قوستانايدا «قازاقستاننىڭ ۇزدىك تاۋارلارى» كورمە-بايقاۋى ءوتتى

«جىل سايىن بۇل بايقاۋعا قاتىسۋعا نيەت بىلدىرگەن كاسىپكەرلەر قاتارى كوبەيىپ كەلەدى. كورمە-بايقاۋعا قاتىسقان كاسىپورىندار الداعى ۋاقىتتا ءونىم ساپاسىن كوتەرەدى, ويتكەنى كورمەدە ولار ۇزدىكتەردەن ۇيرەنەدى, كورەدى. رەسپۋبليكاعا جانە ودان دا تىس جەرلەرگە ءونىمى بەلگىلى «بايان سۇلۋ» كونديتەر فابريكاسى, «دەپ» ءسۇت زاۋىتى, «اگروماش حولدينگ» ماشينا قۇراستىرۋ زاۋىتى وسىنداي كورمەلەرگە سان مارتە قاتىسىپ, وزدەرىن دالەلدەگەن. قازىر ەكسپورتتىق الەۋەتى ارتقان ولاردىڭ ونىمىنە سىرتتان سۇرانىم كۇشتى» دەدى ارحيمەد بەگەجان ۇلى.

وبلىس وڭىرىندە 50 مىڭنان اسا كاسىپكەر بار, ولار جىلدىڭ باستاپقى ءۇش ايىندا 353 ميلليارد تەڭگەنىڭ ءونىمىن شىعارعان. ول وتكەن جىلدىڭ وسىنداي مەرزىمىمەن سالىستىرعاندا 25 پايىزعا ارتىق. كورمەگە قاتىسقان ونىمدەردىڭ جاڭالىعى دا كوپ بولدى. «گەرمەس-4» كاسىپورنىنىڭ مالدىڭ تۇيىرشىك جەمىن شىعارعانىنا ءبىر جىلدىڭ عانا ءجۇزى بولدى. ال ولاردىڭ ءونىمى وبلىس, رەسپۋبليكادان اسىپ, تۇركيا, رەسەيگە جونەلتىلەدى. مال شارۋاشىلىعىن دامىتۋ ءۇشىن بۇل جاقسى يننوۆاتسيالىق جاڭالىقتىڭ ءبىرى دەۋگە بولادى. ونىڭ باعاسى دا مال باققان شارۋاعا اسا قىمبات ەمەس سەكىلدى. جەمنىڭ ءبىر تونناسى 40 مىڭ تەڭگەگە تۇسەدى.

كورمە-بايقاۋدا «وندىرىستىك ماڭىزى بار ۇزدىك تاۋارلار» اتالىمى بويىنشا وسى «گەرمەس-4» كاسىپورنى ءبىرىنشى ورىن الدى. سودان كەيىن ماشينا قۇراستىراتىن «سارىارقا اۆتوپروم» زاۋىتى ەكىنشى, مەديتسيناعا قاجەتتى تازالاۋ حيميالىق ءونىمىن شىعاراتىن «مەديدەز» كاسىپورنى ءۇشىنشى ورىندى الدى. «حالىق تۇتىناتىن ۇزدىك تاۋارلار» اتالىمى بويىنشا «دومباەۆا» جەكە كاسىپورنى ءبىرىنشى ورىنعا, «سوداليت» زەرگەرلىك كومپانياسى ەكىنشى, "Triera KZ" كاسىپورنى ءۇشىنشى ورىنعا لايىقتالدى. ال «ۇزدىك ازىق-ت ۇلىك تاۋارلارى» اتالىمىنىڭ جۇلدەلى ورىندارىن «پيك فيرماسى» جشس, «قاراگۋلينا» جك جانە «اكۆا اراسان» جشس ءبولىستى.

جەڭىمپازدار «قازاقستاننىڭ ۇزدىك تاۋارلارى» رەسپۋبليكالىق بايقاۋىندا باعىن سىنايتىن بولادى.

ءنازيرا جارىمبەت,

«ەگەمەن قازاقستان»

قوستاناي