الماتىنىڭ ەكولوگياسى جاقسارادى

وسى باعىتتا مەگاپوليس باسشىسى باۋىرجان بايبەك قوقىس سۇرىپتايتىن جاڭا كەشەننىڭ, گازبەن جۇرەتىن اۆتوبۋستارعا ارنالىپ سالىنىپ جاتقان كوممۋنالدى پاركتىڭ جانە ەلەكترواۆتوبۋستاردىڭ سوڭعى تۇرلەرىن شىعاراتىن زاۋىت قۇرىلىستارىنىڭ جۇمىس بارىسىمەن تانىستى.

الماتى قالاسى اكىمىنىڭ ءباسپاسوز قىزمەتىنىڭ مالىمەتتەرى بويىنشا, قازىرگى كەزدە «FalconEuroBus» قازاق-نەمىس كومپانياسى تاراپىنان ەلەكترواۆتوبۋستاردىڭ ءۇشىنشى ءتۇرىن شىعاراتىن زاۋىت قۇرىلىستارى جۇرگىزىلىپ, جالپى الاڭى 7 مىڭ شارشى مەتردى قۇرايتىن جيناۋ-سىرلاۋ تسەحىنىڭ, جابىق تۇراق پەن قويما بولمەلەردىڭ قۇرىلىستارى اياقتالۋعا جاقىن. جوباداعى جەكە ينۆەستيتسيا كولەمى 15 ملرد. تەڭگەنى قۇرايدى.

جۇمىس ساپارى بارىسىندا قالا اكىمى سونىمەن قاتار جىلدىق قۋاتى 550 مىڭ توننا  تۇرمىستىق قاتتى قالدىقتار مەن قوقىس  وڭدەيتىن ءارى سۇرىپتايتىن جاڭا كەشەن قۇرىلىسىمەن دە تانىستى. جۋىق ارادا يتالياندىق جابدىقتار ىسكە قوسىلىپ, جوندەۋ جۇمىستارى اياقتالاتىن بولادى. مۇندا جۇمىستىڭ بارلىعى كەشەندى باسقارۋ جۇيەسى ارقىلى اتقارىلادى,  ال پوليگونعا قاۋپى از جانە  بيوبۇزىلعىش زاتتار جىبەرىلەدى دە, كەيىننەن قايتا وڭدەۋگە الىنادى.

گازبەن جۇمىس ىستەيتىن 200 جولاۋشى اۆتوبۋسىنا قىزمەت كورسەتەتىن جاڭا كوممۋنالدى اۆتوبۋس پاركىنىڭ قۇرىلىسى دا قارقىندى ىسكە اسۋدا.

 «الماتىنى دامىتۋدىڭ 50 درايۆەر-جوباسى» جوباسى اياسىندا ال 2021 جىلعا قاراي الماتى اۋماعىنداعى ءتورت مىڭ جەكە ءۇي گازداندىرىلادى. ەكولوگيالىق قوعامدىق كولىكتەر  ىسكە قوسىلادى. قازىردىڭ وزىندە اۆتوپاركتەردىڭ 60%-ى  گازبەن جۇرەتىن اۆتوبۋستار مەن تروللەيبۋستارمەن قامتاماسىز ەتىلگەن. اۆتوبۋس پاركتەرى  30%-عا جاڭارتىلىپ, مەترونىڭ 2 جاڭا بەكەتى سالىنۋدا. بۇگىندە 12 ەلەكتروجابدىقتاۋ ستانتسياسى جۇمىس ىستەسە بۇل كورسەتكىش  2019 جىلدىڭ سوڭىنا قاراي 47-گە جەتكىزۋ جوسپارلانىپ وتىر.

ەلۆيرا سەرىكقىزى,

«ەگەمەن قازاقستان»

الماتى