ورتالىق افريكا رەسپۋبليكاسىندا رەسەيلىك ءۇش جۋرناليست وققا ۇشتى. رەسەي سىرتقى ىستەر مينيسترلىگىنىڭ اقپاراتىنا سايكەس, 30 شىلدە كۇنى ەل استاناسى بانگيدەن 300 كم جەردەگى سيبيۋ قالاسىنىڭ ماڭىنان جۋرناليستىك قۇجاتى بار ءۇش ادامنىڭ ءمايىتى تابىلعان.
كەيىن قازا تاپقانداردىڭ اتالعان ەلگە رەسەيلىك اسكەريلەر جايىندا فيلم تۇسىرۋگە بارعان كيريلل رادچەنكو, الەكساندر راستورگۋەۆ جانە ورحان دجەمال ەكەندىگى انىقتالىپ وتىر.
وسى جاعداياتقا بايلانىستى رەسەي سىرتقى ىستەر مينيسترلىگىنىڭ رەسمي حابارلاماسىندا «وكىنىشكە قاراي رەسەي ەلشىلىگى ورتالىق افريكا رەسپۋبليكاسىنا رەسەيلىك جۋرناليستەردىڭ كەلگەندىگىنەن حابارسىز بولدى. قازىر ديپلوماتيالىق ميسسيا وكىلدەرى قايعىلى وقيعانىڭ ءمان-جايىن انىقتاۋ جانە مايىتتەردى ەلگە جەتكىزۋ ماقساتىندا جەرگىلىكتى قۇقىق قورعاۋ ورگاندارىمەن جانە مەملەكەتتىك قۇرىلىمدارمەن تىعىز جۇمىس جاساۋدا», دەلىنگەن.
مارقۇمدارعا جاقىن ادامداردىڭ بۇقارالىق اقپارات قۇرالدارىنا حابارلاۋىنشا, رەسەيلىكتەر مىنگەن اۆتوكولىك بەلگىسىز قارۋلى ادامداردىڭ شابۋىلىنا تاپ بولعان. وتكىزۋ بەكەتىنە تاياعان كولىككە تاسادان وق اتىلىپ, بۇل شابۋىلدان تەك كولىك جۇرگىزۋشىسى عانا امان قالعان.
«ينتەرفاكس» اگەنتتىگىنىڭ بولجامىنشا, قاسكويلەر اۆتوكولىككە توناۋ ماقساتىندا شابۋىلداۋى مۇمكىن.
قازا تاپقان ورحان دجەمال 51 جاستا. ول ءار ۋاقىتتارى «ۆەچەرنيايا موسكۆا», «نەزاۆيسيمايا گازەتا», «نوۆايا گازەتا» جانە باسقا دا باسىلىمداردا ەڭبەك ەتكەن. اسكەري ءتىلشى رەتىندە سوعىس ءورتى ورشىگەن سولتۇستىك كاۆكاز, وڭتۇستىك وسەتيا, اۋعانستان, يراك پەن سيرياداعى شايقاستاردىڭ ورتاسىنا بارىپ حابار تاراتقان.
سونداي-اق 47 جاستاعى رەجيسسەر الەكساندر راستورگۋەۆ پەن 33 جاستاعى وپەراتور كيريلل رادچەنكونىڭ دا نەبىر شيەلەنىسكەن ايماقتاردا جۇمىس تاجىريبەسى بار ماماندار ەكەندىگى بەلگىلى بولدى.
جالپى, ورتالىق افريكا رەسپۋبليكاسىندا سوعىس ءورتى 2013 جىلى تۇتانعان بولاتىن. سوڭعى بەس جىلدىقتا ەلدەگى بيلىك قولدان-قولعا ءوتىپ, ايماققا بۇۇ-نىڭ بىتىمگەرلىك كۇشى دە ەنگىزىلگەن ەدى. وسىعان قاراماستان رەسپۋبليكادا قارۋلى قاقتىعىستار تولاستاماي تۇر.
«شەكاراسىز رەپورتەرلەر» حالىقارالىق ۇيىمىنىڭ مالىمەتتەرىنە سۇيەنسەك, وتكەن جىلى الەم بويىنشا 65 جۋرناليست مەرت بولعان. ۇيىمنىڭ دەرەكتەرىنە قاراعاندا, بۇقارالىق اقپارات قۇرالدارى وكىلدەرىنىڭ قىزمەتى ءۇشىن سيريا, مەكسيكا, اۋعانستان, يراك جانە فيليپپين مەملەكەتتەرى قاۋىپتى سانالادى.
سەرىك ابدىبەك,
«ەگەمەن قازاقستان»