بوكستان بۋداپەشتە ءوتىپ جاتقان جاستار اراسىنداعى الەم بىرىنشىلىگىندە قازاقستاننىڭ بەس ورەنى فينالعا شىققانى جايىندا ءبىز بۇعان دەيىن حابارلاعانبىز. سونداي-اق, تامىز ايىنىڭ سوڭعى كۇندەرى تاعى ءۇش قىزىمىز باس جۇلدە ءۇشىن تالاساتىن بولادى.
جارتىلاي فينالدا ايزادا يسلامعالي (54 كيلو), تايلاندىق پونناپا لاپاندى جەڭسە, گۋزال سادىقوۆا (81 كيلو) ۋكراينالىق كارولينا ماحنودان باسىم ءتۇستى. قوس كەزدەسۋدە دە 5:0 ەسەبى تىركەلدى. اسا اۋىر سالماق دارەجەسىندە باق سىناۋشىلاردىڭ سانى از بولعاندىقتان دينا يسلامبەكوۆا (+81 كيلو) بىردەن فينالعا جولداما الدى. اقتىق سىندا ايزادا امەريكالىق يۋانا ۆەردۋسكامەن كۇش سىناسسا, گۋزال رەسەيلىك اناستاسيا رىباكپەن شەبەرلىك بايقاسادى. دينانىڭ فينالداعى قارسىلاسى – ۋكراينالىق ماريا لوۆشينسكا. ال جارتىلاي فينالدا ۇندىستاندىق نيتۋدەن ۇتىلعان انەل قۇدايبەرگەن (48 كيلو) جانە امەريكالىق حەۆەن گارسياعا جول بەرگەن جانسايا ءابدىرايموۆا (51 كيلو) قولا مەدالدى قاناعات تۇتتى.
بۇرىمدىلار اراسىندا وزگەلەردەن ءۇندىستان مەن رەسەيدىڭ كوشى ىلگەرى. قوس ەلدەن ءتورت بوكسشىدان فينالعا جولداما الىپ وتىر. قازاقستاننىڭ ءۇش ارۋى اقتىق سىنعا شىقسا, انگليانىڭ ەكى وكىلى سول مەجەگە شەتتى. سونداي-اق, باس جۇلدە ءۇشىن تالاساتىندار قاتارىندا حورۆاتيا, تايلاند, كانادا, فرانتسيا جانە ۋكراينانىڭ ءبىر-ءبىر بىلعارى قولعاپ شەبەرى بار.
ەرلەر اراسىندا رەسەيدىڭ – 7, قازاقستاننىڭ – 5, تايلاندتىڭ – 2, پۋەرتو-ريكو, انگليا, اقش, وزبەكستان, ۆەنگريا جانە كۋبانىڭ – 1 بوكسشىسى فينالدا جۇدىرىقتاسادى. ءبىزدىڭ جىگىتتەردىڭ بارلىعى دا شەشۋشى تۇستا رەسەي قۇراما كومانداسىنىڭ مۇشەلەرىمەن كەزدەسەدى. اتاپ ايتساق, ەرماحان جاقپەكوۆ (69 كيلو) جامبولات بيجاموۆپەن, نۇربەك ورالباي (75 كيلو) دانيل تەتەرەۆپەن, ساعىندىق توعامباەۆ (81 كيلو) رۋسلان كولەسنيكوۆپەن, ايبەك ورالباي (91 كيلو) ەگور فەدوروۆپەن جانە دامير تويباي (+91 كيلو) الەكسەي درونوۆپەن جەكپە-جەككە شىعادى.
عالىم سۇلەيمەن,
«ەگەمەن قازاقستان»