استانا تۇرعىندارى «7-20-25» باعدارلاماسى اياسىندا ساتىپ الىپ جاتقان باسپانانىڭ ورتاشا قۇنى 15 270 000 تەڭگەنى قۇرايدى, دەپ حابارلايدى «باسپانا» يپوتەكالىق ۇيىمىنىڭ ءباسپاسوز قىزمەتى.
بۇل قازاقستان بويىنشا ەڭ جوعارعى باعا. سونىمەن بىرگە, اتىراۋ قالاسىنىڭ تۇرعىندارى الماتىعا قاراعاندا قىمباتىراق باسپانالاردى تاڭداپ جاتقانى انىقتالدى. اتىراۋ بويىنشا «7-20-25» باعدارلاماسى اياسىندا تاڭدالعان پاتەردىڭ ورتاشا باعاسى 13 480 000 تەڭگە بولسا, الماتىلىقتار شامامەن 12 900 000 تەڭگەلىك پاتەرلەردى دۇرىس كورەدى. الايدا, باعدارلاماعا قاتىسۋشىلار سانى جاعىنان الماتىلىقتار الدا كەلەدى. باعدارلاما اياسىندا تاپسىرىس بەرىلگەن باسپانانىڭ ەڭ ارزانى قوستانايدا. قوستانايداعى ءۇيدىڭ ورتاشا باعاسى 7 400 000 تەڭگەنى قۇرايدى.
ارزان باسپاناسىمەن ماقتانا الاتىن وڭىرلەردىڭ قاتارىندا اقتاۋ (باسپانانىڭ ورتاشا باعاسى - 7 900 000 تەڭگە) مەن اقمولا وبلىسى (باسپانانىڭ ورتاشا باعاسى - 8 170 000 تەڭگە) دا بار. 25 تامىز كۇنگى مالىمەت بويىنشا, 1803 ازامات «7-20-25» باعدارلاماسىنا قاتىسۋعا نيەت ءبىلدىرىپ, 21,3 ملرد. تەڭگە سوماسىنا تاپسىرىس بەرگەن. ونىڭ ىشىنەن 14 ملرد. تەڭگە سوماسىنا 1190 ازاماتتىڭ ءوتىنىشى ماقۇلداندى. قازىرگى تاڭدا, «7-20-25» باعدارلاماسى اياسىندا تسەنتركرەديت بانكى, اتفبانك, تسەسنابانك, Bank RBK مەن ەۋرازيالىق بانك حالىققا نەسيە بەرۋدە.