الماتىدا وتكەن سۋ رەسۋرستارىن باسقارۋ جونىندەگى سالاارالىق ىنتىماقتاستىقتى نىعايتۋ مەن دامىتۋعا بايلانىستى ايماقتىق كەڭەستە ورتالىق ازياداعى سۋ ماسەلەسى تالقىلاندى.
سۋ تاپشىلىعى سوڭعى وتىز جىل كولەمىندە ورتالىق ازيا ايماعىن الاڭداتىپ وتىرعان كوكەيكەستى ماسەلە. سالا ماماندارى سۋ ماسەلەسىنىڭ جىلدان-جىلعا ۇشىعىپ وتىرعان سەبەپ-سالدارىن مۇددەلى تاراپتار قىزمەتىندەگى ۇيلەسىمسىزدىكتەر مەن سۋ رەسۋرستارىن باسقارۋداعى ارەكەتتەردىڭ جەتكىلىكسىزدىگىمەن تۇسىندىرەدى.
الماتىداعى ايماقتىق كەڭەستە باس قوسقان بۇۇ, ەقىۇ, ەەك حالىقارالىق ۇيىمدارىنىڭ, قىرعىزستان, رەسەي, قىتاي, موڭعوليا, ءتاجىستان, تۇركىمەنستان جانە وزبەكستاننىڭ رەسمي وكىلدەرى سۋ رەسۋرستارى بويىنشا ايماقارالىق ىنتىماقتاستىق ماسەلەسىن تالقىلاپ, حالىقارالىق سۋدى باعالاۋ ورتالىعىنىڭ باعدارالاماسىنا بايلانىستى ۇسىنىستارىن ورتاعا سالدى. ورتالىق ازيا مەن ايماقتاعى ەلدەردىڭ سۋ قورلارىنىڭ تيىمدىلىگىن ارتتىرۋ, 2030 جىلعا دەيىن سۋ پايدالانۋعا بايلانىستى ءوزارا تاجىريبە الماسۋ كەڭەس بارىسىندا نەگىزىگى ماسەلە رەتىندە قارالدى.
ترانسشەكارالىق سۋ ىنتىماقتاستىعى بۇگىندە ادامزاتتىڭ وركەندەپ, جەر الەمنىڭ گۇلدەنۋى جولىنداعى باستى قادام. سالادا كەلىسىمدەرگە قول جەتكىزۋ الەمدىك قاقتىعىستاردىڭ الدىن الىپ, بەيبىتشىلىك پەن تۇراقتىلىقتى قامتاماسىز ەتۋگە مۇمكىندىك بەرەدى.
حالىقارالىق سۋدى باعالاۋ ورتالىعىن (حسبو) قازاقستاندا اشۋ تۋرالى ەلىمىز ۇكىمەتى مەن ەەك اراسىنداعى مەموراندۋمعا 2017 جىلى قول قويىلعان بولاتىن. حالىقارالىق سۋدى باعالاۋ ورتالىعى ترانسشەكارالىق اعىن سۋلار مەن حالىقارالىق كولدەردى قورعاۋ جانە پايدالانۋ تۋرالى كونۆەنتسياسىنىڭ ەنشىلەس بىرلەسكەن ورگانى بولىپ تابىلادى.
ەلۆيرا سەرىكقىزى,
«ەگەمەن قازاقستان»
الماتى