سىرتقى ىستەر ءمينيسترى قايرات ءابدىراحمانوۆ پەن شەتەلدىك ديپلوماتيالىق ميسسيالار باسشىلارى ازياداعى ءوزارا ءىس-قيمىل جانە سەنىم شارالارى جونىندەگى كەڭەسى (اوسشك) حاتشىلىعىنا بارىپ, ارنايى جاساقتالعان كونفەرەنتس-زالدىڭ اشىلۋ راسىمىنە قاتىستى.
ازياداعى ءوزارا ءىس-قيمىل جانە سەنىم شارالارى جونىندەگى كەڭەسىن (اوسشك) قۇرۋ يدەياسىن قازاقستان پرەزيدەنتى نۇرسۇلتان نازارباەۆ تۇڭعىش رەت 1992 جىلى 5 قازاندا بۇۇ باس اسسامبلەياسىنىڭ 47-سەسسياسىندا ۇسىنعان بولاتىن.
ۇيىم العاشقى كەزەڭدە 16 مەملەكەتتىڭ باسىن قوستى. قازىرگى ۋاقىتتا اتالعان ۇيىم 27 مەملەكەتتى بىرىكتىرىپ وتىر. سونداي-اق تاعى جەتى مەملەكەت پەن ءتورت حالىقارالىق ۇيىم, ونىڭ ىشىندە بۇۇ ازياداعى ءوزارا ءىس-قيمىل جانە سەنىم شارالارى جونىندەگى كەڭەسىنە باقىلاۋشى رەتىندە قاتىسادى.
اتالعان ۇيىمعا ءبىزدىڭ ەلىمىز 2002-2010 جىلدار ارالىعىندا توراعالىق ەتتى. قازىر ۇيىم تىزگىنى قىتاي حالىق رەسپۋبليكاسىنىڭ قولىندا.
ۇيىمنىڭ حاتشىلىعى 2006 جىلى قۇرىلىپ, استانادا قونىس تەپتى. ەندى مىنە, سىرتقى ىستەر ءمينيسترى قايرات ءابدىراحمانوۆ باستاعان دەلەگاتسيا حاتشىلىقتىڭ زاماناۋي ءماجىلىس زالىن رەسمي تۇردە اشتى.
كونفەرەنتس-زال سوڭعى ۇلگىدەگى بايلانىس جانە بەينە, دىبىس زورايتقىش, مۋلتيمەديالىق قۇرىلعىلارمەن جابدىقتالعان. الەمدەگى وزىق تەحنولوگيالار قولدانىلىپ, وسىندا وتەتىن كەزدەسۋ-جيىنداردى تاسپاعا باسۋ بارىنشا جەڭىلدەتىلگەن.
سىرتقى ىستەر ءمينيسترى تسيفرلاندىرۋ مەن اۆتوماتتاندىرۋدىڭ وزىق ۇلگىلەرىن كورىپ, مۇنداي جابدىقتاردىڭ استاناداعى كەڭسەلەردە كەزدەسە بەرمەيتىندىگىن اتاپ ءوتتى. قۇرال-جابدىقتار ۇيىمنىڭ قازىرگى توراعاسى – قىتاي حالىق رەسپۋبليكاسى تاراپىنان قارجىلاندىرىلعان.
دەلەگاتسيا قۇرامىنداعى ەلشىلىكتەردىڭ وكىلدەرى دە ازياداعى ءوزارا ءىس-قيمىل جانە سەنىم شارالارى جونىندەگى كەڭەسىنىڭ ءماجىلىس زالىنىڭ اشىلۋىمەن قۇتتىقتاپ, جاڭا تەحنولوگيالاردىڭ جۇمىس ساپاسىن جەتىلدىرە تۇسۋگە سەپتىگىن تيگىزەرىنە سەنىم ءبىلدىردى.
سەرىك ابدىبەك,
«ەگەمەن قازاقستان»