1 قاڭتار – ءبىر جىل بۇرىن قابىلدانعان «استانا – جاڭا قالا» ارنايى ەكونوميكالىق ايماعىن قۇرۋ تۋرالى» قازاقستان رەسپۋبليكاسى پرەزيدەنتىنىڭ جارلىعىنا سايكەس قۇرىلعان ارنايى ەكونوميكالىق ايماق ءوز جۇمىسىن باستادى. قازىرگى تاڭدا اەا اۋماعى 7634,71 گەكتاردى قۇراپ وتىر.
22 قاڭتار – پرەزيدەنت ن.نازارباەۆ استانا قالاسىندا ەۋرازيالىق ەكونوميكالىق قاۋىمداستىقتىڭ باس حاتشىسى گ.راپوتامەن كەزدەسىپ, ەۋرازەق قىزمەتىنە بايلانىستى بىرقاتار ستراتەگيالىق ماسەلەلەردى تال-قىلادى.
11 اقپان – ەلباسى ن.نازارباەۆ ۇندىستانعا رەسمي ساپارمەن بارىپ, دەلي قالاسىندا اشىلعان اباي اتىنداعى كوشەنىڭ اشىلۋ سالتاناتىنا قاتىستى.
28 اقپان – الماتىدا ورتالىق ازيا مەملەكەت باسشىلارى ورتالىق ازيا ىنتىماقتاستىق ۇيىمىن قۇرۋ تۋرالى شارتقا قول قويدى.
28 اقپان – ەلوردا تۇرعىندارى ءۇشىن ەمدەۋ-ساۋىقتىرۋ قىزمەتىن جاقسارتۋ ماقساتىندا استانادا «دەمەۋ» وتباسىلىق-دارىگەرلىك امبۋلاتورياسى اشىلدى.
26 ناۋرىز – ۆاشينگتون قازاقستانعا نارىقتىق ەكونوميكالى مەملەكەت مارتەبەسىن بەرۋ تۋرالى رەسمي حابارلادى. بۇل وقيعا ەلىمىزگە ينۆەستورلار تارتۋمەن قاتار, رەسپۋبليكامىزدىڭ حالىقارالىق ءيميدجىن كوتەرۋگە زور سەپتىگىن تيگىزدى.
25 ءساۋىر – الماتى قالاسىندا ءبىرىنشى ەۋرازيا مەديافورۋمى باستالدى. بۇعان الەمنىڭ 30 ەلىنەن كەلگەن جەتەكشى اقپارات اگەنتتىكتەرىنىڭ 200-گە جۋىق ءجۋرناليسى قاتىستى.
13 مامىر – ماسكەۋدە ەكى مەملەكەت باسشىلارى ن.ءا.نازارباەۆ پەن ۆ.ۆ.پۋتين كەزدەسىپ, كاسپيدىڭ سولتۇستىك بولىگىنىڭ تاعانىن پايدالانۋ ماسەلەسىن شەشتى.
3 ماۋسىم – ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ (اوسشك) ءبىرىنشى ءسامميتى اشىلدى.
4 ماۋسىم – استانا تاريحىندا تۇڭعىش رەت اسا ءىرى حالىقارالىق جارىس بوكستان ح الەم كۋبوگى ەلورداداعى «قازاقستان» سپورت سارايىندا سالتاناتتى تۇردە اشىلىپ, بۇل راسىمگە ەلباسى ن.نازارباەۆ قاتىستى.
7 ماۋسىم – رەسەيدىڭ سانكت-پەتەربۋرگ قالاسىندا شانحاي ىنتىماقتاستىعى ۇيىمىنا مۇشە ەلدەردىڭ كەزەكتى ءسامميتى ءوتىپ, جيىنعا قاتىسۋشى مەملەكەت باسشىلارى ورتاق دەكلاراتسياعا قول قويدى.
