قازاق مەملەكەتتىك قىزدار پەداگوگيكالىق ۋنيۆەرسيتەتىندە تۇلەكتەرگە ديپلوم تاپسىرۋ ءراسىمى ءوتتى. بيىل وقۋ ورنىن 1538 ستۋدەنت پەن 168 ماگيستر ءبىتىرىپ وتىر, دەپ حابارلايدى وقۋ ورنىنىڭ ءباسپاسوز جانە قوعاممەن بايلانىس ءبولىمى.
تۇلەكتەردىڭ 1020-سى كۇندىزگى, 518-ى سىرتقى ءبولىم بويىنشا ءتامامدادى. ولاردىڭ 276-سى ۇزدىك ديپلوم يەگەرى. پەداگوگيكالىق ءبىلىم مەن عىلىمنىڭ قىر-سىرىن جەتە مەڭگەرىپ, كاسىبي مامان يەسى اتانىپ, ۇلكەن ومىرگە جولداما العاندار قاتارىندا جاراتىلىستانۋ, الەۋمەتتىك-گۋمانيتارلىق, ونەر جانە مادەنيەت, پەداگوگيكا جانە پسيحولوگيا, فيزيكا-ماتەماتيكا, قازاق فيلولوگياسى جانە الەم تىلدەرى فاكۋلتەتتەرىنىڭ تۇلەكتەرى بار.
سالتاناتتى ءراسىم بەلگىلى اقىن عافۋ قايىربەكوۆتىڭ جۇرتشىلىق اراسىندا كەڭىنەن تاراعان, دارا وقۋ ورنىنىڭ ارۋلارىنا ارنالعان «الماتىدا كوشەسى بار گوگولدىڭ...» ولەڭىمەن اشىلدى. جيىننىڭ رەسمي بولىمىندە ۋنيۆەرسيتەت رەكتورى گاۋحار الدامبەرگەنوۆا قۇتتىقتاۋ ءسوز سويلەپ, بىتىرۋشىلەرگە اق جول تىلەدى.
– قىمباتتى جاس تۇلەكتەر! سىزدەر بۇگىن 75 جىلدىق تاريحى بار, وتاندىق جوعارى ءبىلىمنىڭ قارا شاڭىراعى – قىزدار ۋنيۆەرسيتەتىن ءبىتىرىپ, ۇلكەن ومىرگە جولداما العالى وتىرسىزدار! بۇل – بارلىعىمىز ءۇشىن دە ەرەكشە كۇن, ماڭىزدى مەرەكە. ۋنيۆەرسيتەت ۇجىمى ءۇشىن دە, سىزدەردەن ءۇمىت كۇتكەن اتا-انالارىڭىز ءۇشىن دە وتە ۇلكەن قۋانىش. مەملەكەت باسشىسى نۇرسۇلتان نازارباەۆ قازاقستان حالقىنا ارناعان جولداۋىندا: «قازاقستاننىڭ الەمدىك وركەنيەتكە جەتۋدەگى بىردەن-ءبىر دارا جولى – ءبىلىم جۇيەسى. ورتا مەكتەپ – ءبىلىم جۇيەسىنىڭ ەڭ باستى بۋىنى. ورتا مەكتەپتە قالانعان ءبىلىم نەگىزى وقۋشىنىڭ بولاشاعىنا جول اشادى», دەپ اتاپ وتكەن بولاتىن.
«قازىرگى كەزەڭدەگى باستى ماسەلەنىڭ ءبىرى جاڭا تەحنولوگيالاردىڭ دامۋى كەزەڭىندە بولاشاق ۇرپاقتىڭ تاربيەسى مەن ءبىلىم الۋىندا ۇستازداردىڭ اتقاراتىن ءرولى ەرەكشە. ەگەمەن ەلىمىزدىڭ بولاشاعى, ونىڭ الەمدىك وركەنيەتتەگى ءوز ورنى, ەڭ الدىمەن ءبىلىم مەن تاربيەنىڭ باستاۋى – ۇستاز قولىندا» دەگەن ەلباسى ارقاشاندا ۇلتتىڭ بولاشاعى پەداگوگتىڭ قولىندا ەكەندىگىنە باسا ءمان بەرىپ كەلەدى. «ۇستازدار ۇستاحاناسى» اتانعان قىزدار ۋنيۆەرسيتەتىنىڭ تۇلەكتەرىنىڭ قاتارىندا ەسىمدەرى ەلگە تانىمال قوعام قايراتكەرلەرى, مەملەكەتتىك سىيلىقتىڭ لاۋرەاتتارى, بەلگىلى عالىمدار مەن ۇستازدار, داڭقتى سپورتشىلار بار. سىزدەر دە سول شالقار كوشتى جالعاستىرىپ كەلەسىزدەر, – دەدى گاۋحار تورەمۇراتقىزى.
