شىمكەنت قالاسىندا «دوستىق» جانە «ايگەرىم» بوبەكجاي-بالاباقشالارى پايدالانۋعا بەرىلدى. «ايگەرىم» – پسيحيكالىق دامۋى شەكتەۋلى بالالارعا, «دوستىق» – تىرەك-قيمىل فۋنكتسيالارى بۇزىلعان بالالارعا ارنالعان. ارناۋلى كوررەكتسيالىق قوس بوبەكجاي-بالاباقشا جالپى 110 ورىنعا لايىقتالعان. الەۋمەتتىك نىساندار كاسىپكەر, مەتسەنات, «قازاقستاننىڭ 100 جاڭا ەسىمى» جوباسىنىڭ جەڭىمپازى, وبلىستىق ءماسليحاتتىڭ دەپۋتاتى, «وتاۋ گرۋپ» كومپانياسىنىڭ باس ديرەكتورى قايرات مولداسەيىتوۆتىڭ دەمەۋشىلىگىمەن سالىندى.
جوبانىڭ جالپى قۇنى – 280 ملن تەڭگە. بالاباقشالاردىڭ اشىلۋ سالتاناتىندا وبلىس اكىمى جانسەيىت تۇيمەباەۆ تاعدىردىڭ سالعانىنا ەرىكسىز مويىنسۇنعان جاس جەتكىنشەكتەرگە قولۇشىن سوزىپ, كومەك بەرگەن كاسىپكەرگە العىسىن ءبىلدىردى. سونداي-اق وبلىس اكىمى دەمەۋشىلىك جاساپ جۇرگەن كاسىپكەردىڭ ەڭبەكتەرى وزگەلەرگە ۇلگى بولارلىق شىنايى ءپاتريوتيزمنىڭ كورىنىسى ەكەنىن ايتىپ ءوتتى.
– ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا تۋعان جەرىن ۇمىتپاي, وعان قامقورلىق جاساعىسى كەلگەن كاسىپكەرلەردى, شەنەۋنىكتەردى, زيالى قاۋىم وكىلدەرى مەن جاستاردى قولداۋ كەرەكتىگى, بۇل – قالىپتى جانە شىنايى پاتريوتتىق سەزىمنىڭ اركىمدە بولۋى ايتىلعان بولاتىن. مەملەكەت باسشىسى كاسىپكەرلەردىڭ الەۋمەتتىك جاۋاپكەرشىلىگىن نازارىنان تىس قالدىرعان ەمەس. ياعني مەملەكەتتىك قولداۋ كورسەتىلىپ, كاسىپكەرلىكتىڭ دامۋىنا بارلىق جاعداي جاسالىپ كەلەدى. ءبىز دە مۇمكىندىگىمىزشە مۇقتاج جاندارعا كومەكتەسىپ, ەلىمىزدە الەۋمەتتىك جاعدايدىڭ جاقسارا تۇسۋىنە ۇلەس قوسۋىمىز قاجەت. وسى ورايدا ءبىزدىڭ كومپانيا جۇزدەن استام بالاعا قۋانىش سىيلاپ وتىر. يگى ىستەر الداعى ۋاقىتتا دا جالعاسىن تاباتىن بولادى, – دەيدى بيزنەسىنەن تۇسكەن تابىسىنان جىل سايىن ەلدىڭ يگىلىگى ءۇشىن الەۋمەتتىك ماڭىزى بار نىساندى تاپسىرىپ وتىرۋدى ۇستانىم ەتكەن قايرات مولداسەيىتوۆ.
جالپى, وڭتۇستىكتە «رۋحاني جاڭعىرۋ» باعدارلاماسى اياسىندا كاسىپكەرلەر دەمەۋشىلىگىمەن كوپتەگەن الەۋمەتتىك نىساندار سالىنىپ, ەل يگىلىگىنە بەرىلۋدە. ايتا كەتەلىك, تۇركىستان وبلىسىندا «استانانىڭ 20 جىلدىعىنا – 20 نىسان» اكتسياسى ءجۇرىپ جاتىر. مەرەكە قارساڭىندا وبلىستا جانە شىمكەنت قالاسىندا الەۋمەتتىك نىساندار مەن كاسىپورىن سالاسىندا 20 نىساندى ەل يگىلىگىنە بەرۋ كوزدەلگەن. پايدالانۋعا بەرىلەتىن نىسانداردىڭ قاتارىندا 4 بالاباقشا, شاردارا اۋدانىندا 10 پاتەرلى ەكى قىزمەتتىك تۇرعىن ءۇي مەن تولە بي اۋدانىندا 20 پاتەرلى بەس قاباتتى, ال بايدىبەك اۋدانىندا 1 پاتەرلى 20 كوممۋنالدىق تۇرعىن ءۇي بار.
عالىمجان ەلشىباي, «ەگەمەن قازاقستان»
تۇركىستان وبلىسى