الماتى قالاسىنىڭ ءبىلىم بەرۋ مەكەمەلەرىندە سىبايلاس-جەمقورلىققا قارسى ءىس-شارالاردى كۇشەيتۋ مەن ءبىلىم سالاسىنداعى مەملەكەتتىك قىزمەتتەر ساپاسىن ارتتىرۋ ءۇشىن الماتى قالاسىنىڭ ءبىلىم باسقارماسى مەن «Sanaly urpaq» جوبالىق كەڭسەسى بىرلەسىپ «سىبايلاس-جەمقورلىققا قارسى تەحنولوگيالار» تاقىرىبىندا سەمينار-كەڭەس وتكىزدى.
شاراعا قالاداعى ورتا ءبىلىم بەرەتىن ۇيىمدار, مەكتەپتەر مەن كوللەدج باسشىلارى قاتىستى. كەزدەسۋ بارىسىندا «Sanaly urpaq» جوبالىق كەڭسەسىنىڭ جەتەكشىسى ق.ا.توكۋشەۆ تالداۋلار ناتيجەسىنە قاتىستى 18 ۇسىنىس ەنگىزىپ, ونىڭ ىشىندە كوللەدج, مەكتەپ قىزمەتكەرلەرى مەن ستۋدەنتتەرگە سىبايلاس-جەمقورلىققا قارسى ستاندارتتاردى بەكىتۋ, مەكتەپتەردەگى سالىمداردى جيناۋدى دوعارۋ, مەملەكەتتىك قىزمەت ساپاسىن جوعارىلاتۋ ماسەلەلەرىن تالقىلادى.
سەمينار اياسىندا «Sanaly urpaq» جوباسى شەڭبەرىندە اكادەميالىق ادالدىق جانە سىبايلاس-جەمقورلىققا قارسى ارەكەتتەردى كۇشەيتە وتىرىپ, ءبىلىم بەرەتىن ۇيىمداردا باعالاۋ جۇيەسىن قالىپتاستىرۋ ۇسىنىلدى. بولجام بويىنشا باعالاۋ جۇيەسى جىل سايىن وتكىزىلەتىن بولادى. ال ونىڭ ناتيجەسىنە وراي قالىپتاساتىن سىبايلاس-جەمقورلىققا قارسى رەيتينگ ورتا مەكتەپ, كوللەدج جانە جوعارى وقۋ ورىندارىنىڭ ارقايسىسىنا جەكەلەي جۇرگىزىلەتىن بولادى.
سەمينار سوڭىندا الماتى قالاسىنىڭ ءبىلىم بەرۋ باسقارماسى باسشىسىنىڭ ورىنباسارى ل.ا.جىلقىباەۆا مەكتەپ جانە كوللەدج ديرەكتورلارىنا ءوز قىزمەتتەرىن اكادەميالىق ادالدىق قاعيداسىنا سۇيەنە وتىرىپ جۇزەگە اسىرۋ مىندەتىن تاپسىردى.
ەلۆيرا سەرىكقىزى,
«ەگەمەن قازاقستان»
الماتى