يندونەزيا استاناسى جاكارتا قالاسىندا XVIII جازعى ازيا ويىندارى باستالدى. وعان سارى قۇرلىقتىڭ 45 ەلىنەن كەلگەن سايىپقىران ساڭلاقتار سپورتتىڭ 42 ءتۇرى بويىنشا سىنعا ءتۇسىپ جاتىر. وسى ءبىر ءدۇبىرلى جارىسقا ءوز دۇلدۇلدەرىن قوسقان ەلدىڭ ءبىرى - موڭعوليا.
جارىستىڭ العاشقى كۇنى وسى موڭعولدىڭ باسكەتبولشى قىزدارىمەن گونكونگتىڭ قىزدار قۇراماسى جولىقتى. قىزىق بولعاندا بۇرىن سوڭدى مۇنداي ۇلكەن دودادا بيىكتەن كورىنە بەرمەيتىن موڭعوليالىق ارۋلار 83:79 ەسەبىمەن جەتى ميلليون تۇرعىنى بار الەمنىڭ ەڭ باي شاھارىنىڭ كومانداسىن جەڭدى.
بۇل وقيعا موڭعول ەلىندە ۇلكەن سەنساتسياعا تەلىنىپ, كومانداعا جەڭىس سىيلاعان شەبەر باسكەتبولشى قازاق ارۋى بۇلبۇل مۇراتقىزى تۋرالى اقپار موڭعولدىڭ اسپانىندا جاڭعىرىپ تۇر. ونى سپورت سۇيەر قاۋىم "جاكارتادا جانعان جۇلدىز" دەپ باعالاۋدا. بۇلبۇل شەڭبەرگە دوپتى الىستان 8 رەت ءدال ءتۇسىرىپ, وزگە دە ارەكەتتەرىمەن كومانداسىنا 37 ۇپاي الىپ بەرگەن. بۇل جەكە ويىنشى ءۇشىن ۇلكەن جەتىستىك.
بۇلبۇل قارىنداسىمىز 1995 جىلى 11 قاراشادا ۇلان-باتىر ىرگەسىندەگى نالايقى كەنتىندە دۇنيەگە كەلگەن. بويى - 165 سم, سالماعى - 58 كيلو. باسكەتبولمەن اينالىسقانىنا ونشاقتى جىلدىڭ ءجۇزى بوپتى. بۇعان دەيىن بىرنەشە حالىقارالىق جارىستاردا توپ جارىپ, 2016 جىلى قۇرلىقتىق ستۋدەنتتەر ليگاسىنىڭ قولا مەدال يەگەرى اتانعان.
اقپار ءۇشىن ايتا كەتەيىك. اتالمىش جارىسقا بۇلبۇلدان باسقا كورشى قىتاي رەسپۋبليكاسىنىڭ اتىنان تاعى ءۇش قانداسىمىز قاتىسىپ جاتىر. ولاردىڭ ءبىرى - 65 كيلو سالماقتا بەلدەسەتىن ەركىن كۇرەس شەبەرى ەرلانبەك كاتەي ۇلى بولسا, ەكىنشىسى - ءۋاليحان سەرىك ۇلى. بۇل جىگىت گرەك-ريم كۇرەسىنەن 60 كيلو سالماقتا ونەر كورسەتەدى. ءۇشىنشى قانداسىمىز بوكسشى توقتاربەك تاڭاتقان ۇلى. بۇل ازامات 75 كەلىگە دەيىنگى سالماق دارەجەسىندە سايىسادى.
بەكەن قايرات ۇلى,
"ەگەمەن قازاقستان"
سۋرەتتە بۇلبۇل مۇراتقىزى