بۇگىنگى تاڭدا جەرگىلىكتى, وبلىستىق, مەديتسينالىق, اقپاراتتىق جۇيەلەردە 11 ملن دەربەس جازبا ساقتالعان, دەپ حابارلايدى قر پرەمەر-مينيسترلىگىنىڭ ءباسپاسوز قىزمەتى.
ەلەكتروندى پاسپورتتار مەديتسينالىق اقپاراتتىق جۇيەلەر ۇياشىقتارى تۇرىندە بولادى, مۇندا قانداي دا ءبىر ەمحاناعا بەكىتىلگەن ءاربىر ازاماتتىڭ دەرەكتەرى ساقتالادى.
«بۇگىندە بارلىق 17 ءوڭىر بويىنشا, ونىڭ ىشىندە ەمحانالاردا قاعازسىز قۇجات جۇرگىزۋگە كوشۋ جۇمىستارى ءجۇرىپ جاتىر. مەديتسينالىق ۇيىمداردىڭ 97%-ىندا اقپاراتتىق جۇيەلەر ورناتىلعان جانە بىرتىندەپ ەلەكتروندى پاسپورتتار قالىپتاستىرىلۋدا», — دەدى دەنساۋلىق ساقتاۋ ءمينيسترى.
ە. ءبىرتانوۆتىڭ ايتۋىنشا, بۇگىنگى تاڭدا 11 ملن دەربەس جازبا ساقتالعان.
«قازان ايىندا ءبىز ورتالىق پلاتفورمانى, ياعني دەنساۋلىق ساقتاۋ مينيسترلىگىنىڭ ورتالىق سەرۆەرىن ىسكە قوسۋدى جوسپارلاپ وتىرمىز, وندا بارلىق پاسپورتتار اۋدارىلادى جانە كوشىرىلەدى. وسىلايشا, دەرەكتەر بىرىڭعاي ساقتالىپ وتىرادى جانە ادام باسقا ايماققا كوشىپ كەتسە دە, تۋعان كەزىنەن باستاپ دارلىق دەرەكتەر, مەديتسينالىق كومەككە جۇگىنگەنى, جەدەل جاردەم شاقىرعانى, ەمحانالاردا تەكسەرىلۋى ساقتالىپ, بارلىعى ءبىر ەلەكتروندى پاسپورتپەن جۇرگىزىلەدى. بۇل – دەنساۋلىق جاعدايىنىڭ ءومىر بويى ساقتالاتىن تاريحى دەۋگە دە بولادى», — دەپ ءتۇسىندىردى ە. ءبىرتانوۆ.
مينيستر اتاپ وتكەندەي, 2020 جىلعا قاراي قازاقستاننىڭ بارلىق ازاماتتارىن ءجۇز پايىز قامتۋ جوسپارلانۋدا, ياعني ەل حالقىنىڭ بارلىعىندا وسىنداي جازبا بولادى.
«بۇدان وزگە, ءبىز بۇل دەرەكتەردىڭ قاۋىپسىزدىگىنە جاۋاپكەرشىلىكتى جانە ازاماتتاردىڭ مەديتسينا قىزمەتكەرلەرىنە اقپاراتتى بەرۋ قۇقىقتارىن زاڭنامالىق تۇردە بەلگىلەيمىز», — دەدى ول.
ءوز كەزەگىندە استانا قالاسىنىڭ دەنساۋلىق ساقتاۋ باسقارماسىنىڭ باسشىسى ق. نادىروۆ بۇگىنگى تاڭدا 1,65 ملن-نان استام ادام قالا ەمحانالارىنا تىركەلگەنىن, ونىڭ 93%-ىندا ەلەكتروندى دەنساۋلىق پاسپورتى بار ەكەنىن ايتىپ ءوتتى.
«دەنساۋلىق ساقتاۋ جۇيەسىندە تسيفرلاندىرۋ اياسىندا اۋقىمدى جۇمىستار جۇرگىزىلىپ جاتىر. قالانىڭ بارلىق مەديتسينا ۇيىمدارى 100% اقپاراتتىق جۇيەلەرمەن, كومپيۋتەرلەرمەن جابدىقتالعان. 80 مىڭنان استام مەديتسينالىق قۇجاتتار تسيفرلاندىرىلدى, ياعني باستالعان دەنساۋلىق پاسپورتتارى كۇن سايىن جاڭارتىلىپ وتىرادى, وسىلايشا مەديتسينالىق قىزمەتتەردىڭ ساپاسىن جاقسارتۋعا كومەكتەسەدى», — دەدى ق. نادىروۆ.