رۋدنىيدا قازاق مەكتەبى اشىلدى

مەكتەپ وقۋشىلارىن, ۇستاز­داردى, اتا-انالار قاۋىمىن ارنايى قۇتتىقتاي بارعان وبلىس اكىمىنىڭ ورىنباسارى باقىتجان نارىمبەتوۆ جاڭا مەكتەپتىڭ اشىلۋى­نا وراي وتكەن سالتاناتتى ءىس-شاراعا قا­تى­­­­سىپ, كوپشىلىككە ءبىلىم سالاسىندا بو­لىپ جاتقان وڭ وزگەرىستەردى قۇلاق­­­قاعىس ەتتى.

«بۇگىنگى مەكتەپتىڭ اشىلۋى – ەل تاۋەل­سىزدىگىنىڭ 35 جىلدىعىمەن, سونداي-اق قازاق حالقىنىڭ ۇلى اعارتۋ­شىسى ىبىراي ءالتىنساريننىڭ 185 جىلدى­عى­مەن تۇسپا-تۇس كەلىپ وتىر. وڭىردە مەملەكەت باسشىسىنىڭ باستاماسىمەن ىسكە اسىرىلعان «كەلەشەك مەكتەپتەرى» ۇلتتىق جوباسى شەڭبەرىندە 4500 ورىندىق 6 مەكتەپ اشىلدى. ءبىزدىڭ ءوڭىرىمىز مەملەكەت باسشىسىنىڭ تاپسىرماسىن ورىندادى. ەندى ءبىزدىڭ الدىمىزدا وسى مەكتەپتەردىڭ الەۋەتىن ءتيىمدى پايدالانىپ, بالالارعا ساپالى ءبىلىم بەرۋ, ولاردى ەلگە پايداسى تيەتىن سانالى ازامات ەتىپ تاربيەلەۋ مىندەتى تۇر. جاڭا مەكتەپ قۇتتى بولسىن! بارشاڭىزعا ساتتىلىك, مەكتەپ ۇجىمىنا جەمىستى ەڭبەك پەن تولاعاي تابىستار تىلەيمىن!», دەدى اكىم ورىنباسارى.

رۋدنىي قالاسىنىڭ قۇرمەتتى ازاماتى, ارداگەر ۇستاز عابدوللا احمەتجانوۆ اقساقال دا مەكتەپ شاكىرتتەرىنە ىزگى تىلەك, اقىل-كەڭەسىن ايتىپ, اق باتاسىن بەردى.

التى كورپۋستان تۇراتىن ءۇش قابات­تى جاڭا مەكتەپتىڭ سىنىپتارى بالا­نىڭ ساپالى ءبىلىم الۋىنا قاجەت زاماناۋي ادىستەمەلىك قۇرالدارمەن, كومپيۋتەر قۇرىلعىلارى, ينتەراكتيۆتى تاقتامەن جابدىقتالعان. شەت تىلدەر كابينەتتەرىنە لينگافون ورناتىلعان. ءبىلىم ورداسىندا وقۋشىنىڭ قارىم-قابىلەتىنىڭ جان-جاقتى ۇشتالۋىنا بارلىق جاعداي جاسالعانى كوزگە ۇرىپ تۇر. كىشى, ورتا, جوعارى بۋىن وقۋشى­­لارى ءبىر-بىرىنەن بولەك جەكە بلوكتاردا ءبىلىم الادى. بالانىڭ تانىم ءورىسىن كەڭەيتىپ, عىلىمي ىزدەنىسكە جەتەلەيتىن ارنايى حيميا, بيولوگيا, فيزيكا, ينفورماتيكا, روبوتتەحنيكا پاندىك كابينەتتەرى, سونداي-اق STEAM-زەرتحاناسى بار.

مەكتەپتىڭ 3 سپورت زالى, حورەوگرافيا زالى, كەڭ ءماجىلىسحاناسى, جايلى اسحانا جۇمىس ىستەپ تۇر. ەڭبەككە باۋلۋ شەبەرحانالارىنا ءتۇرلى ستانوكتار, تىگىن ماشينالارى قويىلعان. اۋلادا وقۋشىلاردىڭ ءجۇرىپ-تۇرۋىنا, وتىرىپ دەمالۋىنا قولايلى بىرنەشە الاڭ بار.

ءبىلىم ورداسىنىڭ كىرە بەرىسى مەن ءار قاباتىنا ەرەكشە ءبىلىم بەرۋ قاجەتتىلىگى بار بالالارعا ارنالعان ليفت, پاندۋس ورناتىلعان. ارنايى جابدىقتالعان سانيتار بولمەلەرى, ينكليۋزيانى قولداۋ كابينەتى جۇمىس ىستەپ جاتىر.

جاڭا مەكتەپتە 62 ادام, ونىڭ ىشىندە 34 مۇعالىم جۇمىس ىستەيدى. ءبىلىم ورداسىندا, قازىرشە, 400-دەن استام وقۋشى ءبىلىم الىپ جاتىر. الايدا الداعى وقۋ جى­لىنا دەيىن بالا سانى 900-دەن كەم بولمايدى.

«مەكتەپتىڭ كىتاپحاناسى وتە كەڭ ەكەن. مۇنداعى باي كىتاپ قورى ءبىزدىڭ جان-جاقتى ءبىلىم الىپ, ەلىمىزدىڭ تاريحي, مادەني مۇراسىمەن تانىسۋعا مۇمكىندىك بەرەدى دەپ ويلايمىن. سونداي-اق وتە ىڭ­­عايلى كوۆوركينگ ايماقتاردى, ونەر ستۋدياسىن كورىپ تاڭقالىپ وتىرمىن. ساباق وقىپ, شىعارماشىلىقپەن اينا­لىسۋعا قولايلى», دەيدى 6 سىنىپ وقۋشىسى اجار رۇستەموۆا.

رۋدنىيداعى №8 قازاق مەكتەبى – وڭىردە كەيىنگى بىرنەشە جىلدىڭ ىشىندە پايدالانۋعا بەرىلگەن التىنشى ءبىلىم ورداسى. بۇعان دەيىن قوستاناي مەن ارقالىقتا, سونداي-اق زارەچنىي, قۇسمۇرىن اۋىلدارىندا 5 كەلەشەك مەكتەبى پايدالانۋعا بەرىلگەن.

قوستاناي وبلىسى