قازاقستاندىق سەمسەرلەسۋشى دميتري الەكسانين جاكارتادا ءوتىپ جاتقان ازيا ويىندارىنىڭ چەمپيونى اتانىپ, ەل قورجىنىنا العاشقى التىندى سالدى.
ول فينالدىق باسەكەدە ريو وليمپياداسىنىڭ چەمپيونى, وڭتۇستىك كورەيالىق سان ەن پاكتى جەڭدى. قورىتىندى ەسەپ - 15:12, دەپ حابارلايدى قازاقستان ۇوك ءباسپاسوز قىزمەتى.
دميتري جارىستىڭ توپتىق كەزەڭىندە 1/16 فينالدا تايلاندىق كوراكوتە جيەنگامۋايچايدى, 1/8 فينالدا قىرعىزستاندىق رومان پەتروۆتى, شيرەك فينالدا ۆەتنامدىق دەن نگۋەيندى جەڭگەن بولاتىن. جارتىلاي فينالدا الەكسانين ازيا چەمپيونى, لوندون وليمپياداسىنىڭ قولا جۇلدەگەرى وڭتۇستىك كورەيالىق چون دجين سوننا باسىم تۇسكەن بولاتىن.
«دميتري الەكسانين بيىلعى ازيا چەمپيوناتىندا كۇمىس جۇلدەگەر اتانىپ, الەم بىرىنشىلىگىندە ۇزدىك التىلىققا ەندى. بۇل ونىڭ قارىمدى سپورتشى ەكەنىن كورسەتەدى. ازيا ويىندارىندا ءبارى ءساتتى اياقتالعانىنا قۋانىپ تۇرمىن. بارشا قازاقستاندىقتاردى الەكسانيننىڭ جەڭىسىمەن شىن جۇرەكتەن قۇتتىقتايمىن», - دەيدى باس باپكەر الەكسەي پيستسوۆ.