قوعامنىڭ از قامتىلعان مۇشەلەرى قاي كەزدە دە قولداۋعا ءزارۋ. سونىمەن قاتار اۋىلدى اباتتاندىرۋ, تۇرعىندارعا كومەك كورسەتۋ سياقتى دەمەۋشىلىك جۇمىستار دا ناعىز اتىمتاي جومارتتىڭ قولىنان كەلەتىن دۇنيە بولسا كەرەك. بۇگىندە اۋليەاتا وڭىرىندە كوپشىلىككە كومەك قولىن سوزىپ, تۇرعىندار تىلەگىنە قۇلاق اسىپ جۇرگەن ازاماتتار بارشىلىق.
جۋىردا ت.رىسقۇلوۆ اۋداندىق ىشكى ساياسات ءبولىمىنىڭ ۇيىمداستىرۋىمەن اۋداندىق م.وزبەكوۆ اتىنداعى مادەنيەت ۇيىندە «جومارت جۇرەك» سىيلىعىنىڭ لاۋرەاتتارىن سالتاناتتى قۇتتىقتاۋ ءراسىمى ءوتتى. وسى ۋاقىتقا دەيىن جارلىسۋ اۋىلىنا بالاباقشا, ينتەرنات, مەشىت, اللەيا, تۇرعىن ءۇي جانە وزگە دە الەۋمەتتىك نىساندار سالىپ بەرگەن جەرگىلىكتى «شاۋشەن» شارۋا قوجالىعىنىڭ باسشىسى سايرانباي دونەنباەۆ «جىل مەتسەناتى» اتالىمىنا لايىق دەپ تانىلدى.
ال كوكدونەن اۋىلىنداعى از قامتىلعان جانە كوپبالالى وتباسىلارىنا كومەك كورسەتىپ, سونداي-اق اۋىلعا مەشىت سالىپ, سول اۋىل مەشىتىنە, اۋىلدىق مادەنيەت ۇيىنە دەمەۋشىلىك جاساپ, اۋىل اقساقالدارىن استانا جانە الماتى قالالارىنىڭ كورىكتى جەرلەرىن ارالاتۋعا قولداۋ كورسەتكەن ازاماتحان امىرتاەۆ «تۋعان ولكە» اتالىمىنىڭ يەگەرى اتاندى.
سونىمەن قاتار اباي اۋىلىنداعى از قامتىلعان جانە كوپبالالى وتباسىلاردى كوگىلدىر وتىنمەن قامتاماسىز ەتۋگە ءوز ەسەبىنەن دەمەۋشىلىك جاساعان, الەۋمەتتىك كومەككە مۇقتاج وتباسىلارعا جىل سايىن 300 مىڭ تەڭگە كولەمىندە الەۋمەتتىك كومەك كورسەتىپ كەلە جاتقان ء«سۇيىن» شارۋا قوجالىعىنىڭ باسشىسى ءاليحان بارمەنقۇلوۆ, قوراعاتى اۋىلىنداعى از قامتىلعان وتباسىلاردىڭ بالالارىنا دەمەۋشىلىك كومەك كورسەتىپ كەلە جاتقان «اققاينار» شارۋا قوجالىعىنىڭ جەتەكشىسى سۇلۋكۇل دالىباەۆا, قۇلان اۋىلىنداعى «سۇلتان» ورتالىق مەشىتىنىڭ سالىنۋىنا دەمەۋشىلىك جاساعان, سونداي-اق ش.ءۋاليحانوۆ اتىنداعى شاعىن ورتالىقتا ورتا مەكتەپتىڭ الەۋمەتتىك تۇرعىدا از قامتىلعان وتباسىلارىنىڭ بالالارىنا تۇراقتى كومەك كورسەتىپ كەلە جاتقان ت.رىسقۇلوۆ اۋدانىنىڭ قۇرمەتتى ازاماتى ءسابيت سادىقوۆ, اۋدانداعى الەۋمەتتىك از قامتىلعان وتباسىلارىنا قايىرىمدىلىق كومەك بەرۋمەن اينالىسىپ كەلە جاتقان «قۇلان جولدارى» جاۋاپكەرشىلىگى شەكتەۋلى سەرىكتەستىگىنىڭ باسشىسى قونىسباي ساعىنبەكوۆ, I جانە II توپ مۇگەدەكتەرىنە قايتارىمسىز كومەك كورسەتىپ كەلە جاتقان «تازالىق» جەكە كاسىپكەرلىگىنىڭ ءتورايىمى سوفيا كاناروۆا جانە جاقسىلىق اۋىلىنداعى ق.سۇلتانبەكوۆ اتىنداعى ورتا مەكتەپكە ءپان كابينەتىن جاساقتاپ, سىيعا تارتقان مۇرات بايتىكوۆ سياقتى كاسىپكەر ازاماتتار «جۇرەكتەن جۇرەككە» اتالىمىمەن ماراپاتتالدى.
سونداي-اق اتالعان شارادا «جىلدىڭ ۇزدىك ۇيىمى» نوميناتسياسىن اۋدان ورتالىعى قۇلان اۋىلىنداعى مەكتەپتەر مەن الەۋمەتتىك از قامتىلعان وتباسىلارعا تۇراقتى دەمەۋشىلىك كورسەتىپ جۇرگەن «قۇلان ەنەرگو-جىلۋ» مەكەمەسى جەڭىپ السا, «ەرەن ەرىكتىلىك» اتالىمىنا مۇمكىندىگى شەكتەۋلى ازاماتتارعا جانە قاراۋسىز قالعان وتباسى مۇشەلەرىنە دەمەۋشىلىك كورسەتىپ جۇرگەن «ەلاي – قۇلان» قوعامدىق بىرلەستىگىنىڭ توراعاسى مارلان ادەنوۆ, ال «باتىل جۇرەك» نوميناتسياسىنا ءابجاپار اۋىلىنداعى سۋ تاسقىنى كەزىندە اۋىلداستارىنا ازاماتتىق كومەگىن بەرگەن ازامات الىبەك انتاەۆ لايىق دەپ تانىلدى.
حاميت ەسامان,
«ەگەمەن قازاقستان»
جامبىل وبلىسى