ملن. تەڭگە اۋدارعان.
ەلباسىمىز دا ورالعا بارىپ, زارداپ شەككەندەرگە جاڭا ۇيلەردىڭ كىلتىن تاپسىرعاندا: “سىزدەرگە حالىق بولىپ كومەكتەستى. سونى باعالاڭىزدار, ءبىلىڭىزدەر. وڭتۇستىكتىڭ ءبىر ارداگەر اقساقالى ءوز قاراجاتىنان 1 ملن. تەڭگە اۋداردى”, دەگەندە وسى ءالي اعامىزدى ايتقان بولاتىن. ءالي قاريا سارىاعاش اۋدانىنداعى بىرنەشە ەلدى مەكەندى قارعىن سۋ العاندا دا ارنايى ەسەپ-شوتقا قارجى اۋدارعان.
– اقشاسى كوپ ادام ەمەسپىن. اتاق شىعارۋ دا ويىمدا جوق. بىراق, ەل قينالىپ جاتقاندا ۇيدە تىنىش جاتا المايمىن, – دەيدى اقساقال اعىنان جارىلىپ.
بىرەۋلەر قازاقستاننىڭ بايلىعىن تەسپەي سورىپ بورسىقتاي سەمىرەدى. ۇرلىق اقشاسىن شەتەلدىك ەسەپ-شوتتارىنا جاسىرادى. ءالي اعامىز دا وسىعان اڭ-تاڭ. “ولار ۇلتتىڭ پاتريوتى ەمەس. كەز كەلگەن كۇنى ساتىپ كەتەدى. سوندىقتان, كەتكەندەرى ابزال”, دەيدى قارت حالىقشىل كوممۋنيست. اسىلىندە, بۇل كىسى پارتيانىڭ ءوڭتۇستىكتەگى باسشىلىعىن نۇرلان قادىرقۇلوۆ دەگەن ازاماتقا ءوز ەركىمەن وتكىزگەن.
بىراق, الماتىداعى ورتالىق “دەم السام” دەگەنىنە كونبەيدى. قۇرمەتتى ءتوراعا, ءارى وڭتۇستىك قازاقستان, جامبىل جانە قىزىلوردا وبلىستارى بويىنشا كۋراتورلىق قىزمەتى جانە بار.
– وڭتۇستىكتەن ماجىلىسكە پارتيا اتىنان مەنىڭ كانديداتۋرام ۇسىنىلدى, – دەيدى ءالي سابىروۆ. – ءدام جازىپ, سايلاۋشىلار داۋىس بەرىپ جاتسا, پارلامەنتتە ءبىز كوتەرەتىن ماسەلەلەر جوق ەمەس...
باقتيار تايجان,
شىمكەنت.
اۋىلدىقتار جەر-جەردى ارالاپ ءجۇر
قازاقستان سوتسيال-دەموكراتيالىق «اۋىل» پارتياسىنىڭ سايلاۋالدى جۇمىستارى ەلىمىزدىڭ بارلىق وڭىرلەرى بويىنشا ءورىس الا باستادى.
جۋىقتا وسىنداي كەزدەسۋلەردىڭ ءبىرى اقمولا وبلىسىنىڭ جارقايىڭ اۋدانىنىڭ جۇرتشىلىعىمەن بولىپ ءوتتى. مۇندا سايلاۋشىلارمەن س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ پروفەسسورى قۋانىش ءابۋوۆ كەزدەسىپ, جينالعانداردى «اۋىل» پارتياسىنىڭ باعدارلاماسى جانە سايلاۋالدى تۇعىرناماسىمەن تانىستىردى. «اۋىل» پارتياسى قىزمەتىنىڭ نەگىزىنە سان عاسىرلىق رەۆوليۋتسيالىق دامۋ ءناتيجەسىندە تۇجىرىمدالعان جانە قازىرگى كەزدە نەعۇرلىم دامىعان دەموكراتيالىق ەلدەردە باسىمدىققا يە بولىپ وتىرعان وسى زامانعى سوتسيال دەموكراتيانىڭ تۇبەگەيلى قاعيداتتارى الىنعاندىعىن ايتا كەلە, بۇل پارتيانىڭ ماقساتتارى ادامدارعا جاقىن جانە تۇسىنىكتى ەكەندىگىن جەتكىزدى.
سونداي-اق, تالدىقورعان قالاسىنداعى «ايسەرى» قوناق ۇيىندە ورنالاسقان «اۋىل» پارتياسىنىڭ قالالىق شتابىنداعى جۇرتشىلىقپەن كەزدەسۋگە الماتى وبلىستىق اۋىل شارۋاشىلىعى باسقارماسى باستىعىنىڭ ورىنباسارى سارسەنعالي اجىباەۆ, «زوولوگيا ينستيتۋتى» رمك باس ديرەكتورى ءاليحان مەدەلبەكوۆ, قازاق اۋىل شارۋاشىلىعىن مەحانيكالاندىرۋ جانە ەلەكترلەندىرۋ عىلىمي-زەرتتەۋ ينستيتۋتىنىڭ باس ديرەكتورى سەيىتقازى كەشەۋوۆ كەلدى. مۇندا كانديداتتار وبلىستىق, قالالىق شتابتاردىڭ جۇرگىزىپ جاتقان جۇمىستارىمەن تانىسىپ, جينالعاندارعا پارتيانىڭ سايلاۋالدى تۇعىرناماسىندا قاراستىرىلعان ماسەلەلەر تۋرالى اڭگىمەلەدى.
