استانانىڭ 20 جىلدىعىنا وراي باتىس قازاقستان وبلىسىندا ەكى مەكتەپ عيماراتى پايدالانۋعا بەرىلەدى. سالتاناتتى اشىلۋى جاڭا وقۋ جىلىنىڭ باسىنا – 1 قىركۇيەككە جوسپارلانعانىمەن, استانا كۇنى قارساڭىندا داريان جانە شابدارجاپ اۋىلى تۇرعىندارى سۋ جاڭا مەكتەپ عيماراتىمەن تانىستى. جاڭا قۇرىلىس نىساندارىنىڭ سپاسىن تەكسەرە كەلگەن ءوڭىر باسشىسى التاي كولگىنوۆ جۇرتشىلىقپەن جۇزدەسىپ, اۋىل حالقىن ەلدە جانە وبلىس اۋماعىندا اتقارىلىپ جاتقان جۇمىستار جونىندە حاباردار ەتتى.
زەلەنوۆ اۋدانىنا قاراستى داريان اۋىلى – بۇرىن اۋدان ورتالىعى بولعان ءىرى ەلدى مەكەن. مۇندا بىلتىردان بەرى 300 وقۋشىعا ارنالعان جاڭا مەكتەپتىڭ عيماراتى جانە مەكتەپ جانىنان 100 بالاعا لايىقتالعان ينتەرنات ءۇيى قۇرىلىسى ءجۇرىپ جاتىر. سوڭعى ۇلگىدەگى بارلىق وقۋ قۇرالدارىمەن قامتىلعان مەكتەپتىڭ ەڭ باستى ەرەكشىلىگى – مۇندا وبلىستا العاشقى بولىپ ءىت سىنىپ اشىلادى. ال اقجايىق اۋدانىنداعى شابدارجاپ اۋىلى – ورالدان 300 شاقىرىم جەردە, اتىراۋ وبلىسىنىڭ شەكاراسىندا جاتقان شالعاي ەلدى مەكەن. مۇندا دا بىلتىر تامىز ايىندا باستالعان 198 ورىندىق مەكتەپ عيماراتىنىڭ قۇرىلىسى تولىق اياقتالىپ, جاڭا وقۋ جىلىنا شاكىرت قابىلداۋعا دايىن تۇر.
- استانانىڭ تويى, ەلوردانىڭ 20 جىلدىعى – بۇكىل قازاقستاندىقتاردىڭ ورتاق قۋانىشى. ءدال وسى كۇنى ورال قالاسىنان شالعاي جاتقان شاعىن اۋىلدا وسىنداي زاماناۋي مەكتەپ عيماراتى پايدالانۋعا بەرىلۋى تەگىن ەمەس. ەلىمىزدەگى تىنىشتىقتىڭ, ەكونوميكالىق دامۋدىڭ, ەلباسى ساياساتىنىڭ ناقتى جەمىسىنىڭ ءبىر كورىنىسى – وسى, - دەدى التاي كولگىنوۆ تۇرعىندارمەن كەزدەسۋدە.
شابدارجاپ اۋىلى – تايپاق وكرۋگىنە قارايتىن, بۇرىنعى «كراسنويار» كەڭشارىنىڭ ءبىر بولىمشەسى. ءبىر تاڭعالارلىعى, نارىق كەلگەلى تالاي اۋىل جويىلىپ, تالاي ەلدىمەكەن تاراپ كەتسە دە, شابدارجاپتان حالىق كوشپەپتى. تايپاق اۋىلىنىڭ اكىمى بولات شالەنوۆتىڭ ايتۋىنشا, سوڭعى جىلدارى مۇندا جىل سايىن 2-3 ءۇي جاڭادان سالىنادى ەكەن.
- وسى اۋىل تۇرعىندارىنىڭ ۇيىمشىلدىعى ەرەكشە. اناۋ جىلى مەكتەپ جانىنان سپورت زالىن وزدەرى تۇرعىزىپ العان. بيىل اۋىل كاسىپكەرى تالعات مۇحامەدياروۆتىڭ باستاۋىمەن اۋىل ىشىندە جازعى تەحنيكالىق سۋ جۇيەسىن جۇرگىزدى. بۇل دەگەنىڭىز – ءار اۋلادا باۋ-باقشا وسىرۋگە كەرەمەت مۇمكىندىك. قازىر اۋىلدا 745 ادام تۇرادى. وتكەن وقۋ جىلىندا مەكتەپتە 154 وقۋشى بولعان ەدى. بيىل كۇزدە جاڭا مەكتەپكە 165 وقۋشى كەلگەلى وتىر. دەموگرافيالىق ءوسىم وسىلاي بولا بەرسە, از جىلدا بۇل جاڭا مەكتەپتىڭ ءوزى تارلىق ەتەدى-اۋ, - دەپ كۇلەدى بولات بايعالي ۇلى.
جاڭا مەكتەپ عيماراتى شىنىمەن دە سىڭعىرلاپ تۇر. بارلىق وقۋ كابينەتتەرى قاجەتتى قۇرالدارمەن جابدىقتالعان. سوڭعى ۇلگىدەگى روبوتتەحنيكا كابينەتى, تەحنولوگيا پانىنە قولدانىلاتىن ءتۇرلى ستانوكتار مەن تىگىن ماشينالارى ساقاداي ساي تۇر.
