جاكارتادادا الاۋى تۇتاناتىن جازعى ازيا ويىندارىندا تاەكۆوندودان قازاقستاننىڭ ۇلتتىق كومانداسى قانداي قۇرامدا كۇش سىناساتىنى بەلگىلى بولدى.
ەرلەر مەن ايەلدەر اراسىندا وتەتىن ايتۋلى دودادا ەلدوس ىسقاق, قازىبەك باقتيار ۇلى, ەراسىل قايىربەك, نۇرلان مىرزاباەۆ, رۋسلان جاپاروۆ, اينۇر ەسبەرگەنوۆا, فاريزا الدوڭعاروۆا, مارجان تولەپبەرگەنوۆا, اقساۋلە ەرقاسىموۆا جانە دەنيز جانسەلگە سەنىم ارتىلىپ وتىر. سونداي-اق پۋمسەدەن وتەتىن جارىستا رۋسلان ماناسباەۆ, ەرلان نۇركانوۆ, ارتەم شەلكوۆ جانە ۆياچەسلاۆ چەن ونەر كورسەتەدى.
قازىرگى كەزدە جەرلەستەرىمىز وڭتۇستىك كورەيانىڭ تەدجۋن قالاسىندا وقۋ-جاتتىعۋ جيىنىن وتكىزۋدە. سول جەردە ولار 14 تامىزعا دەيىن جاتتىعادى. ۇلتتىق كوماندامىزدىڭ باس باپكەرى باتىربەك ەسداۋلەتوۆتىڭ ايتۋىنشا, ازياداعا سوڭعى دايىندىق ويداعىداي وتۋدە. سپورتشىلارىمىزدىڭ كوڭىل-كۇيى جاقسى, بارلىعى دا بابىندا. جاكارتادا قازاقستاندىق تاەكۆوندوشىلاردىڭ بىرنەشە سالماق دارەجەسى بويىنشا جەڭىس تۇعىرىنا كوتەرىلۋگە مۇمكىندىكتەرى بار. ءوز شاكىرتتەرى اراسىنان بىلىكتى باپكەر اسا اۋىر سالماقتاعى رۋسلان جاپاروۆ پەن جانسەل دەنيز جانە 80 كەلى سالماق دارەجەسىندەگى نۇرلان مىرزاباەۆتىڭ باس جۇلدە ءۇشىن تالاسۋعا ءازىر ەكەنىن ايتتى.
وتاندىق تاەكۆوندوشىلاردىڭ سوڭعى ءۇش ازيا ويىندارىنداعى ناتيجەلەرىنە زەر سالاتىن بولساق, 2006 جىلى دوحادا رەنات قۇرالباەۆ پەن ارمان شىلمانوۆ قولا مەدالدى يەلەندى. 2010 جىلى گۋانجوۋدا فەرۋزا ەرگەشوۆا كۇمىس السا, ارمان شىلمانوۆ پەن گۇلفايرۋز ايتمۇحامبەتوۆا ءۇشىنشى ورىنعا تابان تىرەدى. 2014 جىلى ينچحوندا نۇرسۇلتان ماماەۆ ەكىنشى ساتىعا جايعاسسا, قايرات سارىمساقوۆ قولاعا قول سوزدى.
عالىم سۇلەيمەن,
«ەگەمەن قازاقستان»