ەلباسى نۇرسۇلتان نازارباەۆتىڭ وڭتۇستىك قازاقستان وبلىسىن تۇركىستان وبلىسى دەپ قايتا قۇرۋ جانە ونىڭ ورتالىعىن شىمكەنتتەن تۇركىستان قالاسىنا كوشىرۋ تۋرالى تاريحي جارلىققا قول قويعانىنا دا ەكى اي ۋاقىت ءوتتى. وسى مەرزىمدە كيەلى تۇركىستاندا كوپتەگەن جۇمىس اتقارىلدى. ەڭ باستىسى, وبلىستىق مەكەمەلەردى كوشىرۋ جۇمىستارى جىلدام ءارى جوعارى دەڭگەيدە ۇيىمداستىرىلۋدا.
وتكەن جۇما وبلىستىق مەكەمەلەر تاريحىندا, مەكەمە قىزمەتكەرلەرىنىڭ ءومىربايانىندا وشپەستەي ءىز قالدىراتىن كۇن بولدى. ولاي دەيتىنىمىز, تۇركىستان وبلىسى اكىمدىگىنىڭ مەملەكەتتىك قىزمەتكەرلەرى شىمكەنت قالاسىنان وبلىس ورتالىعى – تۇركىستان شاھارىنا كوشتى. بۇل جولعى كوش مەرەكەلىك رەڭك الىپ, تاريحي ءسات ەستە قالاتىنداي ءوتتى. كوڭىلدى اۋەن, پاتريوتتىق اندەر, كولىكتەردەگى جىگەرلەندىرەتىن جازۋلار, كوشەتىندەردىڭ كوتەرىڭكى كوڭىل كۇيى... زاماناۋي قوندىرعىلار ارقىلى بەينەتاسپاعا جازىلىپ, فوتوعا ءتۇسىرىلىپ جاتتى. سالتاناتتى كوشتىڭ رەسمي بولىگىن اشقان وبلىس اكىمى جانسەيىت تۇيمەباەۆ ەكى عاسىر بويى قازاق حاندىعىنىڭ استاناسى بولعان, ماڭىزدى شەشىمدەر قابىلدانعان تۇركىستانعا ات باسىن بۇرىپ, قىزمەت ەتۋگە بارا جاتقان ازاماتتار, جالىندى جاستار تاريح الدىنداعى ۇلى مۇراتتارىنىڭ ءبىرىن ورىنداپ جاتىر دەۋگە تولىق نەگىز بار ەكەنىن اتاپ ءوتتى.
– ءاربىر مەملەكەتتىڭ, ءاربىر وبلىستىڭ, ءاربىر قالانىڭ تاريحىندا جاۋاپتى كەزەڭدەر بولادى. بيىل 19 ماۋسىمدا ەلباسى جارلىعىمەن بۇرىنعى وڭتۇستىك قازاقستان وبلىسى تۇركىستان وبلىسى بولىپ قۇرىلىپ, ونىڭ ورتالىعى دەپ تۇركىستان قالاسى بەكىتىلدى. بۇل تاريحي شەشىمگە 2 اي جەتەر-جەتپەس ۋاقىتتىڭ وزىندە ءبىز تىنباي جۇمىس ىستەپ, ەلباسى جارلىعىن ورىنداۋعا بار كۇشىمىزدى سالدىق. تۇركىستان قالاسىندا وبلىس اكىمدىگىنە قاراستى 24 باسقارما مەن وبلىستىق ءماسليحات, قوعامدىق كەڭەس پەن دەپارتامەنت قىزمەتكەرلەرى وتىراتىن كەڭسەلەر دايارلاندى. بۇگىن ءبىز ۇلكەن كوشتى باستايىق دەپ وتىرمىز. كەزىندە ەلباسى استاناعا كوشەر كەزدە «الماتىعا سىيماي ەمەس, الماتىنى قيماي كەتىپ بارامىز» دەگەن ەكەن. ءبىز دە شىمكەنتكە سىيماي ەمەس, ونى قيماي كەتىپ بارامىز. تۇركىستان – بار قازاقتىڭ رۋحاني استاناسى. سوندىقتان ونى دامىتۋعا, وركەندەتۋگە كۇش سالۋىمىز قاجەت. شەجىرەلى قالانىڭ تۋريستىك الەۋەتى كوتەرىلىپ, جاڭا جۇمىس ورىندارى اشىلادى. مىنە, ەندى تۇركىستان وبلىسى مەن تۇركىستان قالاسىنىڭ جاڭا ءداۋىرى باستالدى, – دەدى وبلىس اكىمى.
ال بەلگىلى جازۋشى, «الاش» حالىقارالىق سىيلىعىنىڭ لاۋرەاتى مارحابات بايعۇت ورنىعىپ قالعان ورنىنان كوشۋ وڭاي بولماستىعىن, الدا قيىندىقتار كەزدەسەتىنىن, «سول قيىندىقتاردى جۇمىلا ىستەيتىن جۇمىس جەڭەتىنىن» ايتتى. مەملەكەت جانە قوعام قايراتكەرى شالاتاي مىرزاحمەتوۆ اكىمدىك قىزمەتكەرلەرىنە قىزمەتتە جەتىستىكتەر مەن تابىس تىلەدى. شىعارىپ سالۋشىلار دا قۇر قول كەلمەپتى, جول جۇرەتىندەرگە قىمىزى مەن باۋىرساعىن تاراتقاندار كوپ. ءوڭىر باسشىسى باستاعان ۇلكەن كوشتىڭ قۇرامىندا وبلىس اكىمىنىڭ ورىنباسارلارى جانە اپپارات باسشىسى, وبلىستىق ءماسليحات حاتشىسى مەن اپپاراتى, وبلىستىق قوعامدىق كەڭەستىڭ توراعاسى جانە اپپاراتى, «نۇر وتان» پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى جانە قىزمەتكەرلەرى, وبلىستىڭ زيالى قاۋىم وكىلدەرى, وبلىس ارداگەرلەرى, قۇزىرلى ورگان باسشىلارى, اكىم اپپاراتى قىزمەتكەرلەرى, 28 اۋماقتىق دەپارتامەنتتىڭ باسشىلارى مەن قىزمەتكەرلەرى, 24 وبلىستىق باسقارما باسشىلارى مەن قىزمەتكەرلەرى, رەسپۋبليكالىق جانە جەرگىلىكتى باق وكىلدەرى سىندى, جالپى سانى مىڭعا جۋىق ادام بار.
وسىلايشا مىڭعا جۋىق مەملەكەتتىك قىزمەتكەر تۇرعىندار سانى ارتىپ, سوعان وراي قالا تىرشىلىگى وزگەرىپ, جاڭا ءداۋىرى باستالعان تۇركىستاندا جۇمىسىن جالعاستىرادى.
عالىمجان ەلشىباي,
«ەگەمەن قازاقستان»
تۇركىستان وبلىسى