استانانى جىر-دۋمانعا بولەگەن تۇركىستان وبلىسىنىڭ مادەني كۇندەرىنىڭ نۇكتەسى وتكەن سارسەنبىنىڭ ساتىندە قويىلدى.
ماڭىزدى شارانىڭ ءتۇيىنى ەسەبىندە «ەتنواۋىل» ۇلتتىق مادەني كەشەنىندە ۇيىمداستىرىلعان تۇركىستاندىق ونەر تارلاندارىنىڭ مەرەكەلىك كونتسەرتى كوپشىلىكتىڭ كوڭىلىنەن شىقتى.
«شىرقا, شارىقتا, تۇركىستان» دەپ ارقانى انمەن تەربەگەن قورىتىندى كونتسەرتكە وبلىسقا ەسىمى تانىمال 150-گە جۋىق مادەنيەت جانە ونەر شەبەرلەرى قاتىستى. دۋماندى كەش قازاقتىڭ «قارا جورعا» بيىمەن باستالىپ, تۇركىستان تۋماسى ايگىلى كومپوزيتور ش.قالداياقوۆتىڭ جانە ايماققا اتى ءمالىم ە.سەرىكباەۆ, ءا.بوتاعاراەۆ سىندى تانىمال سازگەرلەر قالامىنان تۋعان پاتريوتتىق, ليريكالىق اندەر شىرقالدى.
سونىمەن قاتار ءوڭىر مادەنيەتىنە وزىندىك ۇلەسىن قوسىپ جۇرگەن ونەر مايتالماندارى ەلىمىزگە ەڭبەك سىڭىرگەن ءارتىس ءسابيراش ابدرايىموۆا, حالىقارالىق, رەسپۋبليكالىق بايقاۋلاردىڭ لاۋرەاتى الدەن جاقسىبەكوۆ, ءداستۇرلى ءانشى اقمارال بينازاروۆا جانە «قازىنا» بي توبى مەن «تۇمار» فولكلورلىق ءانسامبلى قاتىسىپ, باس قالا تۇرعىندارىن ءان-جىرمەن سۋسىنداتتى. بۇلاردان باسقا كونە تۇراندىق بايىرعى سارىندى جاڭعىرتىپ جۇرگەن «سارىن», «رەترو» توپتارى دا كورەرمەن ىقىلاسىنا بولەندى.
وبلىستىق مادەني مەكەمەلەرىنە جاۋاپتى ءباسپاسوز وكىلى ءمادينا ايتپەنبەتوۆانىڭ الدىن الا تانىستىرعان مالىمەتىنە جۇگىنسەك, ءدال قازىر وبلىس كولەمىندەگى 736 مادەنيەت جانە ونەر مەكەمەسىندە 5 مىڭعا جۋىق ادام ابىرويلى ەڭبەك ەتىپ ءجۇر. سونىمەن قاتار ءوڭىردىڭ رۋحاني-مادەني احۋالى جىلدان جىلعا دامۋ ۇستىندە, بۇل ءۇردىس جاڭادان قۇرىلىپ جاتقان ايماقتىڭ رۋحانياتىن اقساتپاي الىپ كەتۋگە ءتيىس. دانا حالقىمىز «التىن شىققان جەردى بەلدەن قاز» دەگەنىندەي بۇعان دەيىن تۇركىستان تورىنەن تۇلەپ ۇشقان گۇلنار سيقىمباەۆا, ساكەن مايعازيەۆ, جۇبانىش جەكسەن ۇلى, التىناي جوراباەۆا سىندى دۇلدۇلدەر كوپ. بۇلاردىڭ ءىزىن جالعاعان قانشاما جاس دارىندار ءوسىپ كەلە جاتىر. بولاشاقتا تۇركىستاندىقتاردىڭ ابىرويىن ورگە سۇيرەيتىن وسىلار بولادى, دەيدى شارانى ۇيىمداستىرۋشىلار.
بەكەن قايرات ۇلى,
«ەگەمەن قازاقستان»