كەشە ەل تاۋەلسىزدىگىنىڭ 20 جىلدىعىنا ارنالعان «كونستيتۋتسيالىق زاڭدىلىق – قۇقىقتىق مەملەكەتتىڭ جانە تۇلعا ەركىندىگىنىڭ نەگىزى» اتتى حالىقارالىق عىلىمي-پراكتيكالىق كونفەرەنتسيا بولىپ ءوتتى.
كونفەرەنتسيانى قازاقستان رەسپۋبليكاسى كونستيتۋتسيالىق كەڭەسى جوعارعى سوتپەن, باس پروكۋراتۋرامەن, ادام قۇقىقتارى جونىندەگى ۋاكىلمەن جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىمەن بىرلەسە وتىرىپ ۇيىمداستىردى.
كونفەرەنتسياعا پارلامەنت دەپۋتاتتارى, قۇقىق قورعاۋ جانە وزگە دە مەملەكەتتىك ورگانداردىڭ باسشىلارى, بەدەلدى حالىقارالىق ۇيىمداردىڭ جانە وزگە دە ۇكىمەتتىك ەمەس ينستيتۋتتاردىڭ وكىلدەرى, سونداي-اق قازاقستاننىڭ جانە شەت ەلدەردىڭ بەلگىلى زاڭگەر-عالىمدارى قاتىستى.
كونفەرەنتسيا بارىسىندا قازاقستان رەسپۋبليكاسىنىڭ جيىرما جىلدىق دامۋىنىڭ قورىتىندىسى شىعارىلدى. قازاقستان مەملەكەتتىلىگىنىڭ اجىراماس بەلگىسى رەتىندە كونستيتۋتسيالىق زاڭدىلىق رەجىمىنىڭ قازىرگى جاي-كۇيىنە جانە ونى قامتاماسىز ەتۋدە نەگىزگى زاڭنىڭ رولىنە تالداۋ جاسالدى. وڭ ءتاجىريبە الماسىلىپ, بۇدان ءارى دامۋ جولدارى ناقتىلاندى.
فورۋمعا قاتىسۋشىلار قازاقستاندا كونستيتۋتسيوناليزم يدەيالارى مەن پرينتسيپتەرىن جۇزەگە اسىرۋدىڭ قارىشتى ۇدەرىسى ءجۇرىپ جاتىر دەگەن ورتاق پىكىر ءبىلدىردى, دەپ حابارلادى كونستيتۋتسيالىق كەڭەستىڭ ءباسپاسوز قىزمەتى.