«بولاشاققا باعدار: رۋحاني جاڭعىرۋ» باعدارلاماسى اياسىندا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ءبىر توپ عالىمدارى ء«بىر اپتاعا - اۋىلعا» كاسىبي-تانىمدىق ەكسپەديتسيا قۇرامىندا الماتى وبلىسىنىڭ بىرقاتار اۋىلدارىن ارالاپ قايتتى.
ۋنيۆەرسيتەت رەكتورى گ.الدامبەرگەنوۆانىڭ باستاماسىمەن ۇيىمداستىرىلعان جۇمىس توبى كيەلى جەرلەر مەن كەشەندەردى انىقتاپ, عىلىمي-زەرتتەۋ جۇمىستارىن جۇرگىزۋ ماقساتىندا جولعا شىققان بولاتىن.
پەداگوگيكا عىلىمدارىنىڭ كانديداتى گ. ابدراسيلوۆا جەتەكشىلىك ەتكەن ەكسپەديتسيا مۇشەلەرى ماۋسىم ايىنىڭ العاشقى كۇندەرىندە كەربۇلاق, سارقان, پانفيلوۆ, ىلە جانە جامبىل اۋداندارىن ارالادى.
كاسىبي-تانىمدىق ەكسپەديتسيا بارىسىندا ۋنيۆەرسيتەت عالىمدارىنىڭ جوعارى بىلىكتىلىگى مەن ۇيىمشىلدىعىنىڭ ارقاسىندا جوسپارلانعان جۇمىستار ءوز دەڭگەيىندە ورىندالدى. ءتول تاريحىمىزدىڭ نەگىزدەرىن عىلىمي تۇردە دايەكتەپ, مادەني-رۋحاني قۇندىلىقتارىمىزدى جاڭاشا ساراپتاۋدى ماقسات ەتكەن عالىمدار ءىس-ساپار بارىسىندا اتالعان اۋداندارداعى ءبىلىم بەرۋ مەكەمەلەرىمەن ىنتىماقتاستىق ورناتىپ, ايماقتاعى كيەلى جەرلەر بويىنشا بىرلەسكەن عىلىمي-زەرتتەۋ جوبالارىن جۇزەگە اسىرۋدىڭ جوسپارىن ءتۇزدى. مەكتەپ وقۋشىلارىنىڭ عىلىمعا دەگەن قىزىعۋشىلىعىن ارتتىرىپ, كاسىپتىك باعدار بەرىپ, وسى ايماقتارداعى «قازاقستاننىڭ 100 كيەلى ورىندارىنىڭ» تىزىمىنە كىرەتىن نىساندارعا ءارى كوپشىلىككە بەيمالىم كيەلى, قاسيەتتى ورىندارعا ەكسكۋرسيا جاسادى.
ەلىمىزدىڭ قاسيەتتى جەرلەرىن تۇگەندەۋ, قاعازعا ءتۇسىرۋ تىزىمدەۋمەن اياقتالمايتىنى انىق. ءالى دە اشىلماعان, ايقىندالماعان تاريحي نىساندار بار. وسى ورايدا ىزدەۋ جۇمىستارىن ارى قاراي جالعاستىرۋ, ايماقتاعى تاريحي تۇلعالاردى, كيەلى ورىنداردى انىقتاۋ ماقساتىندا جەرگىلىكتى تۇرعىندارمەن بىرلەسە زەرتتەۋلەر ۇيىمداستىرۋ, سونىمەن بىرگە زەرتتەۋلەر ناتيجەسىن وقۋلىقتارعا ەنگىزۋ الداعى ۋاقىتتىڭ ەنشىسىندە.
ۋنيۆەرسيتەت عالىمدارىنىڭ باستاماسى قازاقستاننىڭ تۇكپىر-تۇكپىرىندە وسىنداي ەكسپەديتسيالار ۇيىمداستىرۋعا ۇندەيدى. مۇنداي ءىس-ساپارالار جاستار اراسىندا ءپاتريوتيزمدى ناسيحاتتاپ, ەل مەن جەردى قۇرمەتتەۋگە شاقىرادى.
جاندار اسان
الماتى