وكىنىشكە قاراي, ءالى دە كوپ ادام اقشاعا بارلىعىن ساتىپ الۋعا بولادى دەپ ساناپ, وسى ۇستانىمدى باسشىلىققا الىپ ءومىر سۇرەدى. بۇعان كەيبىرەۋلەردى پارا الۋ ءۇشىن تاۋەكەلگە بارۋعا يتەرمەلەيتىن جالاقىنىڭ ماردىمسىزدىعى, سونداي-اق ازاماتتارىمىزدىڭ كۇندەلىكتى تۇرمىس-تىرشىلىكتە جەمقورلىق كورىنىستەرىنە كۋا بولا ءجۇرىپ, وعان كوز جۇما قاراۋى دا اسەر ەتپەي قويمايدى.
ءوڭىر ءۇشىن تۇرعىن ءۇي كەزەگىنىڭ ساقتالماۋى مەن باسپانا ءبولۋ بارىسىندا جەكەلەگەن ازاماتتارعا ارتىقشىلىقتار بەرۋ دە تاڭسىق قۇبىلىس ەمەس. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى جامبىل وبلىستىق دەپارتامەنتىنىڭ مالىمەتتەرى بويىنشا, تۇرعىن ءۇي-كوممۋنالدىق بولىمدەرىنىڭ جۇمىستارىنا جاسالعان تالداۋ سارىسۋ اۋدانىنىڭ تۇرعىن ءۇي كوميسسياسىنىڭ ءبىر بولمەلى پاتەر الۋى ءتيىس ازاماتتار ب. مەن پ.-عا زاڭسىز ارتىقشىلىقتار جاساعانىن كورسەتتى. زاڭناما تالاپتارىنا قاراماستان, ولارعا ەكى بولمەلى پاتەرلەر بەرىلگەن. ال, ەكى بالاسى بار ازاماتشا ب.-عا تۇرعىن ءۇي كوميسسياسىنىڭ شەشىمىمەن ەكى بولمەلى پاتەر بەرىلسە, وسىنداي جاعدايداعى ەكى بالالى ازاماتشالار ك. مەن ز.-عا كوميسسيا شەشىمىمەن ءۇش بولمەلى پاتەرلەر بولىنگەن. بۇعان قوسا, تۇرعىن ءۇي كوميسسياسى مۇشەلەرىنىڭ زاڭسىز ارەكەتتەرى مەن تۇرعىن ۇيلەردى زاڭسىز ءبولۋ سالدارىنان زاڭنامامەن رەتتەلەتىن بەلگىلەنگەن تۇرعىن ءۇي الۋ كەزەگىنىڭ رەتى بۇزىلعان. 119 جانە 120-كەزەكتەگى كوپ بالالى وتباسىلى ازاماتشالار ت. مەن ي.-گە پاتەرلەر, 117-كەزەك رەتىمەن تۇرعان ءدال سونداي كوپ بالالى وتباسىلى ازاماتشا ن.-دان بۇرىن بەرىلگەن, بۇل ازاماتشا قازىرگى كۇنگە دەيىن ءوز كەزەگىن كۇتۋدە. كەزەگى جەتپەگەن ادامدارعا نەگىزسىز پاتەر بەرۋدىڭ وسىنداي فاكتىلەرى تالاس اۋدانىندا دا انىقتالدى. كىنالىلەر تارتىپتىك جاۋاپكەرشىلىككە تارتىلدى.
