باتىس قازاقستان وبلىستىق توتەنشە جاعدايلار دەپارتامەنتى سۋ جاڭا 28 تەحنيكاعا يە بولدى. بۇلاردىڭ ءبارى دە ارنايى دايىندالعان, جول تالعامايتىن, توتەنشە جاعداي كەزىندە حالىققا دەر كەزندە كومەك كورسەتۋگە ارنالعان كولىكتەر.
ايتا كەتۋ كەرەك, توتەنشەلىكتەرگە بۇل سىيلىق استانا قالاسىنىڭ 20 جىلدىعى قارساڭىندا بەرىلىپ وتىر. كولىكتەر ورال قالاسىندا جاقىندا عانا قازاقستان رەسپۋبليكاسىنىڭ تۇڭعىش پرەزيدەنتى اتاۋى بەرىلگەن الاڭدا سالتاناتتى جاعدايدا تابىس ەتىلدى. باتىس قازاقستان وبلىسى اكىمىنىڭ ورىنباسارى ميرجان ساتقانوۆ سالا ماماندارىنا جاڭا كولىكتەردىڭ كىلتىن تابىس ەتە تۇرىپ, «توتەنشە جاعدايلار سالاسىن قاجەتتى تەحنيكالارمەن جابدىقتاۋ بولاشاقتا دا جالعاسادى» دەپ اتاپ ءوتتى.
توتەنشەلىكتەردىڭ اۆتوپاركىنە قوسىلعان 28 جاڭا ارنايى كولىكتىڭ 18-ءى – اسا (ۋاز 390995-460-04), ۇشەۋى – اتس 5-40 ۋرال 4320, بىرەۋى – ال-32 كاماز 43118, التاۋى – «Hyundai» ماركالى جەدەل كولىك ەكەن.
قازىبەك قۇتتىمۇرات ۇلى,
«ەگەمەن قازاقستان»
باتىس قازاقستان