وقۋ ورنىنىڭ باسشىسى تۇلەكتەردىڭ الدىندا تۇرعان باستى مىندەت – ۋنيۆەرسيتەتتەن العان بىلىمدەرىن تاجىربيەمەن ۇشتاستىرا وتىرىپ, ەڭبەك نارىعىندا باسەكەلەستىك قابىلەتى جوعارى كاسىبي تۇلعا بولۋ ەكەندىگىن اتاپ ءوتتى.
– ۇستاز – بولاشاق ۇرپاقتىڭ باعبانى, شاكىرتىنىڭ بويىنا بىلىممەن بىرگە تاربيە ءسىڭىرۋشى, جانىنا جارىق ساۋلە سەۋىپ, كوكىرەگىن نۇرلاندىرۋشى. سىزدەردىڭ باستى ماقساتتارىڭىز ەگەمەن ەلىمىزدىڭ بولاشاق جاستارىن تاربيەلەۋگە, ءبىلىمى مەن بىلىكتىلىگىن ارتتىرۋعا, مەملەكەتىمىزدىڭ دامۋىنا سۇبەلى ۇلەستەرىڭىزدى قوسۋ! ءومىر جولىنداعى ساپارلارىڭىز ءساتتى بولعاي, بولاشاققا باستاعان قادامدارىڭىزعا اق جول تىلەيمىز, – دەدى گاۋحار الدامبەرگەنوۆا.
سونىمەن قاتار, ۋنيۆەرسيتەت رەكتورى ءبىر توپ بىتىرۋشىگە ديپلومدى سالتاناتتى جاعدايدا تابىستادى. ولاردىڭ قاتارىندا وقۋدا وزات, قوعامدىق جۇمىستا بەلسەندىلىك كورسەتكەن 12 ستۋدەنت پەن ماگيستر بار. انمەن اسپەتتەلىپ, كۇيمەن كومكەرىلگەن سالتاناتتى كەش اياسىندا كوپشىلىك الدىندا بارلىق فاكۋلتەت ءبىتىرۋشى تۇلەكتەرى اتىنان ايدانا تىنىشقالي ساحناعا شىعىپ, ۋنيۆەرسيتەت ۇجىمىنا رياسىز العىسىن ءبىلدىردى.
– بارلىعىمىزدىڭ دا العا قويعان ۇلكەن ماقساتىمىز بار. سول ۇكىلەگەن ارماندارىمىزدى ورىنداۋعا ۇمتىلۋدامىز. ءبىزدى ءبىلىم الەمىندە ءوز كاسىبىمىزگە ساي مامان بولىپ قالىپتاسۋعا جول سالعان بارشا ازاماتتارعا العىس ايتا وتىرىپ, بىلىكتى, ءبىلىمدى ۇرپاق تاربيەلەۋ جولىنداعى ۇلاعاتتى ۇستاز ەسىمىن ابىرويمەن الىپ وتۋگە, بولاشاعى باياندى, كەلەشەگى كەمەل باسەكەگە قابىلەتتى ماڭگىلىك ەل – قازاقستاننىڭ قارىشتى دامۋىنا انت ەتەمىز, – دەدى ا. تىنىشقالي.
ايتا كەتەيىك, قازاق مەملەكەتتىك قىزدار پەداگوگيكالىق ۋنيۆەرسيتەتى – ەلىمىزدەگى بىردەن-ءبىر تەك قىزدار وقيتىن جوعارى وقۋ ورنى. ورتا ازيا ايماعىندا مۇنداي وقۋ ورنى جوق. الەمدە دە ساۋساقپەن سانارلىقتاي. ۋنيۆەرسيتەتتىڭ 6 فاكۋلتەتىندەگى 28 كافەدرا باكالاۆريات بويىنشا – 43, ماگيستراتۋرا بويىنشا – 23 جانە PhD دوكتورانتۋرا بويىنشا – 4 ماماندىق نەگىزىندە مۇعالىمدەر دايىندايدى. سونداي-اق, سىرتتاي وقۋ ءبولىمىنىڭ ستۋدەنتتەرى 20 ماماندىق بويىنشا قاشىقتىقتان وقىتۋ تەحنولوگياسىن پايدالانىپ, ءبىلىم الادى. بۇگىندە وقۋ ورنىندا جالپى سانى 7 مىڭعا جۋىق ستۋدەنت, ماگيسترانتتار مەن دوكتورانتتار وقيدى. ولارعا 55 عىلىم دوكتورى, 230-دان استام عىلىم كانديداتى مەن 90-عا جۋىق PhD دوكتورى مەن عىلىم ماگيسترى ءدارىس بەرەدى. قازىرگى كۇندە مۇندا ستۋدەنتتەردىڭ ساپالى ءبىلىم الىپ, عىلىممەن, ونەرمەن, سپورتپەن اينالىسۋى ءۇشىن, ولاردىڭ بويىندا حالقىمىزدىڭ ۇلتتىق قۇندىلىقتارىن دارىتۋ ورايىندا بىرقاتار جۇمىستار جاسالىپ, ۋنيۆەرسيتەت وتاندىق جوعارى وقۋ ورىندارى اراسىندا ۇلكەن بەدەلگە يە بولىپ وتىر.