قىزىلوردا وبلىسىندا جۇقپالى اۋرۋلار تومەندەگەن

دەپارتامەنت باسشىسى وبلىس تۇرعىندارى اراسىندا كۇيدىرگى, سال, تىرىسقاق, ءىش سۇزەگى, قىلاۋ, وبا سەكىلدى اۋرۋلار تىركەلمەگەندىگىن ايتادى. قۋانىشقا وراي, جۇقپالى ىندەت كورسەتكىشى تومەندەگەن. ماسەلەن, وتكەن جىلدىڭ وسى مەرزىمىمەن سالىستىرعاندا جۇقپالى اۋرۋلاردىڭ ىشىندە ليامبليوز – 3,7 ەسەگە, جۇقپالى ىشەك اۋرۋلار توبى – 43 پروتسەنتكە, تاماقتان ۋلانۋ جاعدايلارى – 21,4, العاش انىقتالعان سوزىلمالى ۆيرۋستى گەپاتيتتەر – 6, وكپە تۋبەركۋلەزى, ديزەنتەريا, ءجىتى ۆيرۋستى گەپاتيت س ءتۇرى 5 پروتسەنتكە ازايعان ەكەن.

– جالپى, وڭىردە وسى جىلدىڭ التى ايىندا بىرقاتار جۇقپالى اۋرۋلار اۋرۋشاڭدىعى بويىنشا تۇراقتى ەپيدەميولوگيالىق احۋال قالىپتاسۋدا. جىل باسىنان بەرى مەنينگوكوكك ينفەكتسياسى بويىنشا 1 عانا جاعداي تىركەلدى. بۇل جاعدايعا بايلانىستى قوعامدىق دەنساۋلىق ساقتاۋ جانە وبلىستىق دەنساۋلىق ساقتاۋ سالا ماماندارى تاراپىنان كەشەندى سانيتاريالىق-پروفيلاكتيكالىق, سونداي-اق, سانيتارلىق-ەپيدەمياعا قارسى ءىس-شارالار ۇيىمداستىرىلىپ جۇرگىزىلدى. بۇگىنگى تاڭدا وبلىس تۇرعىندارى اراسىندا اتالعان ينفەكتسيا جۇقتىرعان جاڭا دەرەكتەر تىركەلمەدى. قازىرگى ساتتە ءاربىر اۋدان اۋماعىندا سىرقاتتانۋشىلىق كورسەتكىشتەرىنە, ەپيدەميالىق ماڭىزدى نىسانداردىڭ سانيتاريالىق جاعدايىنا كۇندەلىكتى مونيتورينگ جۇرگىزىلىپ, بارلىق جاعداي باقىلاۋعا الىنىپ وتىر, – دەدى ۇلبولسىن ومىربايقىزى.

ارينە جۇقپالى ىندەتتەر ازايدى دەپ ارقانى كەڭگە سالۋعا بولمايدى. بۇگىندە اۋە اينالىپ جۇرگە تۇسكەندەي ىستىق. مۇندايدا كەنەلەردىڭ بەلسەندىلىگى كۇشەيەتىندىگى بەلگىلى. كونگو-قىرىم قاندى بەزگەگى سياقتى قاۋىپتى دەرتتەن ساقتانباسا بولمايدى. ماماندار تابيعي وشاقتاردى زەرتتەۋ كەزىندە 3852 كەنەنىڭ106-ىنان كقتق-نىڭ ۆيرۋسىن انىقتاعان ەكەن. بۇل, ارينە, جاقسى دەرەك ەمەس. ەپيدەميولوگتار سانيتارلىق جۇمىستاردى كۇشەيتىپ جاتىر.

باقتيار تايجان,

«ەگەمەن قازاقستان»

قىزىلوردا وبلىسى