بۇگىندە ارامىزدا ۇلى وتان سوعىسى ارداگەرلەرىنىڭ قاتارى وتە سيرەپ كەتكەنى بەلگىلى. كوپتەگەن ەلدى مەكەندەردە سوعىس ارداگەرلەرى ءبىرلى-جارىم عانا نەمەسە ءتىپتى قالعان دا جوق. قوستاناي قالاسىندا تۇراتىن ۇلى وتان سوعىسىنىڭ ارداگەرى جانە قوستاناي وبلىسى بويىنشا قىلمىستىق-اتقارۋ جۇيەسى كوميتەتى دەپارتامەنتىنىڭ زەينەتكەرى, ىشكى ىستەر قىزمەتىنىڭ مايورى ميحايل ستەپانوۆيچ كوندراتەنكو اقساقال 100 جاسقا تولدى.
قوستاناي قالالىق ارداگەرلەر كەڭەسىنىڭ توراعاسى, ءوزى قىزمەت ەتكەن قوستاناي وبلىسى بويىنشا قىلمىستىق اتقارۋ جۇيەسى باستىعىنىڭ ورىنباسارى, ادىلەت پولكوۆنيگى بولات بايجانوۆ, قر ءىىم شىراقبەك قابىلباەۆ اتىنداعى قوستاناي اكادەمياسى باستىعىنىڭ ورىنباسارى, پوليتسيا پولكوۆنيگى ەربول قاپپاسوۆ جانە قوستاناي قالاسى اكىمدىگىنىڭ قىزمەتكەرلەرى ارداگەردىڭ ۇيىنە كەلىپ, ونى جانە وتباسىن ەرەكشە قۋانىشىمەن قۇتتىقتادى.
«قۇرمەتتى ميحايل ستەپانوۆيچ! ءسىزدىڭ ءومىرىڭىز كەيىنگى ۇرپاققا ونەگە, كەلەر ۇرپاققا ۇمىتىلماس تاريح بولارىنا كامىل سەنەمىز. ءسىزدىڭ سۇراپىل سوعىستاعى ەرلىگىڭىز تاريحتا التىن ارىپپەن جازىلدى. وسىنداي باقىتتى عۇمىرىڭىز بار سىزگە زور دەنساۋلىق تىلەيمىز, جان جارىڭىز اننا پەتروۆنامەن باقىتتى ءومىر سۇرە بەرىڭىز», دەدى پوليتسيا پولكوۆنيگى ەربول قاپپاسوۆ.
ميحايل ستەپانوۆيچ 1941جىلدان 1944 جىل ارالىعىندا ۇلى وتان سوعىسىنا قاتىسىپ, بىرنەشە رەت ەرلىك كورسەتكەن. سوعىس اياقتالعان سوڭ 1948 جىلعا دەيىن قاراعاندى قالاسىندا اسكەري تۇتقىندار ءۇشىن لاگەر باسقارماسىندا نۇسقاۋشى قىزمەتىن اتقارعان. 1949 جىلى قاراعاندىداعى تۇتقىندارمەن جۇمىس ىستەگەن. ول 1963 جىلى قوستاناي وبلىسىنا قىزمەتكە اۋىسىپ, قۇسمۇرىن ستانساسىنداعى كولونيادا جەدەل جانە رەجيم جۇمىسى بويىنشا باستىقتىڭ ورىنباسارى بولدى. ميحايل كوندراتەنكو قىزمەتىن جاقسى جانە ادال اتقارعانى ءۇشىن تاربيە جۇمىسىنىڭ ۇزدىگى بەلگىسىمەن بىرنەشە رەت ماراپاتتالعان, «قىزىل جۇلدىز» وردەنى, «ستالينگرادتى قورعاعانى ءۇشىن», «جەڭىستىڭ 20 جىلدىعى» مەدالدەرى جانە «XXX كەڭەس اسكەرى جانە فلوتى», ء«مىنسىز قىزمەتى ءۇشىن 1-دارەجە» جانە باسقا دا كوپتەگەن ماراپاتتارى بار. 1971 جىلى قوستاناي وبلىسى 52-ەتك باستىعىنىڭ ورىنباسارى مىندەتىنەن زەينەتكە شىقتى.
باسىنان وتكەن قيىندىقتارعا قاراماستان, زايىبى اننا پەتروۆنامەن ۇل مەن قىز ءوسىرىپ, قازىرگى ۋاقىتتا نەمەرە جانە شوبەرەلەردىڭ اتاسى. ءبىر عاسىر جاساعان قاريا ءالى دە تىڭ, وتكەن ءومىر ەستەلىكتەرىن ۇمىتپاعان. بۇگىنگى ۇرپاقتىڭ باقىتتى بولۋىن تىلەيدى.
«بالالار قازىر جاقسى زاماندا ءومىر ءسۇرىپ جاتىر. تەك ەڭبەك ەتىپ, وتانعا ادال قىزمەت ەتۋى كەرەك, سوندا ەل دە, مەملەكەت تە مىقتى بولادى», دەدى عاسىر جاساعان اقساقال.
ءنازيرا جارىمبەت
«ەگەمەن قازاقستان»
قوستاناي