سونىمەن قاتار اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ وبلىستىق اۋماقتىق ينسپەكتسياسىنىڭ 10 مىڭداي فيتوسانيتارلىق سەرتيفيكاتتاردى زاڭسىز بەرۋ فاكتىلەرى تىركەلدى. مەملەكەتتىك ىستەر جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسشىسى ماقسۇت نالىباەۆتىڭ ايتۋىنشا, بۇل مەملەكەتتىك قىزمەت تولىق ەمەس قۇجاتتار پاكەتىمەن جۇيەلى نەگىزدە سوڭعى 2 جىل بويى كورسەتىلىپ كەلگەن. وسىلايشا اۋىل شارۋاشىلىعى ءمينيسترىنىڭ بۇيرىعىمەن بەكىتىلگەن ءتيىستى رەگلامەنت تالاپتارىنا قاراماستان, قابىلدانعان وتىنىمدەردىڭ كوپشىلىگى تىركەۋگە الىنباعان, سونداي-اق باسشىلىقتىڭ بۇرىشتاماسى مەن كىرىس ءمورتابانى جوق جانە ءوتىنىشتىڭ كەلىپ تۇسكەن كۇنى كورسەتىلمەگەن. دەمەك, مەملەكەتتىك قىزمەت كورسەتۋ مەرزىمىن سوزبالاڭعا سالۋعا, نە بولماسا ونى جىلدامداتىپ جىبەرۋگە مۇمكىندىك الۋ ءۇشىن قابىلدانعان وتىنىمدەر ادەيى تىركەۋگە الىنباعان. تىپتەن, ءوتىپ كەتكەن كۇنمەن سەرتيفيكاتتار جاساۋ جاعدايلارى دا انىقتالدى. ناتيجەسىندە, قىلمىستىق كودەكستىڭ 369-بابىنىڭ 2-تارماعى – قىزمەتتىك جالعاندىق دەرەگى بويىنشا ينسپەكتسيانىڭ باس مامانى س.-عا قاتىستى قىلمىستىق ءىس قوزعالدى. سوت شەشىمىمەن مەملەكەتتىك قىزمەتشى كىنالى دەپ تانىلىپ, مۇلكىن تاركىلەۋ جانە مەملەكەتتىك قىزمەتتە ءومىر بويىنا لاۋازىم يەلەنۋ قۇقىعىنان ايىرا وتىرىپ, وعان 1 ميلليون 588 مىڭ تەڭگەدەن استام كولەمدە ايىپپۇل سالىندى.
وكىنىشكە قاراي, كوپ ازامات قازىرگى كۇنى زاڭناماعا سايكەس ءارتۇرلى زاڭسىز يگىلىكتەر العان ادامدار عانا ەمەس, ولاردى بەرگەندەر دە جازاعا تارتىلاتىنىن ۇمىتىپ كەتەدى. اعىمداعى جىلدىڭ ءساۋىر ايىندا مەملەكەتتىك ىستەر جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى مەن جەرگىلىكتى پوليتسيا قىزمەتىنىڭ بىرلەسە جۇرگىزگەن رەيدتىك تەكسەرىسى بارىسىندا جول قوزعالىسى ەرەجەلەرىن بۇزعان, Lexus GX 470 ماركالى كولىك جۇرگىزۋشىسى, ازامات ر.-نىڭ جپق ينسپەكتورلارىنا 2 000 تەڭگە كولەمىندە زاڭسىز ماتەريالدىق سىياقى بەرۋ فاكتىسى انىقتالدى. سونىمەن اكىمشىلىك كودەكستىڭ 676-بابى (جەكە تۇلعالاردىڭ زاڭسىز ماتەريالدىق سىياقى بەرۋi) بويىنشا جۇرگىزۋشىگە قاتىستى اكىمشىلىك ءىس قوزعالىپ, قالالىق مامانداندىرىلعان اكىمشىلىك سوتتىڭ قاراۋىنا جونەلتىلدى. ناتيجەسىندە, سوت قاۋلىسىمەن ازامات ر. 481 مىڭ تەڭگە كولەمىندەگى ايىپپۇل تۇرىندەگى اكىمشىلىك جاۋاپكەرشىلىككە تارتىلدى.
