استانانىڭ 20 جىلدىعى قارساڭىندا حرومتاۋ اۋدانىنىڭ ءدوڭ اۋىلىندا جوبا قۇنى - 1,4 ميلليارد تەڭگە بولاتىن جاڭا مەكتەپ ەسىگىن ايقارا اشتى. اشىلۋ سالتاناتىنا وبلىس اكىمى بەردىبەك ساپارباەۆ پەن ERG مەنەدجەرلەرى كەڭەسىنىڭ توراعاسى الەكساندر ماشكەۆيچ قاتىستى.
- كەز كەلگەن ۇلت پەن مەملەكەتتىڭ بولاشاعى ەڭ الدىمەن, ازاماتتاردىڭ بىلىمدىلىگىنە, مادەني دەڭگەيى مەن دەنساۋلىعىنا بايلانىستى. تاۋەلسىزدىك العان كۇننەن باستاپ پرەزيدەنتىمىز نۇرسۇلتان ءابىش ۇلى قازاقستان ءوزىنىڭ اقىلدى ءارى ساۋاتتى ازاماتتارىنىڭ ارقاسىندا دامىعان وتىز ەلدىڭ قاتارىنا تەزىرەك ەنۋ ءۇشىن بارلىعىن جاساپ جاتىر. پرەزيدەنت تاپسىرماسىن ورىنداي وتىرا بىلتىر ءبىز اقتوبە وبلىسىندا 14 جاڭا مەكتەپ اشتىق. قازىر 26 مەكتەپ سالىپ جاتىرمىز, ولاردىڭ 13-ءىن جىل سوڭىنا دەيىن پايدالانۋعا بەرەمىز. ءدوڭ اۋىلىنداعى مەكتەپتىڭ استانانىڭ مەرەيتويىنا, سونىمەن قاتار ءدوڭ تاۋ-كەن بايىتۋ كومبيناتىنىڭ 80 جىلدىعىنا وراي اشىلۋى ەكى ەسە قۋانتادى. ويتكەنى, اۋىلدىڭ ەكونوميكالىق جاعىنان بەلسەندى حالقىنىڭ 60 پايىزى – وسى كومبيناتتىڭ قىزمەتكەرلەرى. ارقايسىسىڭىزدى وسىنداي قۋانىشتى وقيعالارمەن قۇتتىقتايمىن, - دەدى وبلىس اكىمى جينالعاندارعا قاراتا ايتقان سوزىندە.
جاڭا مەكتەپ 600 وقۋشىعا ارنالعان. ەكى وقۋ بلوگىنان تۇراتىن ءۇش قاباتتى عيماراتتا وقۋشىلاردىڭ ساباق وقىپ, شىعارماشىلىق قابىلەتتەرىن دامىتۋ ءۇشىن بارلىق جاعداي جاسالعان. بارلىق كابينەتتەر ينتەرنەتپەن, مۋلتيمەديالىق جابدىقتارمەن جاراقتانعان. كىتاپحانا, ەىك سپورت جانە اكت زالى, اسحانا, حيميا, بيولوگيا, فيزيكا كابينەتى مەن ەڭ جاڭا ۇلگىدە موديفيكاتسيالانعان لينگافون كابينەتى بار.
اۋلادا فۋتبول, باسكەتبول وينايتىن الاڭدار, جۇگىرەتىن جول, تەننيس جانە شاحمات ۇستەلدەرى ورناتىلعان.
مەكتەپ ءبىلىم بەرۋ نورمالارى مەن قاۋىپسىزدىك تالاپتارىنا تولىقتاي ساي كەلەدى.
تەمىر قۇسايىن,
«ەگەمەن قازاقستان»