قازاق مەملەكەتتىك قىزدار پەداگوگيكالىق ۋنيۆەرسيتەتىندە بۇۇ تۇرعىن حالىق سالاسىنداعى قورىنىڭ Y-Peer/جاس قۇرداستار قوزعالىسىنىڭ رەسۋرستىق ورتالىعى اشىلادى.
– الداعى ۋاقىتتا قىزدار ۋنيۆەرسيتەتىنىڭ الەۋمەتتىك جانە گەندەرلىك عىلىمي-زەرتتەۋلەر ينستيتۋتى مەن اتالعان جاستار قوزعالىسى بىرلەسىپ ستۋدەنتتەرگە گەندەرلىك تەڭدىك جايىندا, جاستاردىڭ كوشباسشىلىق دەڭگەيىن كوتەرۋ ماقساتىندا سەمينارلار مەن ترەنينگتەر وتكىزۋدى جوسپارلاپ وتىر. جاستار اراسىندا تاربيە بەرۋ مەن اقپاراتتاندىرۋ جۇمىستارىن جۇرگىزۋ, ولاردىڭ جەكە ازاماتتىق پوزيتسياسىن قالىپتاستىرۋ جانە كوشباسشىلىق الەۋەتىن دامىتۋ بۇگىندە ۇلكەن ماڭىزعا يە, – دەيدى ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان.
ايتا كەتەيىك, بۇۇ تۇرعىن حالىق سالاسىنداعى قورى قازاقستان حالقىنىڭ تۇراقتى دامۋى مەن ءال-اۋقاتىن ارتتىرۋداعى ۇلەسى ۇلكەن. ۇيىم قىزمەتى نەگىزىنەن انا دەنساۋلىعىن ساقتاۋ, ايەلدەر, جاستار مەن جاسوسپىرىمدەردىڭ ءومىرىن جاقسارتۋ ءۇشىن ناپسىقۇمارلىق جانە رەپرودۋكتيۆتىك دەنساۋلىق پەن رەپرودۋكتيۆتىك قۇقىقتاردى قورعاۋعا جاردەمدەسۋ ارقىلى دامۋ سالاسىنداعى مىڭجىلدىقتىڭ بەسىنشى ماقساتىنا قول جەتكىزۋگە كومەك كورسەتۋگە باعىتتالعان.
بۇگىندە Y-Peer/جاس قۇرداستار قوزعالىسى الەمنىڭ 44 ەلىندە قىزمەت اتقارادى. جاستار اراسىندا سالاۋاتتى ءومىر سالتىن ناسيحاتتاۋ, گەندەرلىك تەڭدىكتى ساقتاۋ, ولاردىڭ كوشباسشىلىق قاسيەتتەرىن دامىتۋ باستى ماقساتى بولىپ تابىلاتىن ۇيىم 1999 جىلى بۇۇ جاستاردى دامىتۋ جانە قورعاۋ ماسەلەلەرى بويىنشا قۇرىلعان ۆەدومستۆوارالىق جۇمىس توبىنىڭ باستاماسىمەن قۇرىلعان.