ەلورداداعى ەكسپو اۋماعىندا قازپوشتانىڭ روبوپوست كەڭسەسى اشىلدى. روبوتتاندىرىلعان جاڭا كەڭسە بۇگىنگى كۇنى قازاقستاندىق روبوت تەحنيكاسىن قولداۋ جانە دامىتۋ ءۇشىن قۇرىلعان «روبوپوليس» اۋماعىندا جۇمىس ىستەمەك.
زاماناۋي كەڭسەنىڭ اشىلۋىنا «سامۇرىق-قازىنا» قورىنىڭ باسقارما توراعاسى احمەتجان ەسىموۆ, ۆيتسە-پرەمەر اسقار جۇماعاليەۆ, اقپارات جانە كوممۋنيكاتسيالار ءمينيسترى داۋرەن اباەۆ, قازپوشتانىڭ باسقارما توراعاسى ساكەن سارسەنوۆ جانە تاياۋدا استاناعا كەلگەن روبوت سوفيا قاتىستى.
– قازپوشتا جاڭا كەڭسەسىن IT-سالاداعى سوڭعى جەتىستىكتەردىڭ بارلىعى جينالعان جەردە اشىپ وتىر. ءبىز وتانداستارىمىزعا ءداستۇرلى قىزمەتتەردى مۇلدەم جاڭا فورماتتا الۋعا بولاتىنىن كورسەتەمىز. جاڭا كەڭسەنىڭ اشىلۋىنا سوفيانى دا كەزدەيسوق اكەلگەن جوقپىز. تسيفرلى ترانسفورماتسيا يدەياسى بۇكىل الەمدى جاۋلاپ العان ۋاقىتتا ءبىز دە ۇزدىك الەمدىك تاجىريبەلەرمەن تانىسىپ, ۇزدىك مامانداردان ساباق الۋ مۇمكىندىگىمىزدى جىبەرىپ الماۋعا تىرىسامىز. قازىر ۇكىمەت تاراپىنان تسيفرلاندىرۋ يدەياسىن جان-جاقتى قولداۋدىڭ ارقاسىندا ءبىزدىڭ ەلىمىز دە وسى سالادا الدىڭعى قاتارعا قوسىلىپ, ماماندار سۇرانىسقا يە بولۋدا, – دەدى قازپوشتا باسشىسى س.سارسەنوۆ.
شاراعا قاتىسۋشى الەمدەگى ەڭ تانىمال روبوت – گەنويد سوفيا مەيماندارعا قازاقستاننىڭ تسيفرلى جۇيەگە دەن قويىپ وتىرعاندىعىنان حاباردار ەكەنىن جەتكىزىپ, استانانىڭ كوركىنە ءتانتى ەكەنىن ايتىپ بەردى. اتالعان روبوت جاساندى ينتەللەكتكە يە, كورنەكى اقپاراتتى جانە تۇلعا تانۋ تەحنولوگياسىن وڭدەۋ فۋنكتسيالارىمەن جابدىقتالعان. روبوت استاناعا قازپوشتانىڭ قۇجاتتارىن ەلەكتروندى تۇرگە كوشىرىپ جاتقان Documentolog كومپانياسىنىڭ قولداۋىمەن جەتكىزىلدى.
ءداستۇر بويىنشا, ءىس-شارانىڭ قوناقتارىن جاپونيادان اكەلىنگەن جاڭا روبوت-كەڭەسشى Pepper قارسى الدى. HD-كامەرالار جانە سەنسورلاردىڭ ارقاسىندا ول قورشاعان ورتاسىن تانىپ, ادام ەموتسيالارىن بىلە الادى. Pepper قاتىسۋشىلارعا قازپوشتا قىزمەتتەرى تۋرالى مالىمدەپ, ولارعا ەكسكۋرسيا جۇرگىزدى. ايتا كەتەرلىگى, قازپوشتانىڭ جاڭا كەڭسەسىندە ءداستۇرلى بانكوماتتار مەن تولەم تەرمينالدارىمەن قوسا گيبريدتىك بانكومات بار. ودان ونلاين كەڭەستەر جانە post.kz قىزمەتتەرىن الۋعا, تولەم كارتالارى نەمەسە قولما-قول اقشا كومەگىمەن ءتۇرلى تولەمدەر تولەۋگە بولادى. كليەنتتەردى سايكەستەندىرۋ ساۋساق ىزدەرى مەن بيومەتريا ارقىلى جۇرگىزىلەدى. VR-بولىمىندە كورمەگە كەلۋشىلەر ۆيرتۋالدى تۋردى تاماشالاپ, قىزمەتتەرمەن تانىسىپ, ترەك-ءنومىرى بويىنشا سالەمدەمەسىن دە تابا الادى. سونىمەن قاتار AR-كيىنۋ بولمەسى ونلاين-دۇكەننەن تاپسىرىسپەن العان كيىمدەردى كيىپ كورۋگە مۇمكىندىك بەرەدى. پرينتەر ارقىلى 30 مينۋتتىڭ ىشىندە (باس كيىم, مويىنوراعىش, ورامال, جەيدە) باسىپ شىعارىپ, سەلفي-دروننىڭ كومەگىمەن تۇسكەن سۋرەتتى شىعارىپ الۋعا نەمەسە ەلەكتروندى پوشتاعا جىبەرۋگە بولادى. بۇعان قوسا, كەڭسەدە نازارباەۆ ۋنيۆەرسيتەتىنىڭ تۇلەكتەرى جاساعان روبوپوشتاشى ورنالاستىرىلعان. ول ەكسپو اۋماعىندا ورنالاسقان كەڭسەلەرگە الدىن الا بەلگىلەنگەن مارشرۋتپەن حات-حابارلار جەتكىزىپ تۇرادى.
ەركەجان ايتقازى,
«ەگەمەن قازاقستان»