وتكەن چەمپيوناتتىڭ تارتىسىن قىزدىرىپ, ءتورت جىلدىقتىڭ باستى سەنساتسياسىنا بالانعان كوستا-ريكا قۇراماسى بۇل جولى دا سايلانىپ وتىر. 2014 جىلى ولار شيرەك فينالعا دەيىن جەتسە, بيىل ودان ارىگە بارامىز دەپ ماقسات قويدى. قايتا-قايتا باتپان قۇيرىق بۇلارعا قايدان بولسىن دەپ ويلاعاندارعا قارسى ايتار ءۋاجىمىز بار. سونىمەن قاتار بۇل كوماندادا ەلتسين ەسىمدى فۋتبولشى ونەر كورسەتەدى.
2014 جىلى برازيليادا اتوي سالعان كوستا-ريكا قۇراماسىن سول كەزدەگى ەل پرەزيدەنتى فابريسيو الۆارادونىڭ ءوزى قولداپ, جانكۇيەرلەر اراسىنان تابىلدى. وتانداستارى سوققان ءاربىر گولعا پرەزيدەنت بالاشا قۋاندى. ۇلتتىق قۇراما فۋتبولشىلارى ونىڭ ءىس-ارەكەتىنەن شابىت الىپ, ارقالانا وينادى. بيىل 2 ساۋىردە كوستا-ريكا جاڭا پرەزيدەنتتى سايلادى. كەيىننەن انىقتالعاندا فابريسومەن تەگى بىردەي كارلوس الۆارادو دا فۋتبولعا سالعىرت قارامايتىن ادام بولىپ شىقتى. جەرگىلىكتى جۋرناليستەردىڭ جازۋىنا سەنسەك, جاڭا پرەزيدەنت تە ەل استاناسى سان-حوسەنىڭ باستى الاڭىندا ۇلكەن ەكراننان قۇراما ويىنىن تاماشالاۋدى جوسپارلاپ وتىر. دەمەك فۋتبولشىلار بۇل جولى دا ەل نامىسىن قولدان بەرمەي, باسشىلارىن جەرگە قاراتپاۋى ءتيىس.
كوستا-ريكا قۇراماسى وتكەن جىلدىڭ تامىزىنان بەرى اقش-تى ارتقا تاستاپ, فيفا رەيتينگىسىندە 16-ورىنعا كوتەرىلدى. سونىڭ ارقاسىندا ولار جەرەبە تارتۋ ءراسىمى كەزىندە كونكاكاف كونفەدەراتسياسىنىڭ ءنومىرى ءبىرىنشى كومانداسى بولىپ ەسەپتەلىندى. بىراق ءبارىبىر دە كوستا-ريكانىڭ توبىنا برازيليا مەن ەۋروپالىق 2 بىردەي ۇجىم ءتۇستى. سوندىقتان دا كوستاريكالىقتار جەرەبە جولداس بولمادى دەپ قىنجىلادى. ەۋروپالىق ۇجىمنىڭ ءبىرى تەگەۋرىندى شۆەيتساريا بولسا, ەكىنشىسى ودان اسقان سەربيا. ال برازيليامەن تەڭ شايقاسۋدىڭ ءوزى قانداي قيىن ەكەنى بەلگىلى.
كوستا-ريكا قۇراماسىنىڭ باستى جۇلدىزى – كەيلور ناۆاس. «رەال» مادريد» كومانداسىنىڭ نەگىزگى قاقپاشىسى وتكەن چەمپيوناتتان بەرى يسپان كلۋبىنا اۋىسىپ, كلۋبتىق دەڭگەيدە ءبىرشاما جەتىستىكتەرگە جەتتى. ناۆاس قازىر دە بابىندا. «جاقسى قاقپاشى – جارتى كوماندا» دەگەن قاعيداعا سەنسەك, قورعانىسى مىعىم كوستا-ريكا ازۋلى قارسىلاسقا قارسى ويىندا قورعانىسقا مىقتاپ ورنىعۋى مۇمكىن. رەسەيدەگى بىرىنشىلىكتە جۋرناليستەر قاۋىمى كوستا-ريكا قۇراماسىنىڭ جارتىلاي قورعاۋشىسى ەلتسين تەحاداعا كوپتەگەن ساۋالدار دايىنداپ وتىر. بۇل فۋتبولشىنىڭ اكەسى بوريس ەلتسيننىڭ جەكە تابىنۋشىسى بولعانعا ۇقسايدى.
كوستا-ريكا قۇراماسىنىڭ ءتىزىمى:
• قاقپاشىلار: كەيلور ناۆاس («رەال», يسپانيا), پاريك پەمبەرتون («الاحۋەلەنسە»), لەونەل مورەيرا (ەرەديانو).
• قورعاۋشىلار: كريستيان گامبوا («سەلتيك», شوتلانديا), يان سميت («نورچەپينگ», شۆەتسيا), رونالد ماتارريتا («نيۋ-يورك سيتي», اقش), برايان وۆەدو («ساندەرلەند», انگليا), وسكار دۋارتە («ەسپانول», يسپانيا), دجانكارلو گونسالەس («بولونيا», يتاليا), فرانسيسكو كالۆو («ميننەسوتا يۋنايتەد», اقش), كەندالل ۋوستون («ۆانكۋۆەر ۋايتكەپس», MLS), دجونني اكوستا («اگيلاس», كولۋمبيا).
• جارتىلاي قورعاۋشىلار: داۆيد گۋسمان («پورتلەند تيمبەرز», اقش), ەلتسين تەحەدا («لوزاننا», شۆەيتساريا), سەلسو بورحەس («دەپورتيۆو», يسپانيا), رەندالل اسوفەيفا (ەرەديانو), رودني ۋوللاس («نيۋ-يورك سيتي», اقش), برايان رۋيس («سپورتينگ», پورتۋگاليا), دانيەل كوليندرەس, كريستيان بولانوس (ەكەۋى دە – ساپريسسا).
• شابۋىلشىلار: حوان ۆەنەگاس (ساپريسسا), دجوەل كەمپبەلل («بەتيس», يسپانيا), ماركو ۋرەنيا («فك لوس-اندجەلەس», اقش).
ەرمۇحامەد ماۋلەن,
«ەگەمەن قازاقستان»