29 تامىزدا – استانا قالاسىنىڭ سيمۆولى رەتىندە سالىنعان «بايتەرەك» مونۋمەنتى ەلباسى ن.ءا.نازارباەۆتىڭ قاتىسۋىمەن سالتاناتتى تۇردە اشىلدى. اتالمىش نىساننىڭ بيىكتىگى – 97, ديامەترى – 27 مەتر. ۇشار باسىندا التىن شار ورنالاسقان. شىنىمەن كومكەرىلگەن كۇمبەزدىڭ سالماعى – 70 توننا. التىن شار مەن عيماراتتىڭ نەگىزگى كىرەبەرىسى ءبىر-بىرىمەن «وقپان» دەپ اتالاتىن سالماعى 695 توننا مەتالل قۇرالىممەن تۇتاستىرىلعان.
9 قىركۇيەك – مەملەكەت باسشىسى ن.ءا.نازارباەۆ استاناعا رەسمي ساپارمەن كەلگەن وزبەكستان باسشىسى ي.كارىموۆتى قابىلداپ, ەكى ەل اراسىنداعى مەملەكەتتىك شەكارانى دەليميتاتسيالاۋ ءىسىن تولىق اياقتادى.
14 قىركۇيەك – استانا قالاسىنداعى «شۇبار» كەنتىندە ەلباسى نۇرسۇلتان نازارباەۆتىڭ قاتىسۋىمەن «VITA» اتتى تازا سۋ وندىرەتىن كاسىپورىن اشىلدى.
5 قازان – ەلوردا تورىندە ورنالاسقان «كونگرەسس-حولدا» قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, قالامگەر شەرحان مۇرتازانىڭ 70 جىلدىعىنا ارنالعان سالتاناتتى كەش ءوتتى. مەرەيتوي يەسى تۋرالى باس باياندامانى كلاسسيك جازۋشى ءابىش كەكىلباەۆ جاسادى.
17 قازان – قازاقستان پرەزيدەنتى ن.ءا.نازارباەۆ استاناعا رەسمي ساپارمەن كەلگەن بۇۇ باس حاتشىسى ك.اننانمەن كەزدەستى. بۇل وقيعا – ەلىمىزدىڭ ساياسي ومىرىندە كورنەكتى ورىن العان جانە قازاقستاننىڭ بۇۇ-مەن ىنتىماقتاستىعىنىڭ ماڭىزىن ارتتىرعان شارا بولدى.
23 قازان – تۇركىستان قالاسىندا دۇنيەجۇزى قازاقتارىنىڭ ەكىنشى قۇرىلتايى ءوتتى. قۇرىلتايعا 32 مەملەكەتتەن 400-دەن استام وكىل كەلىپ قاتىستى. جيىندا ورالمانداردىڭ ەلگە ورالۋ ماسەلەسى قارالىپ, كوشى-قون كۆوتاسىنىڭ مولشەرىن ۇلعايتۋ تۋرالى شەشىم شىقتى.
19 جەلتوقسان – استانانىڭ جاڭا ورتالىعىندا «قازمۇنايگاز» ۇلتتىق كومپانياسىنىڭ عيماراتى پايدالانۋعا بەرىلدى. نىساننىڭ اشىلۋ سالتاناتىنا ەلباسى نۇرسۇلتان نازارباەۆ قاتىستى.
23 جەلتوقسان – قىتاي حالىق رەسپۋبليكاسىنا مەملەكەتتىك ساپارمەن بارعان ەلباسى نۇرسۇلتان نازارباەۆ بىرقاتار ەكىجاقتى قۇجاتقا قول قويدى. ونىڭ ەڭ ماڭىزدىسى – قىتاي مەن قازاقستان اراسىنداعى دوستىق, تاتۋ كورشىلىك تۋرالى شارت.
27 جەلتوقسان – ەلوردا تورىندە ورتالىق ازيا ىنتىماقتاستىق ۇيىمىنا قاتىسۋشى مەملەكەتتەر باسشىلارىنىڭ ءتورتىنشى كەزدەسۋى ءوتتى.
دايىنداعان بەكەن قايرات ۇلى,
«ەگەمەن قازاقستان»