تاعى ءبىر مىسال. وبلىستىق ىشكى ىستەر دەپارتامەنتى ءباسپاسوز قىزمەتىنىڭ حابارلاۋىنشا, قاڭتار ايىنىڭ سوڭىندا ىشكى ىستەر مينيسترلىگى ەسىرتكى بيزنەسىمەن كۇرەس دەپارتامەنتىنىڭ قىزمەتكەرلەرى قورداي اۋدانىنىڭ اۋماعىندا ازامات ش.-نى ۇستاپ, ودان سالماعى 187,14 گرامم گەروين تابىلعان. قىلمىستىق ءىس ودان ءارى تەرگەۋ جۇمىستارىن جۇرگىزۋ ءۇشىن وبلىستىق ءىىد تەرگەۋشىسى ك.-گە تاپسىرىلعان. ءبىراز ۋاقىتتان كەيىن وعان ازامات ي. كەلىپ, ءوزىن ۇستالۋشىنىڭ تۋىسىمىن دەپ تانىستىرعان جانە قابىلداۋىن وتىنگەن. قىزمەتتىك كابينەتتە ازامات ي. تەرگەۋشىگە 1 ميلليون تەڭگە ۇسىنىپ, ازامات ش.-نىڭ ارەكەتىن نەعۇرلىم جەڭىل قىلمىس تۇرىنە قايتا سارالاۋدى سۇراعان. ازامات ي.-ءدىڭ پوليتسيا قىزمەتكەرىنە اقشا ۇسىنعان زاڭسىز ارەكەتى قۇجاتتاندىرىلىپ, ايعاق زاتتار الىندى جانە قىلمىستىق ءىس ماتەريالدارىنا تىگىلدى. ازامات ي. مەن ونىڭ وسى ىسكە قاتىسقان اپكەسى دە سوت ارقىلى 2 ايعا قاماۋعا الىندى. سوتقا دەيىنگى تەرگەۋ امالدارى جۇرگىزىلۋدە.
جالپى 2017 جىلى كورسەتىلەتىن مەملەكەتتىك قىزمەتتەر سالاسىنداعى قۇقىق بۇزۋشىلىقتار بويىنشا اكىمشىلىك قۇقىق بۇزۋشىلىقتار جاساعانى ءۇشىن باسىم بولىگى اۋدان اكىمدىكتەرىنىڭ ءبولىم باسشىلارى بولىپ تابىلاتىن لاۋازىمدى تۇلعالارعا قاتىستى 16 اكىمشىلىك حاتتاما تولتىرىلدى. ولاردىڭ بارلىعى جالپى سوماسى 1 ميلليون 500 تەڭگە كولەمىندەگى ايىپپۇل تۇرىندەگى جاۋاپكەرشىلىككە تارتىلىپ, اتالعان سوما تولىق كولەمدە مەملەكەت كىرىسىنە الىندى.
ماقسۇت نالىباەۆ سونىمەن قاتار, اعىمداعى جىلدىڭ ءبىرىنشى توقسانىندا وڭىرلىك مەملەكەتتىك ورگانداردىڭ شامامەن 2 ميلليون تەڭگەگە مەملەكەتتىك قىزمەت كورسەتكەنىن اتاپ ءوتتى. اقپاراتتىق جۇيەلەر ارقىلى كورسەتىلگەن مەملەكەتتىك قىزمەتتىڭ ءوسۋ قارقىنى كوڭىل قۋانتادى. سوڭعى جىلدارى ەلەكتروندى فورماتتا كورسەتىلگەن قىزمەتتەردىڭ ۇلەس سالماعى 33,5 پايىزعا ءوستى. دەمەك, ءداستۇرلى تاسىلمەن كورسەتىلەتىن قىزمەت سانى ەداۋىر ازايىپ, سىبايلاس جەمقورلىق تاۋەكەلدەرى دە تومەندەۋدە.
ايجان ماديماروۆا,
جامبىل وبلىسى بويىنشا مەملەكەتتىك قىزمەت ىستەرى دەپارتامەنتىنىڭ ءباسپاسوز حاتشىسى
تاراز