بۇگىننەن باستاپ قازاقستاندا بازالىق زەينەتاقىنى ەسەپتەۋدىڭ جاڭا جۇيەسى ەنگىزىلەدى. وعان سايكەس, ءبىر ميلليونعا جۋىق زەينەتكەردىڭ بازالىق زەينەتاقىسى ەكى ەسەگە ءوستى.
ەڭبەك جانە xالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆانىڭ ايتۋىنشا, بازالىق زەينەتاقىنىڭ مولشەرى ەڭبەك ءوتىلى مەن زەينەتاقى جۇيەسىنە قاتىسۋ مەرزىمىنە تاۋەلدى بولادى. بۇگىندە بازالىق زەينەتاقى بارلىعىنا بىردەي تولەنىپ وتىر. ال ونىڭ مولشەرى ەڭ تومەنگى كۇنكورىس دەڭگەيىنىڭ 54 پروتسەنتىن قۇرايدى. ول - شامامەن 15 274 تەڭگە. ەندى, بازالىق زەينەتاقى ەڭبەك ءوتىلى مەن زەينەتاقى جۇيەسىنە قاتىسۋ مەرزىمىنە قاراي تولەنەدى.
«ماسەلەن, زەينەتكەردىڭ ەڭبەك ءوتىلى بولماسا, سوسىن زەينەتاقى جيناقتاۋ جۇيەسىنە مۇلدەم قاتىسپاسا, يا بولماسا, ەڭبەك ءوتىلى 10-اق جىل بولسا, وعان جاڭاعى ەڭ تومەنگى كۇنكورىس دەڭگەيىنىڭ 54 پروتسەنتىن - 15 274 تەڭگەنى تولەنە بەرەدى. ال 10 جىلدان ارتىق ەڭبەك ءوتىلى بار ادامعا قوسىمشا ءاربىر جىل ءۇشىن 2 پروتسەنت قوسىلادى. سوندا 33 جىلدىق ەڭبەك ءوتىلى بار ادام بازالىق زەينەتاقىنىڭ تولىق مولشەرىن - 28 284 تەڭگەنى الا الادى. ءاربىر ادام ءوزىنىڭ زەينەتاقى مولشەرىن «ەلەكتروندى ۇكىمەت» پورتالىنان, يا بولماسا, «ازاماتتارعا ارنالعان ۇكىمەتتىڭ» فرونت-كەڭسەلەرىنەن بىلە الادى. سول جەردە تولىق انىقتامانى دا الۋعا مۇمكىندىك بار. بۇگىندە قايتا ەسەپتەۋ شارالارى اتقارىلىپ, ءاربىر ادامنىڭ زەينەتاقىسى اۆتوماتتى تۇردە بەلگىلەندى. سوندىقتان قوسىمشا قۇجاتتاردى اكەلۋدىڭ قاجەتى جوق», - دەيدى س.جاقىپوۆا.
بۇدان بولەك, بەلگىلى ءبىر سەبەپتەرگە جيناقتاۋشى زەينەتاقى جۇيەسىنە قاتىسا الماعان كەيبىر ازاماتتارعا جەڭىلدىك جاسالادى, ولاردىڭ جۇمىسسىز جۇرگەن جىلدارى ەڭبەك ءوتىلى دەپ جازىلادى. «بىرىنشىدەن, بالا كۇتىمىمەن ءۇش جىل ءجۇرىپ قالعاندارعا اتالعان ۋاقىت ەڭبەك ءوتىلى دەپ جازىلادى. بىراق ول ۋاقىت 12 جىلدان اسپاۋى ءتيىس. سول سياقتى I جانە II توپتاعى مۇگەدەكتەرگە, سونداي-اق, 80 جاستان اسقان ادامدارعا كۇتىپ جاساعاندارعا دا ەڭبەك ءوتىلى جازىلادى. سوسىن اسكەري ادام قىزمەت بابىنا بايلانىستى باسقا ءبىر جەرگە جىبەرىلسە, ال ول جەردە ونىڭ جۇبايىنا جۇمىس تابىلماسا, ونىڭ دا وتكىزگەن ۋاقىتى ەڭبەك وتىلىنە جاتقىزىلادى. ديپلوماتتاردىڭ جۇبايلارىنا دا تۋرا سونداي جەڭىلدىك جاسالادى», - دەپ اتاپ كورسەتتى س.جاقىپوۆا.
رەسمي مالىمەتكە سايكەس, قازىرگى كەزدە قازاقستاندا 2 ملن 148 مىڭ ادام بازالىق زەينەتاقى الىپ ءجۇر. ولاردىڭ 44,5 پروتسەنتى, ناقتى ايتساق, 940 مىڭ ادام بازالىق زەينەتاقىنىڭ تولىق مولشەرىن, ياعني 28 284 تەڭگەنى الادى. سوسىن 931 مىڭعا جۋىق زەينەتكەر ەڭ تومەنگى كۇنكورىس دەڭگەيىنە جاقىن 74-90 پروتسەنتىن الادى. قالعان 120 مىڭ ادام ەڭ تومەنگى كورسەتكىش - 15 274 مىڭ تەڭگە الا بەرەدى. سەبەبى ولاردىڭ ەڭبەك ءوتىلى 10 جىلعا دا جەتپەيدى. بازالىق زەينەتاقىنى كوتەرۋگە رەسپۋبليكالىق بيۋدجەتتەن 530 ملرد تەڭگە ءبولىنىپ وتىر.