الماتىداعى «بورالداي ساق قورعاندارى» ارحەولوگيالىق پاركىندە ەكى كۇن قاتارىنان سالتانات قۇرعان ايتۋلى شاراعا الەمنىڭ ون ەكى مەملەكەتىنەن كەلگەن ايگىلى ەتنو مۋزىكانتتار مەن تانىمال سپورتشىلار قاتىستى. شاراعا مۇرىندىق بولعان الماتى قالاسى اكىمدىگىنىڭ وكىلدەرى بيىلعى فەستيۆال استانانىڭ 20 جىلدىعىنا ورايلاستىرىلىپ وتىرعانىن ايتادى.
قاز-قاتار تىگىلگەن قازاقى ناقىشتاعى اقشاڭقان ۇيلەر شارانىڭ شىرايىن اشىپ, اۋىزدىعىمەن الىسقان ارعىماقتار رۋح مەرەكەسىنىڭ اجارىن ارتتىرا ءتۇستى. ءبىر بويىنا سان ونەردى قاتار توعىستىرعان ورەلى ونەرپازدار جيىلعان جۇرتتى كوشپەلىلەر الەمىمەن قاۋىشتىرىپ, ۇلى دالانىڭ رۋحىن اسپانداتتى. بىلەگى قۋاتتى جىگىتتەر بالۋاندىق ونەردىڭ سيقىرىمەن باۋراسا, جۇرەگى شۋاقتى ونەر مايتالماندارى جىردان شاشۋ شاشىپ, سالقار دالانى اسەم سازىمەن تەربەدى. ولاردىڭ ساپىندا ماجارستاندىق گابريەللا كيش جانە زولتان شويومفي-ناگي-شامان, باۋىرلاس قىرعىز ەلىنىڭ اتاقتى ەتنو ءانشىسى نۇرزات ايدارقۇلوۆا, كومەيمەن ءان ايتۋدىڭ حاس شەبەرى التايلىق يرينا كەنزينا, بۋراتتار ەلىنىڭ اتىنان كەلگەن رەسەيدىڭ ەڭبەك سىڭىرگەن ارتىستەرى سەرگەي ايۋشەەۆ پەن ولەگ بۋلۋتوۆ, «بايكال» مەملەكەتتىك ۇلتتىق ءان جانە بي تەاترى, «سەرگە» انسامبل, سونداي-اق « ۇلىتاۋ», «الاش ۇلى», «حاسساق», «تۇران», «تيگراحاۋد», «سازگەن سازى», «سارماد», «بابالار سازى» ءتارىزدى وتاندىق ونەر ۇجىمدارىن ەرەكشە اتاۋعا بولادى.
ۇلتتىق قۇندىلىقتارىمىزدىڭ دىڭگەگى سانالاتىن كوكپار, اۋدارىسپاق, قىز قۋ, اساۋعا تۇساۋ سالۋ, بايگە ات دەسە دەلەبەسى قوزاتىن اعايىندى ارقالاندىرسا, قۇسبەگىلەر مەن ساياتشىلار ايماعىندا ۇيىمداستىرىلعان بۇركىت, يتەلگى ۇشىرۋ, قۇماي تازىنى اڭعا سالۋ سياقتى ۇلتتىق ويىندار كورەرمەندى ءتانتى ەتتى. تەمىردەن ءتۇيىن تۇيگەن زەرگەرلەر مەن ىسمەرلەر شەپ قۇرعان شەبەرلەر ايماعىندا ءجۇن ساباۋ, ۇرشىق ءيىرۋ, كيىز, تەكەمەت باسۋ, كەستە توقۋ, قىش قۇمىرا جاساۋدىڭ قىر-سىرىنا قانىقتىراتىن ارنايى شەبەرلىك ساباقتارى وتكىزىلدى. فەستيۆال قوناقتارى شوققا پىسكەن تابا نان, قازان قارما, بالقۋىرداق, نارىن, بۇلكەقارىن, ۇلپەرشەك, جاۋجۇرەك, بالقايماق ءتارىزدى ءتىل ۇيىرەتىن ءتۇرلى تاعامداردان ءدام تاتىپ, ۇمىتىلىپ بارا جاتقان ۇلتتىق اس مازىرلەرى قايتا جاڭعىردى.
«باستى ماقسات – قازاقستاندىقتار مەن شەت ەلدىك قوناقتارعا كوشپەندىلەر مادەنيەتىن, قازاقتىڭ ەجەلگى تاريحى مەن سالت-ءداستۇرىن كورسەتۋ» – دەيدى شارانى ۇيىمداستىرۋشىلار. جىلداعى ءداستۇر بويىنشا دۋماندى مەرەكەنى كەز-كەلگەن تۇرعىننىڭ تەگىن بارىپ تاماشالاۋىنا تولىقتاي مۇمكىندىك جاسالدى. قالاداعى ورتالىق ستاديون مەن «استانا» الاڭىنان, «ساياحات» اۆتوبەكەتى مەن «الاتاۋ» ءداستۇرلى ونەر تەاترى ماڭىنان ءار جارتى ساعات سايىن ارنايى اۆتوبۋستار قاتىناپ, الماتىلىقتار مەن قالا قوناقتارىن كوشپەندىلەر مۇراسىمەن قاۋىشتىردى. وسىلايشا ەتنوفەستيۆالعا كەلگەندەر كوشپەندىلەردىڭ كونە تاريحىنان سىر شەرتىپ, تۇرمىس-سالتىنان حابار بەرەتىن وزىندىك ەرەكشەلىكتەرىن كوزبەن كورىپ قانا قويماي كوڭىلگە ءتۇيىپ قايتتى. مۇنى شەتەلدىك مەيمانداردىڭ ىستىق ىقىلاسىنان بايقادىق. ۇلتتىق قۇندىلىقتاردىڭ قاينارىنان قانىپ ءىشىپ, ەجەلگى تۇران وركەنيەتى مەن كونە تۇركىلەر تاريحىنا ساياحات جاساۋعا كەلگەندەر قازاق دالاسىنىڭ كەڭدىگىنە, بالاسىنىڭ ورلىگىنە تاعى دا ءبىر باس ءيدى.
ارمان وكتيابر,
«ەگەمەن قازاقستان»
الماتى