بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسى ەلوردا تۇرعىندارى مەن قوناقتارى الدىندا سويلەگەن سوزىندە بارشا قازاقستاندىقتاردى ۇلتتىق دومبىرا كۇنىمەن قۇتتىقتاپ, بۇل مۋزىكالىق اسپاپ قازاق حالقىنىڭ مادەنيەتى مەن تاريحىندا ايرىقشا ورىن الاتىنىن ايتتى.
– جاقىندا مەنىڭ جارلىعىممەن شىلدەنىڭ ءبىرىنشى جەكسەنبىسى ۇلتتىق دومبىرا كۇنى دەپ جاريالانعانىن بىلەسىزدەر. بۇگىن بۇل مەرەكەنى ەلىمىزدىڭ بارلىق ءوڭىرى اتاپ وتۋدە. دومبىرا – قازاقتىڭ جانى, رۋحى, تاريحى, سالت-ءداستۇرى, بۇكىل ءبىتىم-بولمىسى, – دەدى قازاقستان پرەزيدەنتى.
ەلباسى بۇگىندە دومبىرا قازاقتىڭ برەندى بولىپ سانالاتىنىن اتاپ ءوتتى.
– «رۋحاني جاڭعىرۋ» باعدارلاماسى ارقىلى ۇلتتىق مادەنيەتىمىزدى الەمگە تانىتۋعا دومبىرا ەرەكشە ۇلەس قوسادى. قۇرمانعازى مەن داۋلەتكەرەيدىڭ, تاتتىمبەت پەن سۇگىردىڭ, قازانعاپ پەن دينانىڭ كۇيلەرى – ءتول مادەنيەتىمىزدىڭ بىرەگەي ۇلگىلەرى, – دەدى نۇرسۇلتان نازارباەۆ.
مەملەكەت باسشىسى دومبىرا مەن كۇيدىڭ يۋنەسكو شەشىمىمەن ادامزاتتىڭ ماتەريالدىق ەمەس مادەني مۇرالارىنىڭ تىزىمىنە ەنگەنىن ايتتى.
– ءبىزدىڭ مادەني قۇندىلىقتارىمىز بەن ءداستۇرىمىز قوس ىشەكتىڭ ءۇنى مەن كۇمبىرلەگەن كۇي ارقىلى ۇرپاقتان-ۇرپاققا بەرىلەدى. ۇلتتىق دومبىرا كۇنىنىڭ استانادا – تاۋەلسىز قازاقستاننىڭ جۇرەگىندە دۇنيەگە كەلۋىنىڭ سيمۆولدىق ءمانى بار, – دەدى نۇرسۇلتان نازارباەۆ.
سوڭىندا مەملەكەت باسشىسى ۇلتتىق دومبىرا كۇنى وسكەلەڭ ۇرپاقتىڭ قاسيەتتى دومبىراعا, ۇلتتىق ونەرگە دەگەن قۇلشىنىسىن ارتتىرا تۇسەتىنىنە سەنىم ءبىلدىردى.
«قازاق ەلى» الاڭىندا وتكەن ءىس-شارا بارىسىندا ديريجەر ايتقالي جايىموۆتىڭ جەتەكشىلىگىمەن 2 مىڭنان استام ونەرپاز ءبىر وركەستر رەتىندە دومبىرامەن قازاقتىڭ بەلگىلى كۇيلەرىن ورىندادى. كونتسەرتتەن كەيىن قازاقستان پرەزيدەنتى قولدانبالى ونەر تۋىندىلارىنىڭ كورمەسىن ارالاپ كوردى.