الماتىدا «قۇبىلمالى الەمدەگى زاماناۋي ادەبيەتتىڭ ءرولى» تاقىرىبىندا جازۋشىلاردىڭ ءى حالىقارالىق فورۋمى باستالدى.
فورۋمعا قازاقستاندىق قالامگەرلەرمەن قاتار تۇركيا, رەسەي, موڭعوليا, گەرمانيا, چەحيا, فرانتسيا, اقش, ۇلىبريتانيا, پولشا, قىتايدان, ت.ب. الەمنىڭ 16 ەلىنەن كەلگەن وكىلدەر قاتىستى.
«رۋحاني جاڭعىرۋ» باعدارلاماسى اياسىندا باستالعان فورۋمدى حالىقارالىق قازاق پەن كلۋبىنىڭ پرەزيدەنتى بيگەلدى عابدۋللين اشىپ, قازاقستاننىڭ الەمدىك ادەبيەت الاڭىندا ادەبيەتتەگى جانە مادەنيەتتەگى جەتىستىكتەرىمەن تانىمال بولا الاتىندىعىن جەتكىزىپ, فورۋمنىڭ قازاقستاندىق جازۋشىلار ءۇشىن شەتەلدىك اقىن-جازۋشىلارمەن كەزدەسۋىنە, جاڭا وي-پىكىرلەرىمەن بولىسۋىنە, ادەبي اۋدارماشىلارمەن تانىسۋىنا مۇمكىندىك بەرەتىن ماڭىزدى مادەني شارا ەكەندىگىنە توقتالىپ ءوتتى.
فورۋمعا الىستان ات ارىلتىپ كەلگەن قوناقتار قاتارىندا فرانتسۋز اقىنى, نوبەل سىيلىعىنىڭ 2019 جىلعى ۇمىتكەرى اتاناس ۆانچەۆ دو تراسي, پولياك جازۋشىسى يانۋش ۆيشنەۆسكي, يزرايلدەن الەكسەي تسۆەتكوۆ, رەسەيدەن سەرگەي گاندلەۆسكي, اقش-تان باحىت كەنجەەۆ, ت.ب. بار. ال فورۋمعا قاتىسقان قازاق ادەبيەتىنىڭ قارت وكىلى ءابدىجامىل نۇرپەيىسوۆ, اقىن ولجاس سۇلەيمەنوۆ بۇگىنگى ادەبيەت تۋرالى پىكىرلەرىن بىلدىرسە, ۇلىقبەك ەسداۋلەت, قۋانىش جيەنباي, امانگەلدى كەڭشىلىك, ت.ب. قالامگەرلەر كەزدەسۋ الاڭىندا شەتەلدىك ارىپتەستەرىمەن ادەبيەت توڭىرەگىندەگى اقپاراتتارمەن الماستى.
ءۇش كۇنگە سوزىلاتىن فورۋم اياسىندا م.جولداسبەكوۆ اتىنداعى ستۋدەنتتەر سارايىندا اقىندار كەشى وتەدى.
ەلۆيرا سەرىكقىزى,
«ەگەمەن قازاقستان»
الماتى