برازيليا مەكسيكانى جەڭىپ, انگليا كولۋمبيانى پەنالتيدەن ۇتتى. سونىمەن شيرەك فينالعا شىققان بارلىق كوماندالاردىڭ ەسىمى بەلگىلى. 6 شىلدە كۇنى باستالاتىن بۇل ويىنداردا كىمنىڭ قارىمى كۇشتى بولۋى مۇمكىن. ساراپتاپ كورەلىك.
الەم چەمپيوناتى باستالماس بۇرىن 6 ءفاۆوريتتىڭ اتى اتالدى. ەۋروپادان تورتەۋ: گەرمانيا, يسپانيا, فرانتسيا, پورتۋگاليا. ال قالعان ەكى فاۆوريت لاتىن امەريكاسىنان: برازيليا مەن ارگەنتينا بولاتىن. ەندى مىنە, بۇل تىزىمدە بولعان كوماندالاردان 2 ۇجىم عانا قالىپ وتىر. فرانتسيا مەن برازيليا. شيرەك فينالعا شىققانداردىڭ ىشىنەن ەندى ءبىز كىمدەردىڭ ءباسى جوعارى بولۋى مۇمكىن ەكەندىگىنە توقتالساق. ارينە تىزىمگە تاعى 2 كوماندانى قوسساق بولادى. الايدا بەلگيا مەن انگليانىڭ جولى ەكىگە بولىنگەن. ءبىر توپتان شىققان قارسىلاستار فينالدا عانا كەزدەسە الادى. ال توپتان ەكىنشى ورىن الىپ, السىزدەر جاعىنا شىعىپ كەتكەن اعىلشىنداردىڭ جولى بولدى. كولۋمبيانى اۋپىرىمدەپ ءجۇرىپ جەڭگەننەن سوڭ, ولاردى شۆەتسيا كۇتىپ تۇر. ايتپاقشى الەم چەمپيوناتتارىنىڭ تاريحىندا انگليا ءۇش مارتە ويىن سوڭىنان كەيىنگى پەنالتيدەن جەڭىلگەن ەكەن. وسى جولى گارەت ساۋتگەيت كومانداسى وسى ءبىر جاعىمسىز جايدى اتتاپ ءوتتى. بۇل نەنىڭ بەلگىسى ەكەنىن ازىرگە ەشكىم بىلمەيدى.
وسى ويىننان سوڭ ماماندار انگليانى بيىل چەمپيون بولۋى مۇمكىن دەگەن قۇرامانىڭ قاتارىنا قوستى. راسىمەن دە, تۇماندى البيوننىڭ كومانداسى بيىل تالانتتى جاستاردان قۇرالدى. ەندى ولار سكانديناۆيالىق قۇرامانى اينالىپ وتسە بولدى, جارتىلاي فينالعا شىعادى. ال شۆەتسيا انگليانىڭ ۇنەمى جەڭىپ جۇرگەن كومانداسى دەسەك ارتىق ەمەس.
ۋرۋگۆاي – فرانتسيا اراسىنداعى تەكەتىرەستە انىق ليدەر ەۋروپالىقتار ەكەنى تۇسىنىكتى. دەگەنمەن توپتىق كەزەڭدە قاقپاسىنا گول جىبەرمەگەن ۋرۋگۆاي قورعانىسىمەن تاڭعالدىرۋدا. پورتۋگاليا قورعاۋشىسى پەپە سوققان جالعىز گول ۋرۋگۆايلىق قاقپاشى فەرناندو مۋسلەرانى ءوز امپلۋاسىنداعىلاردان ءبىر باس جوعارى شىعارىپ تۇر. چەمپيوناتتىڭ ۇزدىك قاقپاشىسى, ياعني التىن قولعاپتى دا وسى قاقپاشى الۋى مۇمكىن. ول ءۇشىن ۋرۋگۆاي كەم دەگەندە جارتىلاي فينالعا شىعۋى ءتيىس. بىراق بۋكمەكەرلىك كەڭسەلەر فرانتسيا جارتىلاي فينالعا جولداما الادى دەپ سەنىمدى سويلەپ وتىر. ولار سيرەك قاتەلەسەتىنىن ەسكەرە وتىرايىق.
برازيليا-بەلگيا جۇبىندا ناقتى كوشباسشى جوق. بىراق ويىن الدىنداعى ساندار مەن فاكتىلەر «سەلەساو» كومانداسىنا باسىمدىق بەرىپ تۇر. سەبەبى برازيليا بەلگياعا قاراعاندا, از گول جىبەرىپ, 1/8 فينالدا اسا قاتتى قيىندىق كورە قويعان جوق. الەمنىڭ 5 دۇركىن چەمپيونى مەكسيكانى 2:0 ەسەبىمەن ايقىن جەڭدى. جالپى, 1/8 فينالدا ەشقانداي كوماندا قارسىلاسىن 2 دوپ ايىرماسىمەن ۇتا العان جوق. ال بەلگيا جاپونيادان 2 دوپ ايىرماسىمەن ۇتىلىپ جاتىپ, سوڭعى سەكۋندتاردا عانا جەڭىستى جۇلىپ اكەتتى. بىراق روبەرتو مارتينەستىڭ كومانداسى كۇن سايىن قارقىنعا قارقىن قوسىپ كەلە جاتقانداي. سوندىقتان دا بەلگيا مەن برازيليانىڭ كەلەسى كەزەڭگە ءوتۋ پايىزى 50-50 دەر ەدىك.
رەسەي – حورۆاتيا جۇبى. حورۆاتيانىڭ كەلەسى كەزەڭگە وتەتىن مۇمكىندىگى مول ەكەندىگى تۇسىنىكتى. شاقپاق جەيدەلى كوماندا الەمنىڭ ۇزدىك كلۋبتارىندا وينايتىن فۋتبولشىلارمەن جاساقتالعان. 11 ويىنشىسىنىڭ دەڭگەيى بىركەلكى. ال قاقپاشىسى دانيەل سۋباشيچ 3 پەنالتي قايتارىپ, كورەرمەن كوزايىمىنا اينالدى. بىراق جارىس رەسەي جەرىندە ءوتىپ جاتقاندىقتان حورۆاتياعا بۇل ويىن وڭاي سوقپايتىنى انىق. ونىڭ ۇستىنە اتاقتى يسپانيانى جارىستان شىعارىپ جىبەرگەن رەسەيلىكتەر ەندى ءوز كۇشتەرىنە سەنىمدى كۇيدە حورۆاتتاردى دا تىقسىرىپ تاستايمىز دەپ بىلەك سىبانىپ وتىر. بۇل جۇپتىڭ جەڭىمپازى انگليا-شۆەتسيا تەكەتىرەسىنىڭ جەڭىمپازىمەن كەزدەسەدى.
سونىمەن شيرەك فينالدىڭ ويىندارى 6-7 شىلدە كۇندەرى وينالادى.
ەرمۇحامەد ماۋلەن,
«ەگەمەن قازاقستان»