بيىل «قازاقستاننىڭ ۇزدىك تاۋارى» وبلىستىق كورمە-بايقاۋى قوستانايداعى جاڭا تۇرعىن اۋدانعا سالىنعان اينالاسى اتشاپتىرىم «قوستاناي-پلازا» ساۋدا-ويىن-ساۋىق كەشەنىندە ءوتتى. ۇزىننان ۇزاق جايىلعان كورمەدە وڭىردەن شىعىپ جاتقان ءونىمنىڭ ءتۇر-ءتۇرىن كورۋگە بولادى.
ءسۇت, ۇن ونىمدەرىن شىعاراتىن كاسىپورىندار تۇسىنا توقتاعان كەلۋشىلەر باعاسىن عانا سۇرايدى. كورمە سورەسىنەن ورىن العان ساپالى ىرىمشىكتىڭ دە, نان ونىمدەرىنىڭ دە باسەكە بايراعىن كوتەرىپ, «بايگەمدى شاپپاي بەر» دەپ تۇرعانى ءمالىم. جۇرت شانىشقىعا شانىشقان ىرىمشىكتىڭ تۇرلەرىنەن, كەسەدەگى قىمىزدان, شۇباتتان جانە مامىر ايىنىڭ بالىنان قاسىقتاپ ءدام تاتىپ كورىپ, «كەرەمەت!» دەگەن يشاراسىن باس بارماقپەن ءبىلدىرىپ جاتىر. دەگەنمەن, بيىلعى كورمە-بايقاۋدا يننوۆاتسيالىق ونىمدەر ساراپشىلاردىڭ دا, قوستانايلىقتاردىڭ دا نازارىن اۋداردى. «گەرمەس-4» جاۋاپكەرشىلىگى شەكتەۋلى سەرىكتەستىگىنىڭ تۇيىرشىكتەلگەن مال جەمىن شىعارىپ جاتقانىنا ءبىر جىلدىڭ عانا ءجۇزى بولدى. وسى قىسقا ۋاقىت ىشىندە ولاردىڭ ءونىمىن تۇركيا, رەسەي, ءتىپتى اۋعانستان الىپ ۇلگەردى. قوسپا جەم قوستاناي وڭىرىندە وسەتىن ءداندى داقىلداردىڭ كەبەگىنەن, دانىنەن جاسالادى.
– قازاقستاننىڭ وڭتۇستىك وڭىرلەرىنە دە جىبەرىپ جاتىرمىز, ءوزىمىزدىڭ ءوڭىر دە الادى. مالعا جۇعىمدىلىعىمەن قاتار, تاسىمالى دا وڭاي, اناۋ ايتقانداي توگىلىپ, شاشىلمايدى, – دەيدى كاسىپورىن باسشىسى دميتري يشيۆانوۆ. كاسىپورىن 20 ادامعا جۇمىس ورنىن بەردى.
دەنيسوۆ اۋدانىنداعى «يسكرا» شارۋا قوجالىعىنىڭ جەتەكشىسى قۇدايبەرگەن بيسەنباەۆ ءتۇسى كۇلگىن كارتوپ ەگۋدى باستادى. وبلىستاعى بەلگىلى عالىم-سەلەكتسيونەر اندرەي ۋدوۆيتسكيمەن بىرىگىپ شىعارىلعان سۇرىپتىڭ ازىقتىعىمەن قاتار ەمدىك قاسيەتى كوپ. قازىر قانت ديابەتىمەن اۋىراتىندار ءجيى كەزدەسەدى. اسىرەسە وسى قاۋىپتى سىرقاتتان زارداپ شەگەتىن بالالاردىڭ قاتارى دا كوبەيىپ بارادى. مىنە, وسىنداي ناۋقاستار ءۇشىن كراحمالى از وسى كۇلگىن كارتوپ داستارحاننان ۇزبەيتىن تاعام كورىنەدى.
