وبلىس ورتالىعىنداعى «دوستار» مادەنيەت سارايىندا «رۋحاني جاڭعىرۋ» باعدارلاماسىن جۇزەگە اسىرۋ شەڭبەرىندە وبلىستىق مۇراعاتتار مەن قۇجاتتامالار باسقارماسىنىڭ ۇيىمداستىرۋىمەن قولعا الىنعان كوشپەلى كورمەنىڭ تۇساۋى كەسىلدى.
سالتاناتتى راسىمدە وبلىس اكىمىنىڭ ورىنباسارى اينا ءمىسىرالىموۆا ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەر جايىن سارالاپ ايتا كەلە, ەڭ الدىمەن ەل تاريحىن ەكشەپ, زامانداستارىمىزدىڭ نازارىنا ۇسىنۋدىڭ ايرىقشا ماڭىزدى ەكەندىگىنە توقتالدى. اركىم ءوزىنىڭ تۋعان ولكەسىنىڭ وتكەن تاريحىن سانامەن سالماقتاپ, قاپىسىز تاني بىلگەنى ءجون. وسى ورايدا, بۇگىنگى كوشپەلى كورمەدە وبلىستىڭ 17 اۋدانى مەن ەكى قالاسىنىڭ كونە تاريحى كورىنىس تاپقاندىعىن ايتا كەتكەن ءجون. ءار اۋدان بويىنشا جىكتەلگەن كورمە پاراقشالارىندا ۋاقىت تابىنان سارعايعان ماڭىزدى قۇجاتتار قويىلىپتى. كونە سۋرەتتەر ۋاقىت تابىمەن كومكەرىلگەن سىر كومبەسىن ايقارا اشىپ, كورەرمەننىڭ كوز الدىنا كونە ءداۋىردىڭ تىنىس-تىرشىلىگىن جەتكىزىپ تۇر. دەرەك پەن دايەك تولىمدى.
– كورمەنى ارحيۆ قويماسىنداعى بۇرىن-سوڭدى ەل نازارىنا تۇسە بەرمەگەن سونى دەرەكتەرمەن بايىتتىق, – دەيدى باسقارما باسشىسى مارزيات توحاەۆا, –بۇل جوبا وبلىس تۇرعىندارىنا ەستەن شىعا باستاعان ەسكى كەزەڭنىڭ كوزدىڭ قاراشىعىنداي ساقتالىپ قالعان دەرەكتەرى ارقىلى اقيقات تاريحتىڭ تاعىلىمىن ۇسىناتىن بولادى. سول ارقىلى ءبىز ءار ءوڭىر تۇرعىندارىنا كوكشەتاۋ مەن قاراوتكەلدىڭ كەڭ دالاسىن جايلاعان جالپاق ەلدىڭ ءبىر عاسىرلىق تاريحىن تالداپ, ۇعىندىرا وتىرىپ, تۇتاستىقتى قالىپتاستىرۋعا تىرىسامىز. ءبىرىنشى كەزەكتە كوشپەلى كورمە ءاربىر اۋداندا بولىپ, كوپشىلىكتى جادىگەرلەرمەن تانىستىراتىن بولادى. بۇل جەردە ەلدىڭ وتكەنى عانا ەمەس, بۇگىنى دە بار. تاۋەلسىزدىك جىلدارىنداعى جاسامپاز ەلدىڭ جارقىن ەڭبەگى دە كەڭىنەن كورىنىس تاپقان.
كوپشىلىك تاراپىنان «رۋحاني جاڭعىرۋ» باعدارلاماسى بويىنشا قولعا الىنىپ جاتقان جوبالاردىڭ بارىسى ايتارلىقتاي قىزىعۋشىلىق تۋعىزدى. كوشپەلى كورمەنىڭ العاشقى ساپارى زەرەندى اۋدانىنان باستالاتىن بولادى.
بايقال ءبايادىل,
«ەگەمەن قازاقستان»
اقمولا وبلىسى