وڭىردەگى وزگە مەكتەپتەر سياقتى شابدارجاپ مەكتەبىندە دە جاڭا وقۋ جىلىندا وقۋشىلار Bilimbook كومپيۋتەر-ترانسفورمەرلەرىن پايدالاناتىن بولادى. Bilimbook – ەلدەگى نازارباەۆ زياتكەرلىك مەكتەپتەرى جۇيەسىندە سىناقتان وتكەن وزىق ۇلگىلى, جاڭا ادىستەمەلى ساباقتار جۇكتەلگەن كومپيۋتەر-ترانسفورمەر. ول ينتەرنەتكە قوسىلماي-اق پايدالانۋعا جارامدى. قازاق, ورىس, اعىلشىن تىلىندە باعدارلامالار جۇكتەلگەن Bilimbook جادى 2-3 اي سايىن جاڭارتىلىپ تۇرادى.
- 2004-2005 جىلدارى پرەزيدەنتتىك باسقارۋ اكادەمياسىندا ءبىلىم العان كەزىمدە اكادەميادا ينتەرنەتكە جالعانعان جالعىز كومپيۋتەرلىك سىنىپ بولاتىن. ءدال وسىنداي وزىق تەحنولوگيانى سول جىلدارى شەتەلدەن, ەۆروپادان عانا كورەتىنبىز. ەندى مىنە, وبلىس ورتالىعىنان 300 شاقىرىم جەردەگى شاعىن اۋىل مەكتەبى وسىنداي مۇمكىندىككە يە بولىپ وتىر. قالا مەن دالا مەكتەپتەرىنىڭ ايىرماشىلىعى ازايدى. ەلىمىزدىڭ دامۋىنا ناقتى مىسال ەمەس پە؟ – دەيدى التاي سەيدىر ۇلى. - وسى اۋىلدا تۋىپ-ءوستىم, وتىز جىل مۇعالىم بولىپ قىزمەت ەتتىم. ءبىزدىڭ شاعىن اۋىلدا مۇنداي ساۋلەتتى مەكتەپ عيماراتى سالىنادى دەگەن وي ءۇش ۇيىقتاساق تۇسىمىزگە كىرگەن جوق. ءوڭىر باسشىلارىنا ريزامىز, - دەيدى ارداگەر مۇعالىم ءساليما ساريەۆا.
اقجايىق اۋدانىنىڭ اكىمى ءادىل جولامانوۆتىڭ ايتۋىنشا, بيىل تايپاق اۋىلدىق وكرۋگىنە قاراستى شابدارجاپ, تومپاق اۋىلدارى تازا اۋىز سۋمەن قامتاماسىز ەتىلمەك. قازىردىڭ وزىندە اۋىز سۋ قۇبىرىن تارتۋ جۇمىستارى باستالدى, بۇل جوباعا 445,7 ملن.تەڭگە قاراستىرىلعان. ناتيجەسىندە ەكى اۋىلدىڭ 1000-نان استام تۇرعىنى تازا اۋىز سۋمەن قامتىلاتىن بولادى. جالپى, اۋداننىڭ 14 ەلدىمەكەنىندە اۋىز سۋمەن قامتۋ جۇمىستارى جۇرگىزىلىپ جاتىر ەكەن. بۇعان قوسا, اۋدان ورتالىعىنىڭ سولتۇستىك-باتىس ايماعىن ەلەكتر جەلىسىمەن جابدىقتاۋ, چاپاەۆ كەنتىندە 3 قاباتتى 24 پاتەرلىك تۇرعىن ءۇي قۇرىلىسىن سالۋ باستالعان. بيىل اۋداندا بارلىعى 4000 شارشى مەتردەن استام تۇرعىنۇي قۇرىلىسى بوي كوتەرەدى ەكەن.
- ەلباسى جاقىندا ورال قالاسىنا كەلگەن ساپارىندا وڭىردەگى از كومپلەكتىلى مەكتەپتەر جونىندە ارنايى سۇرادى. ويتكەنى باتىس قازاقستان وبلىسىنداعى بارلىق مەكتەپتىڭ 60 پايىزى از كومپلەكتىلى مەكتەپكە جاتادى. ءبىز وسىنداي 223 مەكتەپتى Bilimbook كومپيۋتەر-ترانسفورمەرىمەن قامتاماسىز ەتەمىز. كەرەك جەرىندە ينتەرنات سالىپ جاتىرمىز. الداعى 2-3 جىلدا وڭىردە ستۋدەنتتەرگە ارنالعان 7 جاتاقحانا بوي كوتەرەدى. وڭىرگە قاجەتتى ماماندىقتارعا گرانتتار بولەمىز. ءبىلىم ماسەلەسى ءبىزدىڭ ەرەكشە نازارىمىزدا, - دەدى تۇرعىندار الدىندا ءوڭىر باسشىسى التاي كولگىنوۆ.
قازبەك قۇتتىمۇرات ۇلى,
"ەگەمەن قازاقستان"
باتىس قازاقستان وبلىسى