سەناتور ەۋروپالىق پارلامەنتشىلەرگە قازاقستاننىڭ جاھاندىق باستامالارى تۋرالى ايتتى

پولشا پارلامەنتاريزمىنىڭ 550 جىلدىعىنا ارنالعان فورۋمدا ت.مۇقاشەۆ قازاقستان-پولشا ارىپتەستىگىنىڭ بۇرىننان جالعاسىپ كەلە جاتقان داستۇرلەرىن جوعارى باعالادى. سەناتور ءومىرى مەن شىعارماشىلىق ىزدەنىستەرىن قازاقستانعا ارناعان پولشانىڭ اتاقتى عالىمدارى ادولف يانۋشكەۆيچ, گۋستاۆ زەلينسكي, برونيسلاۆ زالەسكي جانە الەكساندر زاتاەۆيچتەر ءبىزدىڭ حالقىمىزدىڭ جادىندا ماڭىزدى ءىز قالدىرعانىن اتاپ ءوتتى.

بۇگىنگى تاڭدا, سەناتور اتاپ وتكەندەي, ءبىزدىڭ ەلدەرىمىز اراسىندا ساياسي, ەكونوميكالىق جانە گۋمانيتارلىق سالالاردا جەمىستى ىنتىماقتاستىق كەڭەيىپ كەلەدى. حالىقارالىق ۇيىمدار اياسىندا, ونىڭ ىشىندە بۇۇ قاۋىپسىزدىك كەڭەسىندە تۇراقتى ەمەس مۇشەلەرى بولىپ تابىلاتىن قازاقستان مەن پولشانىڭ اراسىندا ءوزارا تىعىز قارىم-قاتىناس قالىپتاستى. ت.مۇقاشەۆ قازاقستانداعى 32 مىڭ پولياك دياسپوراسى ەكى ەل اراسىنداعى دوستىق كوپىرى ەكەنىن ايتتى. بايانداماشى ەكى مەملەكەتتىڭ پارلامەنتارالىق ءوزارا ءىس-قيمىلىنىڭ كەلەشەگىنە دە توقتالدى.

ت. مۇقاشەۆ قوعامداعى الۋان ءتۇرلى سالانى جاڭعىرتۋ جونىندەگى  اۋقىمدى باستامالار, ونىڭ ىشىندە «قازاقستان-2050» ستراتەگياسىن, «نۇرلى جول», «رۋحاني جاڭعىرۋ» باعدارلامالارىن ىسكە اسىرۋ جونىندەگى قازاقستان زاڭ شىعارۋشىلارىنىڭ قىزمەتى تۋرالى ەۋروپالىق پارلامەنتشىلەردى حاباردار ەتتى.

ونىڭ سوزىندە قازاقستاننىڭ حالىقارالىق ارەناداعى نەگىزگى باستامالارىنا سيپاتتاما بەرىلدى. «قازاقستان ەلباسىنىڭ يادرولىق قارۋعا قارسى, بەيبىتشىل, گەوەكونوميكالىق كۇش-جىگەرى مەن جاڭالىقتارى حالىقارالىق شيەلەنىستەردى باسەڭدەتۋگە ىقپال ەتەدى, الەمنىڭ بولاشاق قۇرىلىمى تۋرالى ينتەللەكتۋالدىق پايىمداۋلاردى بايىتادى», - دەدى دەپۋتات.

قازاقستاننىڭ مادەنيەتتەر مەن وركەنيەتتەردىڭ جاھاندىق ۇنقاتىسۋلارىن ىلگەرىلەتۋدەگى تاجىريبەسى جينالعانداردىڭ ىقىلاسىن تۋعىزدى. ت. مۇقاشەۆتىڭ ايتۋىنشا, استانانىڭ 20 جىلدىعى اتالىپ وتكەن مەرەيلى جىلدا الەمدىك جانە ءداستۇرلى دىندەر ليدەرلەرىنىڭ VI سەزىن ءوتۋى ءدىني كوشباسشىلار مەن ساياسي قايراتكەرلەردىڭ بەيبىتشىلىك پەن دامۋ جولىنداعى ۇنقاتىسۋلارىن ىلگەرىلەتۋدە ەلىمىزدىڭ وزىندىك ۇلەسى بولادى.