– بۇل كارتوپتىڭ قۇرامىنداعى انتيوكسيدانت قىزاناقتان دا اسىپ تۇسەدى. ال ونىڭ قاتەرلى ىسىككە قارسى كۇرەسەتىن قاسيەتى بار, – دەيدى قۇدايبەرگەن بيسەنباەۆ. تاران اۋدانىنان كەلگەن المات نۇرماحانوۆ 13 باس تۇيە ءوسىرىپ, شۇبات ساتۋدى باستادى. ونىڭ جۇنىنەن كورپە, كورپەشە تىگىپ, تايلاقتىڭ جۇنىنەن بەلدەمە, ش ۇلىق توقىپ ساتادى. ەڭ باستىسى, قىسى قاتتى ءارى ۇزاق وڭىرگە تۇيەنى جەرسىندىرىپ كەلەدى.
كورمەنى ارالاعان وبلىس اكىمى ارحيمەد مۇحامبەتوۆ بيىل ءتورتىنشى رەت وتكەن كورمە-بايقاۋداعى ءونىمنىڭ ءار الۋاندىعىن ايتتى.
– بيىل وبلىس اكىمدىگىنىڭ «اتامەكەن» كاسىپكەرلەر پالاتاسىنىڭ وبلىستىق فيليالىمەن بىرلەسىپ وتكىزگەن «قازاقستاننىڭ ۇزدىك تاۋارلارى» كورمە-بايقاۋىنا 31 كاسىپورىن قاتىسىپ وتىر. كاسىپكەرلەر ءۇشىن كورمە-بايقاۋعا قاتىسۋدىڭ پايداسى كوپ. بۇل كاسىپكەردى ىزدەنىسكە جەتەلەيدى, كوپ نارسەنى كورەدى, سالىستىرادى, الداعى جاقسى ىستەرگە ۇمتىلدىرادى. وبلىستاعى «بايان سۇلۋ» كونديتەر فابريكاسى, «دەپ» ءسۇت زاۋىتى سەكىلدى باسقا دا ايگىلى كاسىپورىندار وسىنداي بايقاۋلارعا قاتىسۋ ارقىلى ءوز ونىمدەرىنىڭ مويىندالۋىنا قول جەتكىزدى. ولار تالاي رەت جەڭىمپاز اتاندى. مىنە, قازىر ولاردىڭ ساپالى ونىمىنە سۇرانىس وتە ۇلكەن, ەكسپورتتىق الەۋەتى دە جوعارى, – دەدى ارحيمەد بەگەجان ۇلى.
وبلىس بويىنشا بۇگىندە كاسىپكەرلەردىڭ سانى 50 مىڭنان اسادى. ولار بيىلعى ءبىرىنشى توقساندا 353 ميلليارد تەڭگەنىڭ ءونىمىن شىعارعان. بۇل وتكەن جىلدىڭ وسى ۋاقىتىمەن سالىستىرعاندا 25 پروتسەنتكە كوپ.
كورمە-بايقاۋدا ۇزدىكتەر ءۇش اتالىم بويىنشا ىرىكتەلىپ, 9 كاسىپورىن تاڭدالدى. «وندىرىستىك ماڭىزى بار ۇزدىك تاۋارلار» اتالىمى بويىنشا وسى «گەرمەس-4» جشس, ماشينا قۇراستىراتىن «سارىارقا اۆتوپروم» زاۋىتى, مەديتسيناعا قاجەتتى تازالاۋ حيميالىق ءونىمىن شىعاراتىن «مەديدەز» كاسىپورنى ۇزدىكتەر دەپ تانىلدى. «حالىق تۇتىناتىن ۇزدىك تاۋارلار» اتالىمى بويىنشا «دومباەۆا» جەكە كاسىپورىنى, «سوداليت» زەرگەرلىك كومپانياسى, «Triera KZ» كاسىپورىنى جۇلدەلى ورىنداردى ءبولىستى. ال «ۇزدىك ازىق-ت ۇلىك تاۋارلارى» اتالىمىندا «پيك فيرماسى» جشس, «قاراگۋلينا» جك جانە «اكۆا اراسان» جشس جاقسىلار قاتارىنان كورىندى.
جەڭىمپازدار «قازاقستاننىڭ ۇزدىك تاۋارلارى» رەسپۋبليكالىق بايقاۋىندا باعىن سىنايتىن بولادى.
ءنازيرا جارىمبەت,
«ەگەمەن قازاقستان»
قوستاناي