ەلىمىزدەگى ادام قۇقىقتارى جونىندەگى ۋاكىل اسقار شاكىروۆ قازاقستان ۇكىمەتىنىڭ نازارىن گەموفيلياعا شالدىققان ناۋقاستارعا مەملەكەت كەپىلدىك بەرەتىن تەگىن مەديتسينالىق كومەك شەڭبەرىندە ءدارى-دارمەكپەن قامتاماسىز ەتۋ ماسەلەسىنە اۋداردى.
وندا دەنساۋلىق ساقتاۋ مينيسترلىگى تاراپىنان 2018 جىلعى امبۋلاتوريالىق جانە ستاتسيونارلىق قامتاماسىزداندىرۋدا گەموفيلياعا شالدىققاندار ءۇشىن ءدارى-دارمەكتىڭ ساتىپ الۋ سوماسى 191,7 ملرد تەڭگەدەن اساتىنى, ياعني مالىمدەلگەن قاجەتتىلىكتىڭ 90 پايىزىنا ساي كەلەتىنى جانە ونىڭ 75 پايىزىنىڭ ايماقتارعا جەتكىزىلەتىنى, الايدا ۇلتتىق قۇقىق قورعاۋ مەكەمەسىنە ازاماتتاردىڭ قاجەتتى ءدارى-دارمەكتەردى الا الماي وتىرۋىنا قاتىستى ارىزدار ءتۇسىپ جاتقانى ايتىلعان.
ومبۋدسمەننىڭ ايتۋىنشا, «قازاقستان مۇگەدەكتەر قاۋىمداستىعى – گەموفيلياعا شالدىققاندار» قوعامدىق بىرلەستىگى وسى ۋاقىتقا دەيىن گەموفيليامەن اۋىراتىن ادامداردان باتىس قازاقستان, اتىراۋ, اقمولا, سولتۇستىك قازاقستان جانە وڭتۇستىك قازاقستان وبلىستارىنان ارىز-شاعىمدار ءتۇسىپ وتىرعانىن جازىپ, دارىمەن قامتىلۋدا كەڭ اسپەكتىدە ماڭىزدى جۇيەلىك پروبلەمالار تىزبەگى بارلىعىن جەتكىزدى. بۇل جايت دەنساۋلىق ساقتاۋ سالاسىنداعى ۇكىمەتتىك ەمەس ۇيىمداردىڭ الماتى قالاسىندا وتكەن ءباسپاسوز كونفەرەنتسياسىنىڭ قورىتىندىلارىندا راستالعانىن دا اتاپ كورسەتكەن.
قازىرگى ۋاقىتتا قازاقستاندا «گەموفيليا» دياگنوزى بار 1273 ناۋقاس ەسەپتە تۇرعانىمەن (841 – ەرەسەك ادامدار, 432 – بالالار), ولارعا سالالىق مامان – گەماتولوگتاردىڭ ورنىنا ۋچاسكەلىك تەراپەۆتتەر مەديتسينالىق قىزمەت كورسەتىپ, وسى ساناتتاعى ناۋقاستاردىڭ كاسىبي ماماندارعا زارۋلىگى ايقىن سەزىلۋدە. ال گەموفيلياعا ۇشىراعان ناۋقاستار گەماتولوگتىڭ مامانداندىرىلعان كومەگىنە عانا ەمەس, سونداي-اق ءتىس دارىگەرلەرىنىڭ, حيرۋرگتەردىڭ, تراۆماتولوگتاردىڭ, پسيحولوگتاردىڭ سالالىق مامانداندىرىلعان كومەگىنە دە ءزارۋ. اتالعان ءباسپاسوز كونفەرەنتسياسى بارىسىندا گەموفيليامەن اۋىراتىن بالالاردىڭ اتا-انالارى سالالىق مامانداردىڭ ولاردىڭ بالالارىن ەمدەۋدەن باس تارتقاندىعى تۋراسىندا دا مالىمدەگەن.
سونداي-اق ادام قۇقىقتارى جونىندەگى ۋاكىل ۇكىمەتتىڭ نازارىن ەرتە كەزدەن اۋرۋدى دياگنوستيكالاۋ, ەمدەۋ, پروفيلاكتيكا, ناۋقاستاردى وڭالتۋ ۇدەرىستەرىن جۇزەگە اسىراتىن مەكەمە قۇرۋ قاجەتتىگىنە اۋداردى.
انار تولەۋحانقىزى,
«ەگەمەن قازاقستان»