پاۆلودار وبلىسىنىڭ اقسۋ اۋدانىندا ءبىلىم جانە عىلىم مينيسترلىگىنىڭ عىلىم كوميتەتى توراعاسىنىڭ ورىنباسارى ءلاززات قۇسايىنوۆا, اتىراۋ وبلىسىنىڭ اۋداندارىندا پارتيانىڭ ورتالىق شتابىنىڭ جەتەكشىسى, اۋىل شارۋاشىلىعى عىلىمدارىنىڭ دوكتورى, اكادەميك كوپماعامبەت ەلەمەسوۆپەن بولعان كەزدەسۋلەر بارىسىندا دا پارتيانىڭ باعدارلاماسى تۋرالى اڭگىمە قوزعالىپ, جۇرتشىلىقتان كوپتەگەن سۇراقتار ءتۇستى. جينالىسقا قاتىسقانداردىڭ بارلىعى «اۋىل» پارتياسىنىڭ سايلاۋالدى تۇعىرناماسىن قولدايتىندىقتارىن ءبىلدىردى.
سۇڭعات ءالىپباي.
جۇرتشىلىق تىلەگى ەسكەرىلەدى
«ادىلەت» دەموكراتيالىق پارتياسىنىڭ توراعاسى ماقسۇت نارىكباەۆ 15 قاڭتاردا وتەتىن ءماجىلىس سايلاۋى ناۋقانى الدىنداعى ۇگىت-ناسيحات ناۋقانىنا وراي, وڭتۇستىك قازاقستان ءوڭىرىنە ساپارىن اياقتادى. بۇل وڭىرگە ساپارى بارىسىندا پارتيا جەتەكشىسى سايلاۋشىلارمەن جۇزدەسىپ, ولاردىڭ كوكەيىندە ءجۇرگەن ماسەلەلەرىنە قۇلاق ءتۇردى. ءوڭتۇستىككە ساپارىنىڭ ءۇش كۇنى ىشىندە م.ءنارىكباەۆ بىرقاتار كەزدەسۋلەر وتكىزسە, قازىعۇرت اۋدانىندا دا بولىپ, جۇرتشىلىقپەن جۇزدەستى.
وڭتۇستىك قازاقستاندا جۇرگىزىلگەن ۇگىت-ناسيحات جۇمىستارىنىڭ سوڭعى كۇنىندە م.نارىكباەۆ قالاداعى جۇرتشىلىققا قىزمەت كورسەتۋ ورتالىعىندا بولىپ, جەرگىلىكتى حالىقپەن كەزدەستى. ءارتۇرلى ماسەلەلەر بويىنشا پىكىر الماسىلىپ, ادەمى اڭگىمە ءورىس الدى. قالا حالقى جەكە يدەنتيفيكاتسيالىق ءنومىردى الۋ ءۇشىن تىم قىسقا مەرزىم بەرىلگەنىنە وزدەرىنىڭ نارازىلىقتارىن ءبىلدىرىپ تە ۇلگەردى.
بۇل كۇنى پارتيا توراعاسى ءوز كەزەگىندە كوكونىس پەن جەمىس باعاسىنىڭ شارىقتاپ كەتكەنىنە نازار اۋداردى. ونىڭ پىكىرىنشە, وڭتۇستىك ءوڭىرى كوكونىس پەن جەمىس ءوسىرۋ ءوندىرىسىنىڭ نەگىزگى وشاعى سانالاتىنىنا قاراماستان, مۇنداعى باعا استاناداعى باعامەن ءبىر دەڭگەيدە قويىلىپ وتىر.
«ادىلەت» دەموكراتيالىق پارتياسى توراعاسىنىڭ ەلىمىزدىڭ وڭتۇستىك قازاقستان وڭىرىنە ساپارى ەقىۇ بايقاۋشىلارىمەن وتكەن كەزدەسۋمەن اياقتالدى.
* * *
وتكەن جەكسەنبى كۇنى «ادىلەت» دەموكراتيالىق پارتياسى «الماتى وبلىسى قاسكەلەڭ اۋدانىنىڭ «شۇعىلا» شاعىن اۋدانىندا, «اپورت» ساۋدا ويىن-ساۋىق كەشەنىنىڭ جانىندا تۇرعىندارمەن كەزدەسۋ وتكىزدى. بۇل كەزدەسۋگە پارتيا ءتوراعاسىنىڭ ءبىرىنشى ورىنباسارى, پارلامەنت ءماجىلىسى دەپۋتاتتىعىنا «ادىلەت» پارتياسىنان ۇمىتكەر ت.سىدىق, پارتيا اپپاراتىنىڭ زاڭگەرى ە.حاسەنوۆ, سونداي-اق, پارلامەنت ءماجىلىسى دەپۋتاتتىعىنا جانە الماتى قالاسى ءماسليحاتى دەپۋتاتتىعىنا پارتيا اتىنان ۇمىتكەرلەر قاتىستى.
ال كەشە «ادىلەت» دەموكراتيالىق پارتياسى وكىلدەرى الماتىدا «2012-2014 جىلدارعا ارنالعان رەسپۋبليكالىق بيۋدجەت تۋرالى» تاقىرىبىندا ءباسپاسوز ءماسليحاتىن وتكىزدى. ءباسپاسوز ءماسليحاتى كەزىندە ادىلەتتىكتەر اتالعان ماسەلە توڭىرەگىندە جۋرناليستەردىڭ قويعان ساۋالدارىنا جاۋاپ بەردى.
ءلايلا ەدىلقىزى.