قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ازياداعى ءوزارا ىقپالداستىق جانە سەنىم شارالارى كەڭەسىنە (اوسشك) مۇشە ەلدەردىڭ ۇلتتىق-مادەني ورتالىقتارىنىڭ «استاناعا ىستىق ىقىلاسپەن» اتتى ازاماتتىق فورۋمىنا قاتىستى, دەپ حابارلايدى اقوردانىڭ ءباسپاسوز قىزمەتى.
مەملەكەتتىك حاتشى فورۋم قاتىسۋشىلارىنا ارنالعان قۇتتىقتاۋ سوزىندە ەلباسى ن.ءا.نازارباەۆتىڭ استانا ەلىمىزگە قۋاتتى پاسسيونارلىق سەرپىن بەردى جانە قازاقستاننىڭ كوپ ۇلتتى حالقىن ءوزىنىڭ ورتاق تاريحي تاعدىرىنىڭ بىرەگەيلىگىن سەزىنۋگە, ءوز كۇشىنە سەنۋگە سەپتىگىن تيگىزدى دەگەن سوزىنە نازار اۋداردى.
– تاريحي ولشەم تۇرعىسىنان العاندا قىسقا مەرزىم ىشىندە قازاقستاننىڭ جاڭا ەلورداسى ەل تاۋەلسىزدىگىنىڭ سيمۆولىنا, مەملەكەت باسشىسىنىڭ ستراتەگيالىق باعدارىنىڭ جۇزەگە اسىرىلۋىنىڭ جارقىن مىسالىنا اينالدى, – دەدى گۇلشارا ابدىقالىقوۆا.
مەملەكەتتىك حاتشى ازياداعى ءوزارا ىقپالداستىق جانە سەنىم شارالارى كەڭەسىنىڭ نەگىزگى باسىمدىعى ازيا مەملەكەتتەرى اراسىنداعى ءوزارا قارىم-قاتىناستى نىعايتۋ, تۇراقتىلىقتىڭ ورنىقتى قۇرلىقتىق قۇرىلىمىن قالىپتاستىرۋ ەكەنىن ايتتى.
وتكەن 25 جىلدا ۇيىم قۇرلىقتاعى قاۋىپسىزدىك پەن ىنتىماقتاستىقتى قامتاماسىز ەتۋدىڭ سەنىمدى تەتىگىنە اينالدى.
مەملەكەتتىك حاتشى فورۋمدا مادەنيەتارالىق ىنتىماقتاستىقتىڭ جاڭا جولدارى, ەتنوسارالىق كەلىسىمدى نىعايتۋداعى ازاماتتىق قوعامنىڭ ءرولى جونىندە اشىق ءارى ءتيىمدى ديالوگ وربيتىنىنە سەنىم ءبىلدىردى.
ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو, پارلامەنت دەپۋتاتتارى, ديپلوماتيالىق ميسسيالار, مەملەكەتتىك ورگاندار, ەتنومادەني جانە جاستار بىرلەستىكتەرى, ەلشىلىكتەر جانىنداعى ۇلتتىق-مادەني ورتالىقتار وكىلدەرى, حالىقارالىق ساراپشىلار, سونداي-اق عىلىمي جانە شىعارماشىلىق زيالى قاۋىم وكىلدەرى قاتىستى.
سونداي-اق, فورۋم اياسىندا قازاقستان حالقى اسسامبلەياسى مەن وزبەكستان رەسپۋبليكاسى مينيسترلەر كابينەتى جانىنداعى ۇلتارالىق قاتىناستار مەن دوستىق بايلانىستار جونىندەگى كوميتەت اراسىندا ىنتىماقتاستىق تۋرالى مەموراندۋمعا قول قويىلدى.
***
ازياداعى ءوزارا ىقپالداستىق جانە سەنىم شارالارى كەڭەسىنە مۇشە ەلدەردىڭ ۇلتتىق-مادەني ورتالىقتارىنىڭ فورۋمى 2008 جىلدان بەرى قازاقستان حالقى اسسامبلەياسىنىڭ قولداۋىمەن جىل سايىن وتكىزىلىپ كەلەدى.
2014 جىلى ازياداعى ءوزارا ىقپالداستىق جانە سەنىم شارالارى كەڭەسى (اوسشك) اتقارۋشى كوميتەتى مەن قازاقستان حالقى اسسامبلەياسى اراسىنداعى ىنتىماقتاستىق تۋرالى مەموراندۋمعا قول قويىلدى.
26 مەملەكەت (اۋعانستان, ازەربايجان, باحرەين, بانگلادەش, ۆەتنام, ەگيپەت, ءۇندىستان, يراك, يزرايل, يوردانيا, يران, قازاقستان, كاتار, كامبودجا, قىتاي, قىرعىزستان, مونعوليا, پاكىستان, پالەستينا, كورەيا رەسپۋبليكاسى, رەسەي, بىرىككەن اراب امىرلىكتەرى, تاجىكستان, تايلاند, تۇركيا, وزبەكستان) ازياداعى ءوزارا ىقپالداستىق جانە سەنىم شارالارى كەڭەسىنىڭ مۇشەسى بولىپ تابىلادى.
12 ەل مەن حالىقارالىق ۇيىم (بەلارۋس, يندونەزيا, شري-لانكا, ۋكراينا, اقش, جاپونيا, مالايزيا, فيليپپين, بىرىككەن ۇلتتار ۇيىمى, ەۋروپا قاۋىپسىزدىك جانە ىنتىماقتاستىق ۇيىمى, تۇركپا جانە اراب مەملەكەتتەرى ليگاسى) بايقاۋشى مارتەبەسىنە يە.