Forbes جۋرنالى 2018 جىلى ەڭ كوپ تابىس تاپقان ايەل سپورتشىلاردىڭ ءتىزىمىن جاريا ەتتى. وسى تىزىمدەگى ەڭ ۇزدىك 10 ارۋدىڭ سەگىزى تەننيسشىلەر ەكەن. سونداي-اق, «توپ-10» سپورتشىنىڭ قاتارىندا ءبىر بادمينتونشى مەن ءبىر اۆتوسپورتشى بار.
بيىلعى جىلعى باي-اۋقاتتىلار تىزىمىندە سەرەنا ۋيليامس اعارىپ الدا تۇر. ۇزاق جىلدار بويى الەمدىك رەيتينگتە كوش باستاپ, «ۇلكەن دۋلىعا» ساناتىنداعى تۋرنيرلەردە 38 مارتە (جەكەلەگەن جانە جۇپتىق سايىستى قوسا العاندا – رەد.) توپ جارىپ, WTA تۋرنيرلەرىندە 72 رەت دارا شىققان 36 جاستاعى اقش-تىڭ ايگىلى تەننيسشىسى بيىلعى جىلدىڭ وزىندە 18,1 ميلليون دوللار تابىس تاۋىپ وتىر.
ودان كەيىنگى بەس ورىندى دا وسى سپورت ءتۇرىنىڭ وكىلدەرى يەمدەنۋدە. ولار – دانيالىق كارولين ۆوزنياتسكي (13 ميلليون), امەريكالىق سلوان ستيۆەنس (11,2 ميلليون), يسپانيالىق گاربينە مۋگۋرۋسا (11 ميلليون), رەسەيلىك ماريا شاراپوۆا (10,5 ميلليون) جانە اقش-تىڭ تاعى ءبىر وكىلى ۆينۋس ۋيليامس (10,2 ميلليون).
جەتىنشى ورىندا – پۋسارلا ۆەنكاتا سيندحۋ. بادمينتون سپورتىن سەرىك ەتكەن 23 جاستاعى ءۇندىستاننىڭ سۇلۋى ۇستىمىزدەگى جىلى 8,5 ميلليون دوللاردى ءوز ەسەپشوتىنا اۋدارعان. سەزىگىنشى ورىندا – سيمونا حالەپ. بۇگىنگى تاڭدا تەننيسشىلەردىڭ الەمدىك رەيتينگىندە كوش باستاپ تۇرعان رۋمىنيانىڭ ماقتانىشى 7,7 ميلليوندى ءاميانىنا سالدى. توعىزىنشى ساتىعا دانيكا پاتريك جايعاستى. اۆتوسپورت سايىستارىندا الدىنا جان سالماي جۇرگەن امەريكالىق ارۋدىڭ تابىسى – 7,5 ميلليون. ۇزدىك وندىقتى قورىتىندىلاپ تۇرعان – انجەليكا كەربەر. گەرمانيانىڭ تەننيسشىسى بيىل 7 ميلليون دوللاردى قالتاعا باستى.
عالىم سۇلەيمەن,
«ەگەمەن قازاقستان»